ព្រះសីហនុៈ បុរស និងស្ត្រី ជាជនជាតិចិន ២ នាក់ ក្នុងចំណោម ៣ នាក់ ត្រូវបានសមត្ថកិច្ចចាប់ខ្លួនពាក់ព័ន្ធបាញ់សម្លាប់បុរសចិនម្នាក់កាលពីម្សិលមិញ ខណៈបុរសជនជាតិចិនម្នាក់ទៀតត្រូវបានតុលាការឃុំខ្លួននៅពន្ធនាគារខេត្តព្រះសីហនុពាក់ព័ន្ធនឹងការសម្លាប់បុរសជនជាតិចិនដូចគ្នា ដោយកាត់ជា ៣ កំណាត់ កាលពីថ្ងៃទី ១ តុលា នៅភូមិ-សង្កាត់ ៤ ក្រុង-ខេត្តព្រះសីហនុ។
ពាក់ព័ន្ធនឹងការឃុំខ្លួនជនសង្ស័យម្នាក់នេះលោក យឹម ប៊ុណ្ណារ៉េត អ្នកនាំពាក្យសាលាដំបូងខេត្តព្រះសីហនុប្រាប់ពីម្សិលមិញថា ជនសង្ស័យជាជនជាតិចិនម្នាក់នោះត្រូវបានព្រះរាជអាជ្ញាចោទប្រកាន់ហើយ ប៉ុន្តែជនល្មើសប្រព្រឹត្តបទឧក្រិដ្ឋធ្ងន់ធ្ងរបែបនេះមិនអាចមិនឃុំខ្លួននោះទេ។
លោកថ្លែងថា៖ «បើជនល្មើសប្រព្រឹត្តបទឧក្រិដ្ឋបែបនេះនឹងត្រូវឃុំខ្លួនហើយ»។
ទោះយ៉ាងណាលោក ស៊ុត សំអុន នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋានគរបាល ខេត្តព្រះសីហនុ ប្រាប់ពីម្សិលមិញថា ករណីបុរសជនជាតិចិនម្នាក់ឈ្មោះ ZHOU YA YUN អាយុ ២៩ ឆ្នាំ ត្រូវបានតុលាការនៃសាលាដំបូងខេត្តព្រះសីហនុចោទប្រកាន់ និងបញ្ជូនជនល្មើសទៅឃុំខ្លួននៅក្នុងពន្ធនាគារខេត្តហើយកាលពីថ្ងៃទី ៥ តុលា។
លោក សំអុន បញ្ជាក់ថា៖ «បុរសជនជាតិចិនម្នាក់នោះត្រូវចោទពីបទមនុស្សឃាតគិតទុកជាមុនតាមបញ្ញត្តិមាត្រា ២០០ នៃក្រមព្រហ្មទណ្ឌ និង បទលួចមានស្ថានទម្ងន់ទោស»។
ពាក់ព័ន្ធបទចោទ និងយោងមាត្រាខាងលើនេះប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តបទល្មើសមែននោះនឹងត្រូវផ្ដន្ទាទោសដាក់ពន្ធនាគារអស់ ១ ជីវិត។
គួររំឭកថា ករណីឃាតកម្មនេះជនរងគ្រោះឈ្មោះ WU CHENGHUI ជនជាតិចិនត្រូវបានជនត្រូវចោទកាប់ជា ៣ កំណាត់ ហើយយកទៅបោះចោលនៅដីឡូត៍មួយកន្លែងស្ថិតនៅអូរត្រេះ ២ ភូមិ ៦ សង្កាត់ ៤ ក្រុង-ខេត្តព្រះសីហនុហើយត្រូវបានប្រជាពលរដ្ឋប្រទះឃើញកាលពីថ្ងៃទី ១ តុលា។
បើតាមកំណត់ហេតុសមត្ថកិច្ចបង្ហាញថា បន្ទាប់ពីសមត្ថកិច្ចធ្វើការពិនិត្យសាកសព និងប្រមូលភ័ស្តុតាងនៅកន្លែងកើតហេតុរួចមក សមត្ថកិច្ចបានបន្តធ្វើការស្រាវជ្រាវ និងឈានទៅឃាត់ខ្លួនជនសង្ស័យនៅវេលាម៉ោង ៥ ល្ងាចថ្ងៃទី ១ ខែ តុលា ឆ្នាំ ២០១៩ នៅចំណុចហាងប្តូរប្រាក់ យីហោជាំងស៊ូ ស្ថិតនៅក្រុមទី ១៤ ភូមិ ៤ សង្កាត់ ៤ ក្រុង-ខេត្តព្រះសីហនុ។ សាកសពរបស់ជនរងគ្រោះត្រូវបានកាត់ជា ៣ កំណាត់ ដោយកំណាត់ទី ១ ពីក្បាលដល់ចង្កេះ កំណាត់ទី ២ ពីចង្កេះដល់ជង្គង់ និងកំណាត់ទី ៣ ពីជង្គង់ដល់បាតជើង។
កំណត់ហេតុបញ្ជាក់ថា ករណីនេះជនសង្ស័យបានសារភាពថា កើតឡើងដោយសារជនរងគ្រោះបានទាក់ទងជនសង្ស័យដើម្បីប្តូរប្រាក់ចិនជាប្រាក់ដុល្លារអាមេរិកចំនួន ៧ ម៉ឺនដុល្លារអាមេរិក លុះនៅថ្ងៃទី ៣០ ខែ កញ្ញា ឆ្នាំ ២០១៩ ជនរងគ្រោះបានទៅហាងប្តូរប្រាក់របស់ជនសង្ស័យដែលមានស្លាកយីហោប្តូរប្រាក់ ជាំងស៊ូ នៅក្រុមទី ១៤ ភូមិ ៤ សង្កាត់ ៤ ក្រុងព្រះសីហនុ ហើយប្លន់ចាក់សម្លាប់ជនរងគ្រោះតែម្តង។
បន្ទាប់ពីសម្លាប់ជនរងគ្រោះហើយជនសង្ស័យបានកាត់សាកសពជា ៣ កំណាត់ រួចយកសាកសពវេចខ្ចប់ជាមួយភួយ និងអាវដែលជនសង្ស័យធ្វើសកម្មភាព និងស្បោងពណ៌ខ្មៅដល់ម៉ោង ១ រំលងអធ្រាត្រឈានចូលថ្ងៃទី ១ ខែ តុលា ឆ្នាំ ២០១៩ ជនសង្ស័យបានទៅជួលរថយន្តម៉ាក LEXUS 470១ គ្រឿង ពណ៌ស ស្លាកលេខភ្នំពេញ 2AH-1611 ដើម្បីដឹកសាកសពជនរងគ្រោះយកទៅប្លុងចោលនៅកន្លែងផ្សេងៗពីគ្នាដោយកំណាត់ទី ១ ពីក្បាលដល់ចង្កេះយកទៅប្លុងចោលនៅដីឡូត៍មួយកន្លែងស្ថិតនៅអូរត្រេះ ២ ភូមិ ៦ សង្កាត់ ៤ ក្រុងព្រះសីហនុទី ២ ពីចង្កេះដល់ជង្គង់យកទៅប្លុងចោលនៅដីឡូត៍មួយកន្លែងស្ថិតនៅភ្នំ ៩៦ ភូមិ ៥ សង្កាត់ ៤ ក្រុង-ខេត្តព្រះសីហនុ និងទី ៣ ពីជង្គង់ដល់បាតជើងយកទៅប្លុងចោលនៅក្នុងព្រៃ ភូមិមើលស្វា អូតែល ៧ ជាន់ ក្នុងភូមិ ១ សង្កាត់ ៣ ក្រុងព្រះសីហនុ។
ករណីឃាតកម្មមួយទៀតពីម្សិលមិញ សមត្ថកិច្ចបានចាប់ខ្លួនស្ត្រី និងបុរសចិន បន្ទាប់ពីជនសង្ស័យបាញ់សម្លាប់បុរសរងគ្រោះជាជនជាតិចិនដូចគ្នាដាក់ក្នុងរថយន្តហើយយកទៅបោះចោលកណ្តាលផ្លូវក្នុងសង្កាត់លេខ ២ ក្រុង-ខេត្តព្រះសីហនុ។
លោក ស៊ុត សំអុន បានបញ្ជាក់ថា ក្រោយពីសមត្ថកិច្ចចុះធ្វើកោសល្យវិច័យលើសាកសពមក សមត្ថកិច្ចបានស្រាវជ្រាវ និងតាមចាប់បានជនជាតិចិនប្រុស-ស្រីបាន ២ នាក់ក្នុងចំណោម ៣ នាក់នៅប៉ុន្មានម៉ោងក្រោយមានហេតុការណ៍។ ជនល្មើសបានបើករថយន្តដែលដឹកសាកសពនោះយកទៅចតចោលនៅជិតវត្តក្រោមក្នុងសង្កាត់ ៣ ក្រុងព្រះសីហនុ។ ប៉ុន្តែខាងព្រហ្មទណ្ឌកម្រិតធ្ងន់បានប្រគល់ការងារនេះទៅខាងកម្រិតស្រាលវិញ។
ទោះយ៉ាងណាលោក ហ៊ី សុខលី នាយការិយាល័យព្រហ្មទណ្ឌកម្រិតស្រាលប្រាប់ពីម្សិលមិញដែរថា ជុំវិញអំពើឃាតកម្មនេះ សមត្ថកិច្ចរបស់លោកកំពុងសាកសួរជនសង្ស័យដើម្បីដឹងមូលហេតុ ប៉ុន្តែពួកគេមិនទាន់សារភាពប្រាប់សមត្ថកិច្ចទេ។
លោកថា៖ «រឿងនេះ ខ្ញុំកំពុងលួងលោមពួកគេ ដើម្បីឆ្លើយពីមូលហេតុនៃការបាញ់សម្លាប់ជនរងគ្រោះ»៕