ភ្នំពេញៈ ក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជាកំពុងរៀបចំបង្កើតកម្មវិធីសូហ្វវែរ អេហ្វ (Software App) លើស្មាតហ្វូន (Android and App store) ដើម្បីកែកំហុសសំណេរអក្សរខ្មែរ ខណៈសេចក្តីព្រាងអនុក្រឹត្យស្តីពីការគ្រប់គ្រងលើការប្រើភាសាខ្មែរកំពុងតែធ្វើផងដែរ។
លោក ឈិត វណ្ណាឫទ្ធិ ទីប្រឹក្សារាជបណ្ឌិត្យសភាកម្ពុជា និងជាអ្នកសម្របសម្រួលក្នុងការបង្កើត សូហ្វវែរអេហ្វនេះថ្លែងប្រាប់ភ្នំពេញប៉ុស្ដិ៍ពីម្សិលមិញថា ក្រុមការងារបច្ចេកទេសបានចាប់ផ្ដើមប្រមូលទិន្នន័យសម្រាប់បង្កើតកម្មវិធីសូហ្វវែរអេហ្វនេះតាំងពីដើមឆ្នាំនេះ ហើយបច្ចុប្បន្នបានសម្រេចស្ទើរ ១០០ ភាគរយសម្រាប់បច្ចេកទេស អេហ្វលើប្រព័ន្ធប្រតិបត្ដិការ Android និងកំពុងកែតម្រូវបច្ចេកទេសមួយចំនួនលើប្រតិបត្ដិការ App store ដែលយ៉ាងយូរ ១ ខែទៀតនឹងធ្វើរួចរាល់ទាំងស្រុង។
លោកថ្លែងថា៖ «កម្មវិធីស្មាតហ្វូននេះ ជាកម្មវិធីដ៏សំខាន់ពុំធ្លាប់មានពីមុនមក សម្រាប់ឱ្យសាធារណជនអាចប្រើទូរស័ព្ទថតរូប ហើយបញ្ជូនទៅក្រសួង ស្ថាប័ន អាជ្ញាធរពាក់ព័ន្ធឱ្យបានដឹងពីរូបសញ្ញាដែលមានកំហុស និងបញ្ជាក់ទីតាំងរបស់រូបសញ្ញានោះ ដើម្បីឱ្យក្រសួង ស្ថាប័ន អាជ្ញាធរពាក់ព័ន្ធពិនិត្យ និងកែតម្រូវតាមនីតិវិធីដែលមានចែងក្នុងអនុក្រឹត្យស្តីពីការគ្រប់គ្រងលើការប្រើភាសាខ្មែរនៅលើរូបសញ្ញា»។
បើតាមលោក វណ្ណាឫទ្ធិ ចាប់ពីពេលនេះទៅ តាមរយៈកម្មវិធីស្មាតហ្វូននេះ ទាំងមហាជន ក្រសួង ស្ថាប័ន និងអាជ្ញាធរពាក់ព័ន្ធអាចចូលរួមតាមដានត្រួតពិនិត្យ និងកែតម្រូវរាល់កំហុសនៃការប្រើប្រាស់ភាសាខ្មែរលើរូបសញ្ញាទាំងអស់គ្នាដោយពុំមានការស្តីបន្ទោសទម្លាក់កំហុសលើភាគីណាមួយឡើយ។
លោក សុខ ទូច ប្រធានរាជបណ្ឌិត្យសភាកម្ពុជាថ្លែងពីម្សិលមិញថា រាជបណ្ឌិត្យសភាកម្ពុជាកំពុងជំរុញការធ្វើសេចក្តីព្រាងអនុក្រឹត្យស្តីពីការគ្រប់គ្រងលើការប្រើភាសាខ្មែរនៅលើរូបសញ្ញាឱ្យបានរួចរាល់ឆាប់ៗតាមដែលអាចធ្វើទៅបាន ខណៈបច្ចុប្បន្នកំពុងពន្លឿនពិភាក្សាការងារនេះជាមួយក្រសួង ស្ថាប័នពាក់ព័ន្ធ។ លោកបញ្ជាក់ថា៖ «យើងត្រូវពិភាក្សាជាមួយក្រសួងជាច្រើន ប៉ុន្ដែដូចជាមិនមានអ្វីដែលជាការជំទាស់ទេ ព្រោះសេចក្ដីព្រាងអនុក្រឹត្យនេះគឺជាការចាំបាច់សម្រាប់ដំណើរការត្រួតពិនិត្យទៅលើផ្ទាំងអក្សរដែលមានកំហុស។ បើយើងគ្មានច្បាប់ យើងគ្មានអ្វីដើម្បីត្រួតពិនិត្យលើកំហុសទាំងនេះទេ»។
បើតាមលោក សុខ ទូច ក្រុមការងាររបស់រាជបណ្ឌិត្យសភាកម្ពុជាបានធ្វើការងារលើការធ្វើសេចក្ដីព្រាងអនុក្រឹត្យស្តីពីការគ្រប់គ្រងលើការប្រើភាសាខ្មែរ នៅលើរូបសញ្ញាតាំងពីឆ្នាំ ២០១១ ប៉ុន្ដែមិនទទួលបានលទ្ធផល។
ប៉ុន្ដែលោកបានប្ដេជ្ញាថា ក្នុងអាណត្តិលោកធ្វើជាប្រធានរាជបណ្ឌិត្យសភានេះនឹងធ្វើសេចក្ដីព្រាងអនុក្រឹត្យនេះឱ្យបានរួចរាល់ និងប្រឹងប្រែងឱ្យរួចរាល់ក្នុងដំណាច់ឆ្នាំ ២០២០ នេះផងដែរ។
លោក សុខ ទូច ថ្លែងថា ការរៀបចំបង្កើតកម្មវិធីសូហ្វវែរ អេហ្វ លើស្មាតហ្វូនដើម្បីកែកំហុសក្នុងសំណេរលើស្លាកសញ្ញា និងប្រព័ន្ធផ្សព្វផ្សាយគឺដើម្បីធ្វើទំនើបកម្មអក្សរសាស្ដ្រខ្មែរឱ្យទាន់សម័យបច្ចេកវិទ្យា ៤.០ ព្រោះកម្មវិធីស្មាតហ្វូនអាចឱ្យមហាជនគ្រប់គ្នាបញ្ចូនកំហុសអក្សរគ្រប់ទីកន្លែងមកកាន់សមត្ថកិច្ចដែលពាក់ព័ន្ធដើម្បីមានមូលដ្ឋានទៅកែតម្រូវភ្លាមៗ។
ក្រុមប្រឹក្សាជាតិភាសាខ្មែរកាលពីថ្ងៃទី ២០ ខែតុលា បានរៀបចំសិក្ខាសាលា ស្តីពីការពិគ្រោះយោបល់លើសេចក្តីព្រាងអនុក្រឹត្យស្តីពីការគ្រប់គ្រងលើការប្រើភាសាខ្មែរនៅលើស្លាកសញ្ញា និងការផ្សព្វផ្សាយកម្មវិធី សូហ្វវែរអេហ្វនេះនៅរាជបណ្ឌិត្យសភាកម្ពុជា ដើម្បីបង្ហាញដល់អ្នកចូលរួម និងមហាជនដើម្បីពិភាក្សាស្វែងរកធាតុចូលបន្ថែមក្នុងការជំរុញឱ្យសេចក្តីព្រាងអនុក្រឹត្យនេះកាន់តែគ្រប់ជ្រុងជ្រោយ។
យោងតាមលទ្ធផលស្រាវជ្រាវរបស់ក្រុមប្រឹក្សាជាតិភាសាខ្មែរបង្ហាញក្នុងសិក្ខាសាលានេះថា កំហុសនៃការប្រើភាសាខ្មែរលើរូបសញ្ញាមានដល់ទៅ ២៥ ភាគរយគឺកំហុសក្នុងការសរសេរស្រៈ ព្យញ្ជនៈ វណ្ណយុត្ត ការសរសេរជាព្យាង្គតម្រួត ឬព្យាង្គរាយ និងកំហុសខាងវេយ្យាករណ៍៕