ភ្នំពេញៈ ក្រសួងបរិស្ថានបានអំពាវនាវដល់ប្រជាពលរដ្ឋឲ្យបញ្ឈប់កាប់ផ្តួលរំលំដើមសំរង ដើម្បីបេះផ្លែ ដែលជាទង្វើខុសច្បាប់ នៅពេលដែលខែប្រាំងនេះគឺជារដូវប្រមូលផលផ្លែសំរង ខណៈដែលផ្លែឈើព្រៃប្រភេទនេះ មានតម្លៃខ្ពស់នៅលើទីផ្សារគឺក្នុង ១ គីឡូក្រាម មានតម្លៃពី ៣៥ ០០០ ទៅ ៤៥ ០០០ រៀល។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងប្រាប់ភ្នំពេញប៉ុស្ដិ៍កាលពីថ្ងៃអង្គារថា សំរង គឺជាប្រភេទរុក្ខជាតិដែលដុះក្នុងព្រៃពាក់កណ្ដាលព្រៃស្រោង។ គេអាចប្រមូលផលផ្លែសំរងបាននៅពេលវាដុះបានអាយុពី ១២ ទៅ ១៥ ឆ្នាំ។ ការប្រមូលផលផ្លែសំរងមានតាំងពីដូនតាមក ដោយប្រើប្រាស់ជាលក្ខណៈគ្រួសារប៉ុណ្ណោះដោយប្រមូលតាមរបៀបរើសយកពេលផ្លែសំរងទុំជ្រុះ។
លុះមកដល់អំឡុងឆ្នាំ ១៩៩៩ ផ្លែសំរងចាប់ផ្តើមមានតម្រូវការទីផ្សារខ្ពស់ជាហេតុធ្វើឱ្យប្រជាជនបានកាប់រំលំដើម ដើម្បីបេះផ្លែបានច្រើនទាន់ចិត្ត ដោយមិនរង់ចាំវាជ្រុះ បណ្តាលឱ្យដើមសំរងធំៗកាន់តែថយចុះពី ១ ឆ្នាំទៅ ១ ឆ្នាំ។
លោកថ្លែងថា៖ «ការកាប់ផ្ដួលដើមសំរង ដើម្បីប្រមូលផលគឺជាការខុសនឹងច្បាប់។ មន្ដ្រីឧទ្យានុរក្សយើងនៅតាមតំបន់នានាបានចុះអប់រំ ណែនាំក៏ដូចជាធ្វើការផាកពិន័យទៅលើអ្នកដែលកាប់ផ្ដួលដើមសំរង ដើម្បីរើសគ្រាប់សំរងនេះ។ យើងបានធ្វើការផ្សព្វផ្សាយជាបន្តបន្ទាប់ ទៅដល់ប្រជាពលរដ្ឋ ហាមឃាត់មិនឱ្យមានការកាប់ផ្ដួលដើមសំរងទេ ដើម្បីរក្សាទុកក្នុងការប្រមូលផលនៅឆ្នាំបន្តបន្ទាប់ទៀត»។
លោក ភក្ត្រា បានឱ្យដឹងដោយផ្អែកតាមការផ្តល់ព័ត៌មានពីគណៈកម្មការសហគមន៍តំបន់ការពារធម្មជាតិអូរទុងក្នុងខេត្ដរតនគិរីថា ទីផ្សារ ផ្លែសំរង មានលក្ខណៈងាយស្រួលបំផុតពោលគឺដល់រដូវប្រមូលផលមានឈ្មួញក្នុងស្រុកមកចាំប្រមូលទិញនៅក្នុងសហគមន៍តែម្តង ដែលមានតម្លៃចន្លោះពី ៣៥ ០០០ រៀល ទៅ ៤៥ ០០០ រៀលក្នុង ១ គីឡូក្រាមអាស្រ័យទៅតាមគុណភាពនៃផ្លែសំរង។
តាមការបញ្ជាក់ពីឈ្មួញតម្រូវការទីផ្សារផ្លែសំរងបច្ចុប្បន្ននេះ ៩០ ភាគរយ នាំចេញទៅប្រទេស វៀតណាម គឺមានតែប្រមាណ ១០ ភាគរយប៉ុណ្ណោះ ដែលប្រើប្រាស់ក្នុងស្រុក ដោយហេតុថា ប្រជាពលរដ្ឋមិនទាន់បានយល់ដឹងទូលំទូលាយពីសារៈសំខាន់នៃការប្រើប្រាស់ផ្លែសំរងនៅឡើយ។
លោក ភក្ត្រា ថ្លែង៖ «ក្រសួងបរិស្ថានក៏សូមអំពាវនាវទៅដល់ប្រជាពលរដ្ឋទាំងអស់ជាពិសេសគឺប្រជាសហគមន៍ដែលរស់នៅក្នុងតំបន់ការពារធម្មជាតិ ដែលទទួលផលពីអនុផលព្រៃឈើពិសេសជាអ្នកប្រមូលផលផ្លែសំរងនេះ សូមកុំកាប់ដើមឱ្យតែកាប់ដើមផ្ដួលរំលំដើម្បីរើសគ្រាប់សំរងគឺប្រៀបបានទៅនឹងការបំផ្លាញប្រភពធនធានរបស់ខ្លួនឯង។ ដូច្នេះបើរក្សាដើមសំរងឱ្យនៅឈរនោះសំរងនឹងបន្តផ្ដល់ផលប្រយោជន៍ដល់យើងរហូត។ ប៉ុន្ដែបើកាប់ផ្ដួលរំលំហើយរើសគ្រាប់សំរងនោះជាទង្វើខុសច្បាប់»។
បើតាមលោក ភត្ត្រា សំរង មានវត្ដមានច្រើននៅក្នុងខេត្តភាគឦសាននៃប្រទេសកម្ពុជាពិសេសមាននៅក្នុងខេត្ដរតនគិរី កោះកុងស្ទឹងត្រែង និងខេត្ដព្រះវិហារ។ ពលរដ្ឋអាចរកប្រាក់ពីការប្រមូលផលផ្លែសំរងដែលជាមុខរបរប្រចាំរដូវនេះបានចន្លោះពី ៤ ទៅ ១០ លានរៀលក្នុង ១ ឆ្នាំៗ។
លោកបន្តថា ក្រសួងបរិស្ថានតាមរយៈអគ្គនាយកដ្ឋានសហគមន៍មូលដ្ឋានក៏បានរៀបចំចងក្រងជាសមាគមដោយបានជំរុញឱ្យសហគមន៍ចូលរួមក្នុងការថែរក្សាដើមសំរងឱ្យបានគង់វង្សដើម្បីអាចប្រមូលផលជាបន្តបន្ទាប់ទៅទៀតចៀសវាងការកាប់បំផ្លាញ។
កាលពីថ្ងៃទី ១៨ ខែមេសា គណនីហ្វេសប៊ុកមួយឈ្មោះថា «កូន នាគ» បានសរសេរបង្ហោះថា សំរងជាផ្លែឈើព្រៃដែលមានតម្លៃសេដ្ឋកិច្ចខ្ពស់។ នៅស្រុកសៀមប៉ាង ខេត្តស្ទឹងត្រែង នៅពេលដល់រដូវប្រមូលផលរៀងរាល់ឆ្នាំ ប្រជាពលរដ្ឋក្នុងស្រុកចាកចេញពីផ្ទះស្ទើរតែគ្រប់គ្រួសារ រហូតដល់ស្ងាត់ភូមិសម្រុកចូលព្រៃដើម្បីប្រមូលផលសំរងធ្វើឱ្យទិដ្ឋភាពព្រៃទាំងមូលមានសភាពអ៊ូអរ ហាក់ដូចជាមជ្ឈមណ្ឌលសេដ្ឋកិច្ចពិសេសមួយកន្លែងដែលមមាញឹកទាំងយប់ទាំងថ្ងៃពិបាកនឹងពណ៌នា។
គណនីហ្វេសប៊ុកនេះថា៖ «តាមការប៉ាន់ប្រមាណក្នុងកម្រិតទាប គិតតែក្នុងស្រុកសៀមប៉ាងប៉ុណ្ណោះ ផលដែលទទួលបានពីការលក់ផ្លែសំរងរបស់ប្រជាពលរដ្ឋក្នុងស្រុកទាំងមូលក្នុង ១ រដូវគឺមិនតិចជាង ២ ពាន់លានរៀល ឡើយរៀងរាល់ឆ្នាំ។ ដូចនេះដើមសំរងគឺប្រៀបដូចជាធនាគារមួយយ៉ាងធំរបស់បងប្អូនប្រជាពលរដ្ឋ បើបងប្អូនមិនចេះថែរក្សា ការពារ ធនាគារនេះឱ្យគង់វង្សទេ មិនយូរមិនឆាប់ បងប្អូន និងខាតបង់ធ្ងន់ធ្ងរ ដោយសារការគិតខ្លីរបស់បងប្អូន (ការកាប់ផ្ដួលដើមសំរងដើម្បីបេះផ្លែ)»។
លោក ម៉ែន គុង អ្នកនាំពាក្យសាលាខេត្តស្ទឹងត្រែងបានឱ្យដឹងកាលពីម្សិលមិញថា រឿងនេះរដ្ឋបាលខេត្ដស្ទឹងត្រែងបានចុះណែនាំដល់ពលរដ្ឋនៅតាមស្រុក ភូមិ ឃុំ ដើម្បីកុំឱ្យពួកគាត់យកវិធីកាប់ផ្ដួលដើមក្នុងការប្រមូលផលផ្លែសំរងនេះដែរ។
លោកថា៖ «យើងក៏បានសហការជាមួយខាងមន្ដ្រីបរិស្ថាន និងកងកម្លាំងយោធាការពារព្រំដែន ដើម្បីចូលរួមសហការគ្នាណែនាំអប់រំពលរដ្ឋដោយផ្ទាល់នៅពេលពួកគាត់ទៅប្រមូលផលផ្លែសំរងនេះ។ ដើមសំរងភាគច្រើននៅក្នុងខេត្ដយើងគឺមាននៅតាមបណ្ដោយព្រំដែនស្ថិតក្នុងស្រុកសៀមប៉ាង»៕
វីដេអូ៖