.jpg)
មន្ត្រីសុខាភិបាលចុះអប់រំពលរដ្ឋពីការបង្ការការឆ្លងជំងឺគ្រុនចាញ់។ រូបថត សហការី
ព្រះវិហារៈ ប្រធានមន្ទីរសុខាភិបាលខេត្តព្រះវិហារប្រកាសត្រៀមមុងចំនួន ៥ ម៉ឺន ចែកជូនប្រជាពលរដ្ឋតាមគោលដៅ ដោយឥតគិតថ្លៃ ដើម្បីបង្ការជំងឺគ្រុនចាញ់នារដូវវស្សា បើទោះជាដើមឆ្នាំនេះ ស្ថានភាពជំងឺគ្រុនចាញ់ មិនទាន់មានការផ្ទុះឡើងខ្លាំងក៏ដោយ។
ជំងឺគ្រុនចាញ់នៅតែជាជំងឺមួយ ដែលងាយនឹងបង្កគ្រោះថ្នាក់ដល់មនុស្ស ជាពិសេសគឺអ្នករស់នៅតំបន់សម្បូរមូសដែកគោលញី ដូចជាតំបន់ព្រៃភ្នំជាដើម។ ជំងឺគ្រុនចាញ់ ចែកចេញជា ៣ ប្រភេទ គឺជំងឺគ្រុនចាញ់ប្រភេទហ្វ្លាស់ស្មូដ្យូម (គ្រុនសន្ធំ) ហ្វ៉ាស៊ីហ្វ៉ា រ៉ូម (គ្រុនលាប់) និងប្រភេទម៉ិច (គ្រុនសន្ធំ និងគ្រុនលាប់បញ្ចូលគ្នា) ដែលតែងតែកើតឡើងជាញឹកញាប់ និងបង្កឱ្យមានមនុស្សស្លាប់។
លោក គួង ឡូ ប្រធានមន្ទីរសុខាភិបាលខេត្តព្រះវិហារប្រាប់ ភ្នំពេញ ប៉ុស្តិ៍ នៅថ្ងៃទី ២៧ ឧសភា ថា ក្នុងរយៈពេល ៤ ខែ ដើមឆ្នាំ ២០២១ នេះ ជំងឺគ្រុនចាញ់នៅក្នុងខេត្តពិតជាធ្លាក់ចុះខ្លាំង បើទោះបី ក្នុងពេលនេះជារដូវដែលមានភ្លៀងធ្លាក់ហើយក៏ដោយ ក៏ចំនួនអ្នកកើតជំងឺនេះស្ទើរតែលែងមាន។ ការធ្លាក់ចុះខ្លាំងនៃជំងឺគ្រុនចាញ់ដោយសារយុទ្ធនាការអប់រំអំពីសុខភាពធ្វើឱ្យពលរដ្ឋមានការយល់ដឹងពីហានិភ័យនៃជំងឺគ្រុនចាញ់។
ការអះអាងបែបនេះ ដោយលោកសំអាងថា រយៈពេល ៤ ខែដើមឆ្នាំនេះ គឺមិនទាន់មានករណីអ្នកឆ្លងជំងឺគ្រុនចាញ់សន្ធំនោះទេ ខណៈអ្នកជំងឺគ្រុនចាញ់លាប់ឡើងវិញមានប្រមាណ ៨៥ ករណីប៉ុណ្ណោះ បើប្រៀបធៀបនឹងឆ្នាំ ២០២០ មានជាង ១០០ ករណី។
លោកបញ្ចាក់ថា៖ «ទោះបីអត្រា ជំងឺគ្រុនចាញ់នៅក្នុងខេត្តព្រះវិហារបានធ្លាក់ចុះក៏ពិតមែន ក៏មន្ទីរ នៅតែបន្តយុទ្ធនាការលុបបំបាត់ជំងឺគ្រុនចាញ់បន្ថែមទៀតឱ្យស្របតាមផែនការយុទ្ធសាស្ត្រជាតិរបស់រាជរដ្ឋាភិបាលត្រូវលុបបំបាត់ ជំងឺគ្រុនចាញ់ប្រភេទសន្ធំឱ្យបានមុនឆ្នាំ ២០២៣។ យើងនៅតែបន្តចុះអប់រំអំពីសុខភាព និងហានិភ័យ ឆ្លងជំងឺគ្រុនចាញ់ ដូចជានៅតំបន់ភ្នំ ឬកន្លែងមានព្រៃច្រើន ព្រោះអាចនឹងកើតមាននារដូវវស្សានេះ»។
ដោយសារជំងឺគ្រុនចាញ់ងាយនឹងផ្ទុះឡើងក្នុងរដូវវស្សា ជាពិសេសពេលមានភ្លៀងធ្លាក់ច្រើន និងពេលឈប់ភ្លៀងទៅវិញ លោក គួង ឡូ ឱ្យដឹងថា ក្រោមជំនួយពីដៃគូអភិវឌ្ឍន៍ តាមរយៈក្រសួងសុខាភិបាល ខេត្តព្រះវិហារ នឹងទទួលបាន មុងចំនួន ៥ ម៉ឺនមុង សម្រាប់ចែកជូនពលរដ្ឋដោយឥតគិតថ្លៃ។
លោកថា៖ «យើងនឹងទទួលបានក្នុង [ចុង] ខែឧសភានេះ ហើយក្នុងខែមិថុនា ក្រុមការងារយើងនឹងចែកជូនមុងទាំងនេះទៅតាមខ្នងផ្ទះរបស់ប្រជាពលរដ្ឋ។ យើងក៏បានធ្វើជំរឿនហើយដែរថា ក្នុង ១ គ្រួសារពួកគាត់អាចនឹងទទួលបានមុងទាំងនេះចំនួនប៉ុន្មាន ឱ្យសមស្របទៅតាមតម្រូវការរបស់គ្រួសារពួកគាត់»។
តាមរបាយការណ៍ប្រចាំឆ្នាំរបស់កម្មវិធីជាតិប្រយុទ្ធនឹងជំងឺគ្រុនចាញ់បានបង្ហាញថា ប្រទេសកម្ពុជា លែងមានករណីស្លាប់ ដោយសារជំងឺគ្រុនចាញ់ចាប់តាំងពីឆ្នាំ ២០១៨ រហូតមកដល់បច្ចុប្បន្ន។ នៅឆ្នាំ ២០២០ ជំងឺគ្រុនចាញ់ទូទាំងប្រទេសសរុបមាន ៩ ២២៧ ករណីឈឺ ដោយបានថយចុះ ៧១% បើប្រៀបធៀបនឹងឆ្នាំ ២០១៩ ដែលមាន ៣១ ៩៧១ ករណីឈឺ។
តាមផែនការយុទ្ធសាស្ត្រជាតិរបស់រាជរដ្ឋាភិបាលបានកំណត់លុបបំបាត់ជំងឺគ្រុនចាញ់ប្រភេទសន្ធំនៅឆ្នាំ ២០២៣។ លុបបំបាត់ជំងឺគ្រុនចាញ់គ្រប់ប្រភេទឱ្យអស់នៅត្រឹមឆ្នាំ ២០២៥ ដើម្បីធានាបានសុវត្ថិភាព និងសុខុមាលភាពជូនពលរដ្ឋ ខណៈឆ្នាំនេះកម្ពុជាប្រារព្ធទិវាគ្រុនចាញ់ ក្រោមប្រធាបទឈានទៅសម្រេចគោលដៅគ្មានជំងឺគ្រុនចាញ់៕
