ភ្នំពេញ៖ ក្រសួងសុខាភិបាល បានព្រមានចាត់វិធានការតាមផ្លូវច្បាប់ ចំពោះជនណា ដែលផ្សព្វផ្សាយ ការប្រើឧបករណ៍សម្រាប់ធ្វើតេស្តរហ័ស រកជំងឺកូវីដ ១៩ ខណៈដែលឧបករណ៍ធ្វើតេស្តរហ័សនេះ នៅមិនទាន់មានការទទួលស្គាល់ពីអង្គការសុខភាពពិភពលោកនៅឡើយ។
ក្រសួងសុខាភិបាល បានចេញសេចក្តីប្រកាសព័ត៌មាននៅព្រឹកថ្ងៃទី ២៩ ខែមីនា ឆ្នាំ២០២០នេះ ដោយបានអំពាវនាវដល់ប្រជាពលរដ្ឋ មិនត្រូវប្រើប្រាស់ឧបករណ៍ធ្វើតេស្តរហ័សរកជំងឺកូវីដ១៩ ដោយខ្លួនឯងនោះឡើយ ដោយបញ្ជាក់ថា បច្ចុប្បន្នមានការផលិតឧបករណ៍ធ្វើតេស្តរហ័សច្រើន តែរហូតដល់ពេលនេះ នៅមិនទាន់មានឧបករណ៍ធ្វើតេស្តរហ័សរកជំងឺកូវីដ ១៩ប្រភេទណាមួយ ដែលមានការបញ្ជាក់ទទួលស្គាល់ពីអង្គការសុខភាពពិភពលោកនូវភាពត្រឹមត្រូវ និងប្រសិទ្ធភាពនៃឧបករណ៍ទាំងនោះនៅឡើយទេ។
បើតាមក្រសួងសុខាភិបាល ប្រសិទ្ធភាពនៃការធ្វើតេស្តរហ័សបែបនេះ គឺនៅទាបណាស់ ហើយក៏មានការចេញលទ្ធផលមកមិនច្បាស់លាស់នោះដែរ ដូចជាអ្នកដែលមិនមានមេរោគ បែរទៅជាមានលទ្ធផលវិជ្ជមាន រីឯអ្នកមានមេរោគ បែរទៅជាមានលទ្ធផលអវិជ្ជមានទៅវិញ។
ក្រៅពីព្រមានចាត់វិធានការតាមផ្លូវច្បាប់ ចំពោះជនណាដែលផ្សព្វផ្សាយ ការប្រើឧបករណ៍សម្រាប់ធ្វើតេស្តរហ័សរកជំងឺកូវីដ១៩ ដោយគ្មានការអនុញ្ញាតពីក្រសួងសុខាភិបាល ក្រសួងក៏បានអំពាវនាវដល់អាជ្ញាធរពាក់ព័ន្ធ ឲ្យចូលរួមចាត់វិធានការតាមផ្លូវច្បាប់ជាធរមានយ៉ាងម៉ឺងម៉ាត់ជាទីបំផុត ចំពោះបុគ្គល ឬក្រុមហ៊ុនណា ដែលផ្សព្វផ្សាយឧបករណ៍ធ្វើតេស្តរហ័សរកកូវីដ១៩ ដោយមិនមានការអនុញ្ញាតពីក្រសួងសុខាភិបាល។
បើតាមក្រសួងសុខាភិបាល គិតត្រឹមព្រឹកថ្ងៃទី២៩ ខែមីនា ឆ្នាំ២០២០នេះ អ្នកឆ្លងជំងឺកូវីដ១៩ នៅកម្ពុជា មានចំនួនសរុប ១០៣នាក់។ ក្នុងនោះព្យាបាលជា ២១ នាក់ហើយ នៅសល់ ៨២នាក់ទៀត កំពុងសម្រាកព្យាបាល៕