.jpg)
កម្មកររោងចក្រ នៅពេលដែលពួកគេចេញពីរោងចក្រត្រឡប់ទៅផ្ទះវិញ។ ហុង មិនា
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ ណែនាំឲ្យបណ្តារោងចក្រ សហគ្រាស សិប្បកម្ម និងក្រុមហ៊ុន ស្ថិតក្នុងភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល បើកប្រាក់ឈ្នួលដើមខែមេសា និងប្រាក់ឧបត្ថម្ភបន្ថែមដល់កម្មករនិយោជិត ក្នុងអំឡុងពេលនៃការបិទខ្ទប់។
សេចក្តីណែនាំរបស់ក្រសួងការងារឲ្យដឹងថា យោងតាមច្បាប់ស្តីពីការងារ ការផ្អាកសកម្មភាពអាជីវកម្មរបស់រោងចក្រ សហគ្រាស សិប្បកម្ម និងក្រុមហ៊ុន ដោយសារការអនុវត្តវិធានការបិទខ្ទប់ជាបណ្តោះអាសន្ននៅភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល នាំឲ្យមានការព្យួរកិច្ចសន្យាការងាររបស់កម្មករនិយោជិត។
ដើម្បីធានាផលប្រយោជន័របស់បងប្អូនកម្មករនិយោជិតក្នុងអំឡុងពេលនៃការបិទខ្ទប់នេះ ក្រសួងការងារ និងបណ្តុះបណ្តាលវិជ្ជាជីវៈ សូមធ្វើការណែនាំដល់ម្ចាស់ ឬនាយករោងចក្រ សហគ្រាស សិប្បកម្ម និងក្រុមហ៊ុនដែលត្រូវផ្អាកសកម្មភាពអាជីវកម្មក្នុងអំឡុងពេលបិទខ្ទប់ ត្រូវរក្សាប៉ុស្តិ៍ការងារ និងរក្សាអតីតភាពការងារជូនកម្មករនិយោជិតរបស់ខ្លួនក្នុងអំឡុងពេលបិទខ្ទប់នេះ។
ក្រសួងបញ្ជាក់ថា៖ "ត្រូវបើកផ្តល់ប្រាក់ឈ្នួលដើមខែមេសា (ប្រាក់ឈ្នួលសម្រាប់ថ្ងៃទី ១ ដល់ថ្ងៃទី ១៤ មេសា ឆ្នាំ ២០២១) ជូនកម្មករនិយោជិតរបស់ខ្លួន ប្រសិនជាមិនទាន់បានបើកផ្តល់នាពេលកន្លងមក។ ការបើកផ្តល់នេះ សូមធ្វើនៅក្រោយពេលចប់វិធានការបិទខ្ទប់"។
ក្រសួងការងារបន្តថា៖ "ត្រូវផ្តល់ប្រាក់ឧបត្ថម្ភបន្ថែមជូនដល់កម្មករនិយោជិតរបស់ខ្លួនទៅតាមលទ្ធភាពដោយផ្អែកលើស្មារតីមនុស្សធម៌ សាមគ្គីភាព និងទំនួលខុសត្រូវសង្គមក្នុងគ្រាលំបាករួមនេះ។ ការបើកផ្តល់ប្រាក់ឧបត្ថម្ភបន្ថែមនេះ ក៏សូមធ្វើនៅក្រោយពេលចប់វិធានការបិទខ្ទប់"។
ក្រសួងបន្ថែមថា ក្រៅពីនេះ ដើម្បីសម្រួលដល់ការលំបាករបស់បងប្អូនកម្មករនិយោជិតដែលកំពុងរស់នៅជាក់ស្តែងនៅតាមបន្ទប់ជួលតំបន់បិទខ្ទប់ រាជរដ្ខាភិបាលបាននិងកំពុងផ្តល់ជំនួយសង្គមផ្សេងៗតាមរយៈរដ្ឋបាលរាជធានីភ្នំពេញ និងខេត្តកណ្តាលផងដែរ។
ក្រសួងសង្ឃឹមយ៉ាងមុតនាំថា លោក-លោកស្រីជាម្ចាស់ ឬនាយករោងចក្រ សហគ្រាស សិប្បកម្ម ក្រុមហ៊ុន និងបងប្អូនកម្មករនិយោជិតទាំងអស់នឹងអនុវត្តសេចក្តីណែនាំនេះប្រកបដោយស្មារតីទទួលខុសត្រូវ និងយោគយល់គ្នា៕
