ភ្នំពេញ៖ ក្រសួងសុខាភិបាលបានប្រកាសនៅថ្ងៃអាទិត្យ ទី ១៨ ខែមេសានេះថា អ្នកមានវិជ្ជមានកូវីដ ១៩ ដែលទើបរកឃើញថ្មីបន្ថែមទៀត មានរហូតដល់ ៦១៨ នាក់ ក្នុងរយៈពេលត្រឹមតែ ១ ថ្ងៃប៉ុណ្ណោះ ក្នុងនោះតួលេខឆ្លងច្រើនជាងគេ គឺនៅក្នុងរាជធានីភ្នំពេញ ដែលមានរហូតដល់ ៤៩៣ នាក់ ខណៈអ្នកព្យាបាលជាសះស្បើយមានចំនួន ៦០ នាក់។
យោងតាមសេចក្តីប្រកាសរបស់ក្រសួងសុខាភិបាលបានឱ្យដឹងថា អ្នកជំងឺដែលបានរកឃើញមានវិជ្ជមានកូវីដ ១៩ នេះមាននៅរាជធានីភ្នំពេញចំនួន ៤៩៣ នាក់ ខេត្តព្រះសីហនុចំនួន ៧៥ នាក់ ខេត្តកណ្ដាលចំនួន ៣១ នាក់ ខេត្តស្វាយរៀងចំនួន ៨ នាក់ ខេត្តព្រៃវែងចំនួន ៥ នាក់ ខេត្តកំពង់ស្ពឺចំនួន ៣ នាក់ ខេត្តតាកែវចំនួន ២ នាក់ និងខេត្តកំពង់ចាមចំនួន ១ នាក់។
គិតត្រឹមព្រឹកថ្ងៃទី ១៨ ខែមេសានេះ កម្ពុជាមានអ្នកវិជ្ជមានកូវីដ ១៩ សរុបចំនួន ៦ ៣៨៩ នាក់ ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៥ ៨៤៦ នាក់ អ្នកជាសះស្បើយសរុបចំនួន ២ ៤៧៦ នាក់ អ្នកកំពុងព្យាបាលចំនួន ៣ ៨៦៥ នាក់ និងអ្នកស្លាប់បានកើនឡើងរហូតដល់ចំនួន ៤៣ នាក់។
នៅថ្ងៃនេះដែរ ក្រសួងសុខាភិបាលបានប្រកាសពីករណីអ្នកស្លាប់ជនជាតិខ្មែរចំនួន ២ នាក់ ក្នុងនោះមានបុរសអាយុ ៨២ ឆ្នាំ និងស្ត្រី អាយុ ៤១ ឆ្នាំ ដោយសារជំងឺកូវីដ ១៩។
យោងតាមរបាយការណ៍ពីមន្ទីរពេទ្យហ្លួងម៉ែ បានឱ្យដឹងថា បុរសជនជាតិខ្មែរ អាយុ ៨២ ឆ្នាំ ដែលរស់នៅសង្កាត់ផ្សារចាស់ ខណ្ឌដូនពេញ រាជធានីភ្នំពេញ បានចូលសម្រាកព្យាបាលនៅមន្ទីរពេទ្យហ្លួងម៉ែ នៅថ្ងៃទី ១៥ ខែ មេសា ឆ្នាំ ២០២១ វេលាម៉ោង ១៤:០០ នាទី បន្ទាប់ពីបានរកឃើញវិជ្ជមានកូវីដ ១៩។
ប្រភពដដែលបានបន្តថា ដោយស្ថានភាពជំងឺមានការវិវត្តចេះតែធ្ងន់ធ្ងរឡើងៗពីមួយថ្ងៃទៅមួយថ្ងៃ រហូតដល់ថ្ងៃទី ១៧ អ្នកជំងឺមានស្ថានភាពធ្ងន់ធ្ងរ ហត់ដង្ហក់ខ្លាំង ដែលតម្រូវឱ្យក្រុមគ្រូពេទ្យជួយសង្គ្រោះតាមលក្ខណៈបច្ចេកទេស រួមទាំងការប្រើប្រាស់ម៉ាស៊ីនជំនួយដង្ហើមផង ប៉ុន្តែនៅតែមិនអាចជួយសង្គ្រោះអ្នកជំងឺបាន បណ្តាលឱ្យគាត់ស្លាប់នៅថ្ងៃទី ១៧ វេលាម៉ោង ១៦:៤៥ នាទី។
ចំណែកស្ត្រីជនជាតិខ្មែរអាយុ ៤១ ឆ្នាំ រស់នៅសង្កាត់គោកឃ្លាង ខណ្ឌសែនសុខ រាជធានីភ្នំពេញ បានចូលសម្រាកព្យាបាលនៅមជ្ឈមណ្ឌលជាតិកម្ចាត់រោគរបេង និងហង់សិននៅថ្ងៃទី ១៥ ខែមេសា វេលាម៉ោង ១៧:៤០ នាទី បន្ទាប់ពីបានរកឃើញមានវិជ្ជមានកូវីដ ១៩។
ដោយស្ថានភាពជំងឺមិនបានធូរស្រាល ហត់ខ្លាំង គាត់ត្រូវបានបញ្ជូនទៅព្យាបាលបន្តនៅមន្ទីរពេទ្យហ្លួងម៉ែនៅថ្ងៃទី ១៦ វេលាម៉ោង ១៥:០០ នាទី។ រហូតដល់ថ្ងៃទី ១៧ មេសា អ្នកជំងឺស្ថិតក្នុងស្ថានភាពធ្ងន់ធ្ងរឡើងៗ ហត់ដង្ហក់ខ្លាំង ដែលត្រូវឱ្យក្រុមគ្រូពេទ្យជួយសង្គ្រោះតាមលក្ខណៈបច្ចេកទេស រួមទាំងការប្រើប្រាស់ម៉ាស៊ីនជំនួយដង្ហើមផង ប៉ុន្តែនៅតែមិនអាចជួយសង្គ្រោះអ្នកជំងឺបាន។
តាមការសន្និដ្ឋានរបស់ក្រុមគ្រូពេទ្យជនជាតិខ្មែរទាំង ២ រូបនេះ បានស្លាប់បាត់បង់ជីវិតដោយសារវិបត្តិផ្លូវដង្ហើមស្រួចស្រាល់ធ្ងន់ធ្ងរ និងរលាកសួតទាំងសងខាងដោយសារវីរុសកូវីដ ១៩៕