.jpg)
កសិករបាញ់ថ្នាំថែរក្សាបន្លែក្នុងតំបន់បឹងទំពុន ខណ្ឌមានជ័យ។ ហុង មិនា
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានជំរុញលើកទឹកចិត្តដល់ប្រជាកសិករ បង្កើនផលិតភាពនៃការដាំដុះបន្លែ ផ្លែឈើ និងដំណាំស្រូវតាមគោលការណ៍គ្រឹះនៃ «ការអនុវត្តកសិកម្មល្អ» ដើម្បីផ្គត់ផ្គង់ទីផ្សារក្នុងស្រុកផង និងសម្រាប់ការនាំចេញទៅកាន់ផ្សារក្រៅប្រទេសផង។
ទន្ទឹមនឹងនេះរាជរដ្ឋាភិបាលកម្ពុជាក៏បានហាមឃាត់ផងដែរ ចំពោះការនាំចូលបន្លែផ្លែឈើរួមទាំងគ្រឿងបរិភោគឧបភោគគ្រប់ប្រភេទដែលខូចគុណភាព និងមានផ្ទុកនូវកំណកសារធាតុគីមីពុលកសិកម្ម និងសារធាតុគីមីផ្សេងទៀត ដែលបង្កគ្រោះថ្នាក់ដល់សុខភាពសាធារណៈ ពិសេសអ្នកបរិភោគ។
លោក ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានឲ្យដឹងកាលពីចុងសប្ដាហ៍មុនថា កន្លងមកកសិករភាគច្រើនមានការភាន់ច្រឡំថា បន្លែផ្លែឈើដែលផ្ដល់គុណប្រយោជន៍ចំពោះសុខភាព គឺជាប្រភេទបន្លែផ្លែឈើ ដែលដាំដុះដោយប្រើតែជី និងថ្នាំកសិកម្មសរីរាង្គដែលផ្សំឡើងពីរុក្ខជាតិ កាកសំណល់ផ្ទះបាយ និងលាមកសត្វប៉ុណ្ណោះ។ សម្រាប់បន្លែផ្លែឈើដែលដាំដុះដោយប្រើប្រាស់ជីគីមី និង ថ្នាំពុលកសិកម្ម ដែលផលិតចេញពីរោងចក្រ គឺផ្ដល់ផលប៉ះពាល់ដល់សុខភាពអ្នកប្រើប្រាស់ និងអ្នកបរិភោគផងដែរ។
លោកបានថ្លែងថា៖ «ការពិតទៅបន្លែផ្លែឈើ ដែលដាំដុះដោយប្រើជីធម្មជាតិ ឬជីសរីរាង្គ និង បន្លែផ្លែឈើ ដែលដាំដុះដោយប្រើប្រាស់ជីគីមីផលិតចេញពីឧស្សាហកម្មរោងចក្រតាមស្តង់ដាបច្ចេកទេស ឬវិធានសុវត្ថិភាពត្រឹមត្រូវនោះ គឺផ្ដល់គុណប្រយោជន៍ដល់សុខភាពដូចគ្នា»។
លោក វណ្ណហន បានពន្យល់ថា ការប្រើប្រាស់ជីធម្មជាតិដែលផ្សំឡើងពីស្លឹក និងកម្ទេចរុក្ខជាតិ កាកសំណល់ផ្ទះបាយ និងលាមកសត្វគឺអាចជួយរក្សាគុណភាពដីក្នុងរយៈពេលវែង ប៉ុន្តែការលូតលាស់នៃបន្លែ និងរុក្ខជាតិមានភាពយឺតយ៉ាវដែលពេលខ្លះមិនឆ្លើយតបតាមតម្រូវការទីផ្សារឡើយ។ ចំណែកការប្រើប្រាស់ជីគីមីដែលផលិតចេញពីរោងចក្រឧស្សាហកម្ម ដូចជាពពួកជី Urea និង NPK ដែលសម្បូរដោយសារធាតុអាស៊ូត និង ប៉ូតាស្យូមកម្រិតខ្ពស់នោះ វាផ្ដល់ភាពលូតលាស់ដល់បន្លែ និងរុក្ខជាតិឆាប់រហ័ស ឆ្លើយតបទាន់សភាពការណ៍នៃតម្រូវការទីផ្សារ ប៉ុន្តែការប្រើប្រាស់ជីគីមីកសិកម្មក្នុងរយៈពេលវែង វានឹងធ្វើឲ្យដីខូចគុណភាព និងប៉ះពាល់ដល់ជីវចម្រុះក្នុងដី។
លោក វណ្ណហន បានឲ្យដឹងទៀតថា៖ «បច្ចុប្បន្នក្រសួងកំពុងជំរុញលើកទឹកចិត្តដល់កសិករ ធ្វើការដាំដុះបន្លែផ្លែឈើ និងដំណាំស្រូវតាមវិធានសុវត្ថិភាពថ្មី ដែលអនុញ្ញាតឲ្យមានការប្រើប្រាស់ជីធម្មជាតិ និងជីគីមីរួមគ្នាក្នុងពេលតែមួយបាន ដោយអនុវត្តតាមគោលការណ៍បច្ចេកទេស ដែលត្រូវបានណែនាំដោយមន្ត្រីជំនាញ»។
លោកបានបន្តថា តាមរយៈគម្រោងផ្សព្វផ្សាយបច្ចេកទេសកសិកម្មថ្មីដែលធន់ទៅនឹងការប្រែប្រួលអាកាសធាតុហៅកាត់ថា ASPIRE របស់ក្រសួងកសិកម្ម រុក្ខាប្រមាញ់ និងនេសាទ និងប្រជាកសិករនៅភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្ដាលបានរួមសហការគ្នាជាបណ្ដុំអាជីវកម្មបន្លែសុវត្ថិភាព ហើយអភិវឌ្ឍផលិតភាពកសិកម្មតាមគោលការណ៍ «អនុវត្តកសិកម្មល្អ» ក្នុងនោះក្រុមអ្នកផលិត (ដាំដុះ) បន្លែសុវត្ថិភាព និងអ្នកផ្គត់ផ្គង់ធាតុចូលដែលរួមមានគ្រាប់ពូជ ជីកសិកម្មសរីរាង្គ និងថ្នាំកសិកម្មធម្មជាតិ រួមទាំងអ្នកប្រមូល និងចែកចាយកសិផល (បន្លែសុវត្ថិភាព) នៅលើទីផ្សារ មានកិច្ចសហការគ្នាល្អ ធ្វើឲ្យចង្វាក់ផលិតកម្មនៃបណ្ដុំអាជីវកម្មបន្លែសុវត្ថិភាពរបស់ពួកគេទទួលបានជោគជ័យជាទីមោទនៈ។ គម្រោងនេះបានធ្វើឲ្យក្រុមបណ្ដុំអាជីវកម្មបន្លែសុវត្ថិភាពនៃកសិករក្នុងភូមិបារ៉ែនក្រោមមានការយល់ដឹងច្បាស់អំពីអ្វីដែលហៅថា បន្លែសរីរាង្គ និងបន្លែសុវត្ថិភាព សម្រាប់ផ្គត់ផ្គង់នៅក្នុងទីផ្សារ។
លោក ឃុត គឹមអាង សមាជិកបណ្ដុំអាជីវកម្មបន្លែសុវត្ថិភាពក្នុងភូមិបារ៉ែនក្រោមដែលបានជោគជ័យក្នុងការដាំដុះបន្លែសុវត្ថិភាពក្នុងផ្ទះសំណាញ់បៃតង បាននិយាយថា ការដាំដុះបន្លែសុវត្ថិភាពរបស់លោកគឺធ្វើឡើងតាមការណែនាំបច្ចេកទេសរបស់មន្ត្រីជំនាញនៃគម្រោង ASPIRE និង ដាំតាមកិច្ចសន្យារបស់អាជីវករដែលជាសមាជិកនៃបណ្ដុំអាជីកម្មបន្លែសុវត្ថិភាពរបស់អ្នកភូមិរបស់លោក។
លោកបានបញ្ជាក់ថា៖ «យើងមិនអាចដាំតាមដែលចិត្តយើងចង់ដាំនោះទេ គឺយើងត្រូវមានផែនការដាំដុះឲ្យបានច្បាស់លាស់ និងដាំដុះតាមកិច្ចសន្យា ដែលបានព្រមព្រៀងតម្លៃ និង បរិមាណរួចជាស្រេចជាមួយអាជីវករដែលជាសមាជិកនៃបណ្តុំអាជីវកម្មបន្លែសុវត្ថិភាពរបស់យើង»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានធ្វើការណែនាំដល់រដ្ឋបាលជលផល និងមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត ធ្វើការពិនិត្យមើលឲ្យបានច្បាស់លាស់នូវគុណភាពស្បៃមុង ដែលជាវត្ថុតាងរឹបអូសបានពីបទល្មើសនេសាទ ហើយ «ជ្រើសរើសស្បៃមុងមានគុណភាព សម្រាប់រក្សាទុកយកទៅប្រើប្រាស់ក្នុងការដាំដុះដំណាំ, ការចិញ្ចឹមសត្វ និងវារីវប្បកម្មតាមលទ្ធភាពជាក់ស្ដែង និងបច្ចេកទេសស្របតាមច្បាប់ស្ដីពីជលផល ដើម្បីចូលរួមសន្សំនូវធនធានមុននឹងសម្រេចចិត្តយកទៅដុតកម្ទេចចោល៕
