.jpg)
លោកនាយករដ្ឋមន្ត្រី ហ៊ុន សែន ក្នុងជំនួបជាមួយលោក Wang Yi រដ្ឋមន្ត្រីក្រសួងការបរទេសចិនកាលពីឆ្នាំមុន។ រូបថត SPM
ភ្នំពេញៈ ចិនបានប្រកាសផ្តល់វ៉ាក់សាំងប្រឆាំងកូវីដ ១ លានដូសដល់កម្ពុជា ហើយលោកនាយករដ្ឋមន្ត្រី ហ៊ុន សែន បានប្រកាសចាក់វ៉ាក់សាំងនេះមុនគេ ដើម្បីបង្កើនជំនឿទុកចិត្តរបស់ប្រជាពលរដ្ឋ។ ជាមួយគ្នានេះពលរដ្ឋដែលស្ថិតក្នុងបញ្ជីអាទិភាពក្នុងការទទួលបានវ៉ាក់សាំងនិយាយថា ពួកគេស្ម័គ្រចិត្តទទួលយកវ៉ាក់សាំងរបស់ចិននេះ។
លោក ហ៊ុន សែន បានប្រកាសកាលពីយប់ថ្ងៃសុក្រតាមរយៈសារជាសំឡេងថា សាធារណរដ្ឋប្រជាមានិតចិននឹងផ្ដល់វ៉ាក់សាំងពីក្រុមហ៊ុន Sinopharm ចំនួន ១ លានដូសដល់កម្ពុជា។ កម្ពុជានឹងទទួលយកវ៉ាក់សាំងនេះដែលនឹងចាក់ជូនប្រជាពលរដ្ឋអាទិភាពចំនួន ៥០ ម៉ឺននាក់ដំបូង។
ការប្រកាសទទួលយកវ៉ាក់សាំងនេះ គឺជាការវិវត្តថ្មីផ្ទុយពីអ្វីដែលលោកនាយករដ្ឋមន្ត្រីធ្លាប់បានប្រកាសកាលពីពាក់កណ្ដាលខែធ្នូ ឆ្នាំ ២០២០ ថា កម្ពុជានឹងទទួល ឬទិញតែវ៉ាក់សាំងណា ដែលអង្គការសុខភាពពិភពលោក WHO ទទួលស្គាល់ក្រោមគំនិតផ្ដួចផ្ដើម COVAC តែប៉ុណ្ណោះ។ ប៉ុន្តែលោក ហ៊ុន សែន ប្រកាសជាថ្មីថា ការទទួលយកវ៉ាក់សាំងនេះមកប្រើប្រាស់នៅពេលនេះ គឺដោយសារតែមានភាពចាំបាច់។
លោកមានប្រសាសន៍ដូច្នេះថា៖ «អ្វីដែលជាភាពចាំបាច់របស់យើង យើងមិនអាចរង់ចាំតទៅទៀតបាននោះទេ។ តម្រូវការការពារជាតិការពារប្រជាជន កុំឱ្យឆ្លងរោគរាតត្បាតដ៏កាចសាហាវនេះ គឺយើងត្រូវប្រើប្រាស់នូវវ៉ាក់សាំងដែលបានប្រើប្រាស់រួចមកហើយ សម្រាប់មេដឹកនាំចិនដែលមានមនុស្សរាប់លាននាក់បានប្រើប្រាស់ និងមានប្រទេសមួយចំនួនផ្សេងទៀតរាប់ទាំងឥណ្ឌូនេស៊ី ដែលប្រធានាធិបតីឥណ្ឌូនេស៊ី ទទួលវ៉ាក់សាំងលើកដំបូងគឺជាវ៉ាក់សាំងរបស់សាធារណរដ្ឋប្រជាមានិតចិន»។
លោកនាយករដ្ឋមន្ត្រីក៏បានលើកហេតុផលមួយនៃការសម្រេចចិត្តទទួលយកវ៉ាក់សាំងចិននេះក្នុងនោះគឺភាពងាយស្រួលក្នុងការរក្សាទុកវ៉ាក់សាំងនេះ ដែលលក្ខខណ្ឌបរិយាកាសចាំបាច់គឺចន្លោះពី ២ ទៅ ៨ អង្សាសេប៉ុណ្ណោះ។ ចំណែកវ៉ាក់សាំងពីប្រទេសផ្សេងទៀតត្រូវរក្សាទុកក្នុងកម្រិតបរិយាកាសមិនក្រោម ៧០ អង្សារសេក្រោមសូន្យឡើយ។ ភាពងាយស្រួលក្នុងការដឹកជញ្ជូនពីប្រទេសចិនមកកម្ពុជា ក៏ជាកត្តាសម្រេចចិត្តមួយនៃការទទួលយកវ៉ាក់សាំងនេះ។
លោកថ្លែងថា៖ «ប៉ុន្តែជាដំបូងនេះ យ៉ាងហោចណាស់ មិត្តចិនបានជួយយើងក្នុង ១ លានដូសក្នុងទឹកចិត្តដ៏សប្បុរស និងចំណងមិត្តភាពដ៏ល្អជាមួយនឹងព្រះរាជាណាចក្រកម្ពុជា។ ខ្ញុំសូមព្រះតេជគុណ ព្រះសង្ឃគ្រប់ព្រះអង្គ និងបងប្អូនជនរួមជាតិស្ងប់អារម្មណ៍។ យើងនឹងទទួលបានវ៉ាក់សាំងប្រើប្រាស់ក្នុងពេលឆាប់ៗ»។
ពលរដ្ឋកម្ពុជាចន្លោះពី ១០ លានទៅ ១៣ លាននាក់នឹងត្រូវចាក់វ៉ាក់សាំងនេះ ពោលគឺ ៨០ ភាគរយនៃប្រជាពលរដ្ឋសរុប។ ប៉ុន្តែចំនួនប្រជាពលរដ្ឋអាចនឹងត្រូវបន្ថយទៅនៅត្រឹម ៦០ ភាគរយ។ អ្នកដែលនឹងទទួលវ៉ាក់សាំងមុនគេគឺជាមនុស្សនៅជុំវិញរូបលោកនាយករដ្ឋមន្ត្រីរួមមានទាំងកងអង្គរក្សអ្នកនៅជុំវិញព្រះមហាក្សត្រ អ្នកនៅជុំវិញប្រធានព្រឹទ្ធសភា និងរដ្ឋសភា។
ក្រៅពីនេះ អ្នកដែលមានអាទិភាពទទួលបានវ៉ាក់សាំងនេះដែរ រួមមានក្រុមគ្រូពេទ្យ គ្រូបង្រៀន កម្លាំងប្រដាប់អាវុធគ្រប់ប្រភេទ នគរបាលយុត្តិធម៌គ្រប់ផ្នែកបុគ្គលិកអនាម័យទាំងអស់ដែលពាក់ព័ន្ធនឹងការផ្ដល់សេវា អ្នករត់ម៉ូតូឌុប កង់៣ តាក់ស៊ី។ អ្នកទាំងនេះត្រូវទទួលបានវ៉ាក់សាំងនេះដោយឥតគិតថ្លៃ និងដោយស្ម័គ្រចិត្ត។ នេះបើតាមលោក ហ៊ុន សែន។
លោកនាយករដ្ឋមន្ត្រីក៏បានបញ្ជាក់ដែរថា ការសម្រេចចិត្តយកវ៉ាក់សាំងនេះ គឺជាការសម្រេចចិត្តផ្នែកនយោបាយមួយដើម្បីសុខភាពប្រជាពលរដ្ឋ។ រដ្ឋមន្ត្រីការបរទេសចិនលោក វ៉ាង យី បានចាក់តាំងពីមុនធ្វើទស្សនកិច្ចមកកម្ពុជាក្នុងខែតុលា ឆ្នាំ ២០២០។ នៅពេលនោះ ចិនបានយល់ព្រមផ្ដល់វ៉ាក់សាំងនេះឱ្យកម្ពុជា ប៉ុន្តែលោកត្រូវរង់ចាំមើលការវិវឌ្ឍបន្តិចសិន។
លោកមានប្រសាសន៍ដូច្នេះថា៖ «ខ្ញុំព្រះករុណាខ្ញុំជឿជាក់ថា វ៉ាក់សាំងនេះនឹងអាចសម្រួលឱ្យយើងដោះស្រាយបានបញ្ហាមួយផ្នែកបើទោះបីជាយើងមិនទាន់ដឹងប្រសិទ្ធភាពពិតប្រាកដ។ មិនមែនគ្រាន់តែវ៉ាក់សាំងរបស់ចិននោះទេ ប៉ុន្តែវ៉ាក់សាំងនៅគ្រប់ប្រទេសទាំងអស់ មិនទាន់ដឹងថា តើមានសុពលភាពរយៈពេលប៉ុន្មានខែ ឬប៉ុន្មានឆ្នាំ ឬ ១ ជីវិតនោះឡើយ»។
ក្នុងសារជាសំឡេងដដែលនោះលោក ហ៊ុន សែន ក៏បានប្រកាសបញ្ឈប់ការទទួលយកការបរិច្ចាគប្រាក់របស់សាធារណជន ដើម្បីទិញវ៉ាក់សាំងចាប់ពីពេលនេះតទៅ។ បើតាមសារព័ត៌មានហ្វ្រេសញូវគិតត្រឹមថ្ងៃទី ១៤ មករា ថវិកាសប្បុរសជនសម្រាប់ទិញវ៉ាក់សាំងមានចំនួនជាង ៥៦,៩ លានដុល្លារ។
កាលពីថ្ងៃទី ១៧ ខែមករាលោក ហ៊ុន សែន ក៏បានបង្ហោះសារនៅលើហ្វេសប៊ុករបស់លោកថា លោកនឹងស្ម័គ្រចិត្តទទួលចាក់វ៉ាក់សាំងនេះមុនគេ។ លោកបានសរសេរថា៖ «២ ថ្ងៃមុននេះ ខ្ញុំព្រះករុណាខ្ញុំបានទូល ប្រគេន និងជម្រាបជូនបងប្អូនជនរួមជាតិយើងហើយថា យើងបានទទួលពីសាធារណរដ្ឋប្រជាមានិតចិននូវជំនួយវ៉ាក់សាំងលើកដំបូងចំនួន ១ លានដូស។ ថ្ងៃនេះដើម្បីបង្កើតនូវជំនឿទុកចិត្តលើវ៉ាក់សាំង និងជំរុញចលនាប្រយុទ្ធប្រឆាំងកូវីដ១៩ ខ្ញុំព្រះករុណាខ្ញុំសូមប្រកាសថា វ៉ាក់សាំងដែលនឹងចាក់លើកទី ១ និងមុនគេគឺរូបខ្ញុំព្រះករុណាខ្ញុំនេះតែម្តង។ ខ្ញុំព្រះករុណាខ្ញុំ ត្រូវតែស្ថិតនៅខ្សែត្រៀមជួរមុខដែលជាទម្លាប់ធម្មតារបស់ខ្ញុំព្រះករុណាខ្ញុំរាប់សិបឆ្នាំមកហើយ។ អរគុណសន្តិភាព! អរគុណនយោបាយឈ្នះ ឈ្នះ!»។
លោក ទាវ សុធារ័ត្ន ដែលបានបញ្ចប់ការសិក្សាផ្នែកថែទាំសុខភាពពីសាកលវិទ្យាល័យមួយនៅប្រទេសថៃ ហើយបច្ចុប្បន្ននេះកំពុងបំពេញការងារជាបុគ្គលិកពេទ្យស្ម័គ្រចិត្តប្រយុទ្ធនឹងជំងឺកូវីដ១៩ បានថ្លែងថា លោកស្ម័គ្រចិត្តទទួលយកវ៉ាក់សាំងនេះ ១០០ ភាគរយ។
លោកបន្តថា៖ «ខ្ញុំគិតថា វាមិនមែនជាបញ្ហាអ្វីធំដុំទេ ដោយសារតែរាល់ថ្ងៃនេះក៏មានប្រទេសមួយចំនួនប្រើវ៉ាក់សាំងនេះ។ ជាក់ស្ដែងចិនបានចាក់វ៉ាក់សាំងនេះលើមេដឹកនាំរបស់គាត់ ហើយមេដឹកនាំផ្សេងទៀតក៏បានទទួលវ៉ាក់សាំងនេះ។ ខ្ញុំគិតថា មិនមានបញ្ហាអ្វីទេចំពោះវ៉ាក់សាំងនេះទោះបីមិនទាន់ទទួលស្គាល់ពី WHO ក៏ដោយ។ ក្ដីបារម្ភនោះគឺតិចតួចបំផុត សឹងតែថាគ្មានតែម្ដង»។
អ្នករត់ម៉ូតូកង់ ៣ ម្នាក់ឈ្មោះ យិន យ៉ុន និយាយថា លោកស្ម័គ្រចិត្តទទួលយកវ៉ាក់សាំងនេះបើរដ្ឋាភិបាលផ្ដល់ជូន។ លោកមិនមានការភ័យខ្លាចអ្វីទេ ទោះបីវ៉ាក់សាំងនេះមិនទាន់ត្រូវបានអង្គការសុខភាពពិភពលោកទទួលស្គាល់ក៏ដោយ។ ស្រដៀងគ្នានេះលោក ឆែម ប៊ុណ្ណា បុគ្គលិកម្នាក់ផ្នែកបើកបរនៃក្រុមហ៊ុនប្រមូលសំរាមស៊ីនទ្រី និយាយថា លោកក៏ស្ម័គ្រចិត្តទទួលយកវ៉ាក់សាំងនេះដែរ។
លោកនិយាយថា៖ «ខ្ញុំស្ម័គ្រចិត្តបើសិនជាមាន ខ្ញុំស្ម័គ្រចិត្តទទួលយក។ នេះជាអ្វីដែលរាជរដ្ឋាភិបាលគាត់គិតគូរពីបញ្ហាសុខភាពយើង គឺការពារជំងឺកូវីដ១៩។ ដល់អ៊ីចឹងបើសិនជាមាន វាល្អ ព្រោះការពារជាការល្អ»។
គ្រូបង្រៀនម្នាក់ដែលប្រាប់ឈ្មោះត្រឹមតែ រ៉ានី បង្រៀនថ្នាក់មត្តេយ្យនៅសាលារៀនមួយក្នុងខេត្តបន្ទាយមានជ័យបាននិយាយថា អ្នកស្រីស្ម័គ្រចិត្តទទួលយកវ៉ាក់សាំងនេះ បើសិនជាវាមានសុវត្ថិភាព។ អ្នកស្រីជឿជាក់ថា បើវ៉ាក់សាំងនេះមិនមានប្រសិទ្ធភាពលោកនាយករដ្ឋមន្ត្រី ហ៊ុនសែន នឹងមិនអនុញ្ញាតឱ្យមានការប្រើប្រាស់ទេ៕
វីដេអូ៖
