.jpg)
លោកមេធាវី សុក សំអឿន ចូលរួមពិភាក្សាពីការធ្វើវិសោធនកម្មច្បាប់កន្លងមក។ ហ៊ាន រង្សី
ភ្នំពេញ៖ ក្រសួងមហាផ្ទៃនឹងបើកកិច្ចប្រជុំជាមួយតំណាងអង្គការសង្គមស៊ីវិលជាលើកទី៦ នៅដើមសប្តាហ៍ក្រោយ ដើម្បីពិនិត្យពិភាក្សាលើខ្លឹមសារសំខាន់ៗ ពាក់ព័ន្ធនឹងការស្នើសុំធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាល ខណៈសង្គមស៊ីវិលរំពឹងថា អ្វីដែលពួកគេបានលើកឡើងកន្លងមក នឹងត្រូវដាក់បញ្ចូលក្នុងសេចក្តីព្រាងច្បាប់នេះ។
សេចក្តីប្រកាសព័ត៌មានរបស់ក្រសួងមហាផ្ទៃចុះថ្ងៃទី ៣០ ខែមិថុនា បានឲ្យដឹងថា ក្រុមការងាររបស់រដ្ឋាភិបាល ដើម្បីសម្របសម្រួលដោះស្រាយសំណើ និងសំណូមពររបស់អង្គការសង្គមស៊ីវិលនឹងបន្តដំណើរការកិច្ចប្រជុំពិគ្រោះយោបល់លើកទី៦ ជាមួយតំណាងអង្គការសង្គមស៊ីវិលនៅថ្ងៃទី ៦ ខែកក្កដា នាសាលប្រជុំក្រសួងមហាផ្ទៃ។ កិច្ចប្រជុំនេះ គឺដើម្បីពិនិត្យពិភាក្សា លើខ្លឹមសារសំខាន់ៗពាក់ព័ន្ធនឹងការស្នើសុំធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាលរបស់សង្គមស៊ីវិល។
ក្រសួងមហាផ្ទៃថ្លែងថា៖ «ដើម្បីចូលរួមអនុវត្តនូវវិធានការបង្ការ និងទប់ស្កាត់ការរាតត្បាតនៃជំងឺកូវីដ ១៩ របស់រដ្ឋាភិបាល និងក្រសួងសុខាភិបាល ក្រសួងមហាផ្ទៃ នឹងអញ្ជើញតែតំណាងសមាគម និងអង្គការមិនមែនរដ្ឋាភិបាលមួយចំនួន ដែលធ្លាប់បានចូលរួមកិច្ចប្រជុំកាលពីលើកមុន ដើម្បីចូលរួមតែប៉ុណ្ណោះ»។
លោក សឿង សារឿន នាយកប្រតិបត្តិអង្គការ CCC ប្រាប់ភ្នំពេញប៉ុស្តិ៍ពីម្សិលមិញថា តាមរយៈកិច្ចប្រជុំនាពេលកន្លងមក សង្គមស៊ីវិលស្នើដល់ក្រសួងមហាផ្ទៃ ឲ្យធ្វើការកែប្រែនូវខ្លឹមសារចំនួន ១០ មាត្រា ដែលពាក់ព័ន្ធនឹងនីតិវិធីចុះបញ្ចីរបស់អង្គការ សមាគម រួមទាំងកែប្រែនូវពាក្យពេចន៍មួយចំនួនឲ្យបានច្បាស់លាស់។ បន្ថែមពីនេះក៏បានស្នើឲ្យមានការលុបចោលនូវមាត្រាមួយចំនួន ដែលមានលក្ខណៈ រឹតត្បិតសិទ្ធិសេរីភាព និងការធ្វើសកម្មភាពនានា របស់អង្គការសង្គមស៊ីវិលផងដែរ។
លោកបញ្ជាក់ថា៖ «ការរំពឹងរបស់អង្គការស៊ីវិលយើង គឺចង់ឲ្យមានការកែប្រែច្បាប់ ព្រោះច្បាប់បច្ចុប្បន្ន មានចំណុចឆកល្វែងច្រើន នៅពេលយកទៅអនុវត្តទៅមានការស្មុគស្មាញ មានកម្រិតថ្នាក់ក្រសួងជាពិសេសថ្នាក់ក្រោមជាតិហ្នឹង ដែលខុសៗគ្នា ដែលធ្វើឲ្យសង្គមស៊ីវិលហ្នឹង លោកពិបាកធ្វើកិច្ចការងារ»។
លោក សារឿន សង្ឃឹមថា ច្បាប់ដែលនឹងធ្វើវិសោធនកម្មក្នុងពេលខ្លីខាងមុខហ្នឹង នឹងអាចឆ្លុះបញ្ចាំងពីការអនុវត្តជាក់ស្តែង ហើយធានានូវសិទ្ធិសេរីភាពក្នុងការបំពេញការងាររបស់សង្គមស៊ីវិលបានច្រើនជាងពេលបច្ចុប្បន្ន។
លោក ឈឹម កាន អគ្គនាយករងទទួលបន្ទុកជាប្រធាននាយកដ្ឋានកិច្ចការសមាគម និងគណបក្សនយោបាយនៃក្រសួងមហាផ្ទៃប្រាប់ភ្នំពេញប៉ុស្តិ៍ ពីម្សិលមិញថា តាមគម្រោងរបស់ក្រសួងមហាផ្ទៃនឹងពន្លឿនកិច្ចពិភាក្សានេះ ឲ្យបានលឿនបំផុតតាមតែអាចធ្វើទៅបាន ដើម្បីឈានទៅដល់ដំណាក់កាលនៃការធ្វើវិសោធនកម្មក្នុងពេលខាងមុខ។
លោកអះអាងថា ចំពោះសំណើទាំងអស់ ដែលក្រុមសង្គមស៊ីវិលបានលើកឡើងនៅក្នុងកិច្ចប្រជុំ ក្រសួងនឹងយកមកពិចារណាដើម្បីដាក់បញ្ចូលក្នុងសេចក្តីព្រាងច្បាប់នេះ ប៉ុន្តែទទួលយកក្នុងកម្រិតណានោះ មិនទាន់អាចបញ្ជាក់បាននោះទេ។
លោកថា៖ «យើងទទួលយកទាំងអស់ពាក់ព័ន្ធទៅនឹងសំណើរបស់ពួកគេ ឲ្យតែមានការស្នើ។ គ្រាន់តែការសម្រេច បែបណានោះ គឺចុងក្រោយជាការសម្រេចរបស់រដ្ឋាភិបាលក្នុងការដាក់បញ្ចូល ឬកែប្រែចំណុចណានោះ។ ក្រុមការងារនៅពេលនេះ គឺនឹងប្រមូលធាតុចូលមកទាំងអស់ ព្រោះយើងមិនទាន់ហ៊ានសម្រេចអ្វីទាំងអស់ គ្រាន់តែយើងពិភាក្សាពីហេតុផល មូលហេតុដែលពួកគាត់ស្នើសុំ ដោយផ្អែកលើកត្តាអ្វីខ្លះ»។
ច្បាប់ស្តីពីសមាគម និងអង្គការមិនមែនរដ្ឋាភិបាលដែលបានធ្វើវិសោធនកម្មចុងក្រោយបំផុត ត្រូវបានអនុម័តកាលពីឆ្នាំ ២០១៥ ដោយមាន ៩ ជំពូក និង ៣៩ មាត្រា ដែលកន្លងទៅច្បាប់នេះ ត្រូវបានសង្គមស៊ីវិលជាតិ និងអន្តជាតិរិះគន់ថា មានលក្ខណៈរឹតត្បិតសិទ្ធិសេរីភាព និងការបំពេញការងាររបស់សមាគម និងអង្គការមិនមែនរដ្ឋាភិបាល៕
