.jpg)
សមត្ថកិច្ចចុះអនុវត្តបម្រាមគោចរនាពេលកន្លងមក។ ហុង មិនា
ភ្នំពេញៈ ស្នងការរងនគរបាលរាជធានីភ្នំពេញ លោកស៊ុម សុឃីម បានឲ្យដឹងថា ក្នុងរយៈពេល ១៤ ថ្ងៃនៃការបិទខ្ទប់រាជធានីភ្នំពេញ សមត្ថកិច្ច បានបង្រ្កាបបទល្មើស ដែលបំពាននឹងបម្រាមរបស់រដ្ឋាភិបាល បានចំនួន ៤០ករណី ដោយក្នុងនោះបានឃាត់ខ្លួនមនុស្សចំនួន ២៤២នាក់ យកទៅអនុវត្តវិធានការចំនួន ៣ តាមច្បាប់។
ថ្លែងក្នុងវេទិកាពិសេសរបស់ទូរទស្សន៍ជាតិកម្ពុជា នៅព្រឹកថ្ងៃទី ២៩ ខែមេសា លោក ស៊ុម សុឃីម បានថ្លែងថា ការអនុវត្តវិធានការទប់ស្កាត់សរុបទូទាំងរាជធានីភ្នំពេញទាំង ៤០ ករណីនេះ គឺមាន ១៣ករណី បានបញ្ចូនទៅតុលាការ ព្រោះពាក់ព័ន្ធនឹងករណីធ្ងន់ធ្ងរ ដែលមានលក្ខណៈផ្គើនវិធានការរបស់រដ្ឋាភិបាល។
លោកបញ្ជាក់ថា៖ «ក្នុងនោះពាក់ព័ន្ធនឹងករណីធ្ងន់ធ្ងរ ដែលបានបញ្ចូនទៅតុលាការ ចំនួន ១៣ករណី ដែលមានមនុស្ស ៤២នាក់ មានជនជាតិចិនចំនួន ១៥នាក់»។
ចំណែកការផាកពិន័យជាអន្តរការណ៍ គឺមាន ១៣ករណី ដែលបានឃាត់ខ្លួនចំនួន ៣៣នាក់ ក្នុងនោះមានជនជាតិចិន ៤ នាក់។ ចំណែក១៤ករណី គឺបានប្រើប្រាស់វិធានការអប់រំដោយធ្វើកិច្ចសន្យាឲ្យត្រឡប់ទៅផ្ទះ ដែលមានឃាត់ខ្លួនមនុស្ស ១៦៧ នាក់ ក្នុងនោះជនជាតិ[បរទេស] ១៥ នាក់»។
លោកបញ្ជាក់ថា៖ «វិធានការរយៈពេល ១៤ថ្ងៃនេះ ក្នុងរាជធានីភ្នំពេញរបស់យើង គឺសមត្ថកិច្ចយើង បានធ្វើការឃាត់នូវការផ្តល់ព័ត៌មាន នូវការបង្កព័ត៌មានញុះញង់ បង្កើតចលាចល ហើយនឹងអ្នកធ្វើដំណើរទាំងជនជាតិបរទេស និងខ្មែរ ដែលបង្កសកម្មភាពធ្វើឲ្យប៉ះពាល់ដល់វិធានការបិទខ្ទប់»។
មន្ត្រីនគរបាលរូបនេះបានព្រមានថា ចំពោះមុខក្នុងរយៈពេល ១ សប្តាហ៍បន្តនៃការបិទខ្ទប់នេះ សមត្ថកិច្ច នៅតែអនុវត្តវិធានការចំនួន ៣ គឺការបញ្ចូនសំណុំរឿងទៅតុលាការរាជធានីភ្នំពេញ វិធានការពិន័យជាអន្តរការណ៍ និងវិធានការធ្វើកិច្ចសន្យាអប់រំដដែល អមជាមួយនឹងវិធានការនៃការបិទខ្ទប់យ៉ាងម៉ឺងម៉ាត់បន្ថែមទៀត ដើម្បីបង្ការការឆ្លងរីករាលដាល។
លោកថា៖ «ក្នុងវិធានការបន្ថែមទៀតនេះ គឺច្បាស់ណាស់ តំបន់ក្រហម និងលឿងទុំ គឺត្រូវតែតឹងតែងជាងមុនហើយ មិនអាចបណ្តែតបណ្តាយបានទេ ព្រោះយើងនឹងមិនអាចគ្រប់គ្រងសភាពការណ៍បានទេ [បើបណ្តែតបណ្តោយ]»។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងដែរថា ចំពោះកម្លាំងកងរាជអាវុធហត្ថ គឺបានត្រៀមកម្លាំងរួចរាល់ និងបានកំណត់ពីតួនាទីភារកិច្ចរបស់ខ្លួនបានច្បាស់លាស់ ជាពិសេស គឺការបង្រ្កាបការរត់ពន្ធមនុស្ស ចេញពីតំបន់បិទខ្ទប់។
លោកថ្លែងថា៖ «កម្លាំងរបស់យើងកំពុងតែត្រូវពិនិត្យនៅតាមបណ្តាគោលដៅ ដែលគោលដៅណាសំខាន់ ហើយអាចគោលដៅណា អាចឲ្យមានការចរាចរណ៍បាន។ ពាក់ព័ន្ធច្បាប់នេះ គឺត្រូវតែអនុវត្តឲ្យបាន បើមានបទល្មើស យើងត្រូវតែបង្ក្រាប ចំពោះអ្នកដែលរត់ពន្ធមនុស្ស ហើយឃើញជាក់ស្តែង ដោយមានធាតុផ្សំគ្រប់គ្រាន់ គឺនឹងបញ្ចូនទៅតុលាការ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាលើកឡើងថា ក្នុងស្ថានភាពនៅកម្ពុជា និងចាប់តាំងពីមានពេលបិទខ្ទប់នេះមក គឺបានបណ្តាលឲ្យប្រជាពលរដ្ឋមួយចំនួន កំពុងប្រឈមនឹងបញ្ហាផ្លូវចិត្ត និងការខ្វះខាតនូវស្បៀងអាហារ។
ជាមួយគ្នានេះ ក៏មានជនខិលខូចមួយចំនួន បានប្រើប្រាស់ឱកាសនេះ ដើម្បីប្រព្រឹត្តសកម្មភាពផ្សេងៗ។ ប៉ុន្តែលោក ចង់ឲ្យតុលាការគួរពិនិត្យឲ្យបានគ្រប់ជ្រុងជ្រោយ និងមើលឲ្យចំឫសគល់នៃបញ្ហា មុននឹងធ្វើការចោទប្រកាន់លើពលរដ្ឋណាម្នាក់។
លោកបញ្ជាក់ថា៖ «ចំណុចមួយចំនួន អាជ្ញាធរ គួរតែមានការពិចារណាដែរ ជាពិសេស ការសម្រេចរបស់រដ្ឋាភិបាល ក្នុងការបន្តបិទខ្ទប់ ដែលគួរតែមានការបន្ធូរដែរ ដូចជា ការផ្តល់លទ្ធភាពនៃការអនុញ្ញាតឲ្យបុគ្គលិកដែលធ្វើការតាមក្រុមហ៊ុន និងអង្គការនានា អាចធ្វើដំណើរទៅ[ធ្វើការ]បាន ក្នុងការរក្សាគម្លាត»។
ការស្នើយ៉ាងដូច្នេះ ដោយលោកមើលឃើញថា ការអនុញ្ញាតដល់ការធ្វើដំណើរក្នុងតំបន់បិទខ្ទប់ គឺហាក់មានលក្ខណៈចង្អៀត ដែលធ្វើឲ្យរាំងស្ទះដល់ប្រតិបត្តិការហិរញ្ញវត្ថុមួយចំនួន ត្រូវបានជាប់គាំង៕
