ភ្នំពេញ៖ ចំនួនអ្នកទទួលមរណភាពដោយជំងឺកូវីដ ១៩ នៅក្នុងប្រទេសកម្ពុជា បានឡើងដល់ជាង ១០០ នាក់ហើយមកដល់ថ្ងៃនេះ ខណៈដែលក្រសួងបានរកឃើញអ្នកឆ្លងរហូតដល់ ៧៣០ នាក់បន្ថែមទៀត និងមានអ្នកជាសះស្បើយចំនួន ១៦៩ នាក់។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃអាទិត្យ ទី ០២ ខែឧសភា នេះបានឱ្យដឹងថា មនុស្សចំនួន ៧៣០ នាក់ បានរកឃើញវិជ្ជមានវីរុសកូវីដ ១៩ ដោយក្នុងនោះមានអ្នកជំងឺពីរនាក់ជាអ្នកដំណើរមកពីបរទេស។
អ្នកដែលរកឃើញថ្មីនេះ មាននៅរាជធានីភ្នំពេញចំនួន ៤៥៤ នាក់ ខេត្តព្រះសីហនុ ១២៤ នាក់ ខេត្តកណ្ដាល ១០៧ នាក់ ខេត្តកំពង់ធំ ១៤ នាក់ ខេត្តតាកែវ ១១ នាក់ ខេត្តព្រៃវែង ៦ នាក់ ខេត្តត្បូងឃ្មុំ ៥ នាក់ ខេត្តកំពង់ចាម ៤ នាក់ ខេត្តសៀមរាប ២ នាក់ និងខេត្តចំនួន ៣ ផ្សេងទៀត មាន ០១ ករណីដូចគ្នាគឺ ខេត្តស្ទឹងត្រែង ពោធិ៍សាត់ និងខេត្តកំពត។
ចំពោះករណីសរុបសម្រាប់តែរាជធានីភ្នំពេញដែលមានអ្នកឆ្លងវីរុសកូវីដ ១៩ មានរហូតដល់ទៅ ១០ ០៦៩ នាក់ ហើយខេត្តបន្ទាប់ដែលមានការឆ្លងច្រើនជាងគេដែរ មានខេត្តព្រះសីហនុចំនួន ១ ៨៨៤ នាក់ និងខេត្តកណ្តាលចំនួន ១ ១៧៩ នាក់។
គិតត្រឹមព្រឹកថ្ងៃទី ០២ ខែ ឧសភា ឆ្នាំ ២០២១ នេះ អ្នកឆ្លងវីរុសកូវីដសរុបមានចំនួន ១៤ ៥២០ នាក់ អ្នកជាសះស្បើយចំនួន ៥ ៣៦៩ នាក់ អ្នកកំពុងសម្រាកព្យាបាលចំនួន ៩ ០៤០ នាក់ និងអ្នកស្លាប់បានកើនឡើងរហូតដល់ ១០៣ នាក់។
ក្រសួងសុខាភិបាលបានប្រកាសអ្នកដែលបានស្លាប់បន្ថែមចំនួន ៦ នាក់ទៀត ដោយសារជំងឺកូវីដ ១៩ នៅថ្ងៃនេះ៕