ភ្នំពេញៈ គណៈមេធាវីកម្ពុជាប្រកាសបើកដំណើរការបំពេញការងារប្រចាំថ្ងៃ និងផ្តល់សេវានានារបស់ខ្លួនឡើងវិញ បន្ទាប់ពីបានកាត់បន្ថយការងារប្រចាំថ្ងៃ ដោយរក្សាទុកតែការងារជាអាទិភាពមួយចំនួន ដើម្បីអនុវត្តតាមវិធានការរដ្ឋបាលនានារបស់រដ្ឋាភិបាលក្នុងការទប់ស្កាត់ការឆ្លងរាលដាលជំងឺកូវីដ១៩។
សេចក្តីជូនដំណឹងរបស់គណៈមេធាវីកម្ពុជាចុះថ្ងៃទី ១៨ ឧសភា បានឱ្យដឹងថា ការបើកដំណើរការឡើងវិញនេះ ត្រូវចាប់ផ្តើមពីថ្ងៃជូនដំណឹងតទៅ ជាមួយនឹងការបំពេញការងារប្រចាំថ្ងៃ និងផ្តល់សេវានានារបស់គណៈមេធាវីជូនដល់សមាជិក សមាជិកាគណៈមេធាវី និងសាធារណជនជាប្រក្រតីឡើងវិញ។
គណៈមេធាវីកម្ពុជាបានបញ្ជាក់ក្នុងលិខិតថា «បុគ្គលិកសមាជិក សមាជិកាគណៈមេធាវី និងសាធារណជនដែលមកទំនាក់ទំនងការងារនៅគណៈមេធាវីត្រូវអនុវត្តតាមវិធានការសុខាភិបាលដោយត្រូវពាក់ម៉ាស់ វាស់កម្ដៅ ចូលសម្លាប់មេរោគក្នុងម៉ាស៊ីនសម្លាប់មេរោគ លាងសម្អាតដៃ និងរក្សាគម្លាតសង្គម។
លោក លី ច័ន្ទតុលា ប្រធានគណៈមេធាវីកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា ដោយសារតែកន្លងមក ដើម្បីគោរពអនុវត្តតាមវិធានការរដ្ឋបាលនានា ជាពិសេសវិធានការបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល គណៈមេធាវីកម្ពុជាបានកាត់បន្ថយការងារប្រចាំថ្ងៃដោយរក្សាទុកតែការងារជាអាទិភាពមួយចំនួន និងបានបង្កើតក្រុមប្រចាំការសម្រាប់ដោះស្រាយការងារជាអាទិភាពប្រចាំថ្ងៃតែប៉ុណ្ណោះ។
លោកបានបញ្ជាក់ថា៖ «ការងារប្រចាំថ្ងៃនានាក៏ដូចជា ការផ្តល់សេវារបស់គណៈមេធាវីហ្នឹង គឺយើងធ្វើធម្មតាមកវិញ ដូចជាមេធាវីគាត់ចង់សុំវិញ្ញាបនបត្រ ការសុំទទួលស្គាល់ការបន្ត ឬចង់សុំឱ្យគណៈមេធាវីជួយអន្តរាគមន៍ចំពោះការបំពេញការប្រកបវិជ្ជាជីវៈនានា គឺយើងនឹងចាប់ផ្តើមធ្វើឡើងវិញ»។
លោកបានបន្តថា៖ «ចំពោះប្រជាពលរដ្ឋដែលគាត់ត្រូវការសេវាកម្មមេធាវីការពារជនក្រីក្រ ឬត្រូវការពិគ្រោះយោបល់ផ្នែកផ្លូវច្បាប់អីហ្នឹងគឺយើងដំណើរការមកធម្មតាវិញ ហើយមេធាវីយើងគឺធ្វើការចុះស៊ើបអង្កេត និងចុះអធិការកិច្ចអីហ្នឹងគឺដំណើរការធម្មតាមកវិញទាំងអស់»។
បន្ថែមពីនេះ លោក លី ច័ន្ទតុលា បានអះអាងថា ដោយសារតែបញ្ហាវិបត្តិកូវីដ១៩ បានធ្វើឱ្យសកម្មភាពការងារមួយចំនួនរបស់គណៈមេធាវី បានប្រទះការលំបាក ប៉ុន្តែគណៈមេធាវីនៅតែប្រកាន់ជំហរ និងកិច្ចខិតខំប្រឹងប្រែងដើម្បីបំពេញវិជ្ជាជីវៈនេះ ជូនដល់ពលរដ្ឋឱ្យបានល្អផងដែរ។
លោកបានបន្ថែមថា៖ «យើងបានពង្រឹងបែបបទនៃលក្ខខណ្ឌមួយចំនួនទាក់ទងនឹងការចូលប្រកបវិជ្ជាជីវៈមេធាវី ជាពិសេសមាត្រា ៣២ ដែលយើងបានបន្ថែមលក្ខខណ្ឌដើម្បីឱ្យមានការប្រឡង ធ្វើតេស្ត ផ្ទៀងផ្ទាត់បន្ថែមទៀតដើម្បីពង្រឹងបន្ថែមសមត្ថភាពអ្នកថ្មី។ យើងក៏បានពង្រឹងរបៀបរបបធ្វើការងារផ្ទៃក្នុង និងការផ្តល់សេវាមេធាវីឱ្យបានឆាប់រហ័សផងដែរ»។
ក្នុងឆ្នាំ ២០២១ គិតត្រឹមថ្ងៃ ២០ ខែឧសភានេះ គណៈមេធាវី កម្ពុជា បានជួយការពារក្តីដល់ជនក្រីក្រ ដែលមកពឹងពាក់សេវាការពារក្តីបានចំនួន ២ ១៣៦ ករណី ខណៈក្នុងឆ្នាំនេះដែរ គណៈមេធាវីបានទទួលមេធាវីថ្មីចំនួន ៣១ រូប ដែលនាំឱ្យគណៈមេធាវីកម្ពុជាមានសមាជិកសរុបចំនួន ២ ៣៨២ រូប។ នេះបើតាមលោក លី ច័ន្ទតុលា៕