.jpg)
សមត្ថកិច្ចបង្ហាញមុខជនសង្ស័យបរទេស (កណ្ដាល) និងវត្ថុតាងថ្នាំញៀននៅក្នុងកាបូប កាលពីថ្ងៃម្សិលមិញ។ GDI
សៀមរាប/ស្ទឹងត្រែងៈ ជនបរទេស ២ នាក់និងគ្រឿងញៀនសរុបប្រមាណ ៦ គីឡូក្រាមត្រូវបានកម្លាំងសមត្ថកិច្ចកម្ពុជាបង្ក្រាបចាប់ និងឃាត់ខ្លួនបាននៅទីតាំង ២ កន្លែងផ្សេងគ្នាពីម្សិលមិញ។ នេះបើយោងតាមរបាយការណ៍ព័ត៌មាន ដែលភ្នំពេញប៉ុស្តិ៍ទទួលបានពីម្សិលមិញ។
បុរសសង្ស័យជនជាតិរូម៉ានីម្នាក់ឈ្មោះ OLARU NARCIS MANUEL ត្រូវបានកម្លាំងនគរបាលអន្តោប្រវេសន៍ ប្រចាំច្រកទ្វារអន្តរជាតិខេត្តសៀមរាបសហការជាមួយកម្លាំងនគរបាលការិយាល័យបង្ក្រាបគ្រឿងញៀននៃស្នងការដ្ឋាននគរបាលខេត្តសៀមរាប និងអង្គភាពពាក់ព័ន្ធមួយចំនួនទៀតឃាត់ខ្លួននៅវេលាម៉ោង ៩:៥៥ នាទីព្រឹកថ្ងៃទី ៦ ខែកុម្ភៈ ជាមួយនឹងថ្នាំញៀនប្រភេទមេតំហ្វេតាមីនសរុបជិត ៥ គីឡូក្រាម។ នេះបើយោងតាមរបាយការណ៍ព័ត៌មានដែលបានចុះផ្សាយនៅក្នុងបណ្ដាញសង្គមរបស់អគ្គនាយកដ្ឋាន អន្តោប្រវេសន៍ពីម្សិលមិញ។
របាយការណ៍ព័ត៌មាននោះបន្តថា ជនសង្ស័យបានលាក់ទុកនូវសារធាតុញៀនប្រភេទមេតំហ្វេតាមីន សរុបជិត ៥ គីឡូក្រាម នៅក្នុងកាបូបស្ពាយរបស់គាត់ចំនួន ៤ ផ្សេងគ្នា ដែលគ្រោងនឹងនាំចេញទៅកាន់ទីក្រុងហុងកុង ប្រទេស ចិន តាមជើងហោះហើរលេខ KA-249 (REP-HKG)។ បច្ចុប្បន្នជនសង្ស័យ និងវត្ថុតាង ត្រូវបានឃាត់ខ្លួន និងរឹបអូសប្រគល់ជូនកម្លាំងស្នងការដ្ឋាននគរបាលខេត្តសៀមរាប ដើម្បីចាត់ការបន្តទៅតាមនីតិវិធី។
លោក មាស វីរិទ្ធ អ្នកនាំពាក្យអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ភ្នំពេញប៉ុស្តិ៍យ៉ាងខ្លីថា នៅពេលនេះ សមត្ថកិច្ចជំនាញកំពុងបន្តនីតិវិធីក្នុងការសាកសួរ ដើម្បីស្រាវជ្រាវស្វែងរកជនពាក់ព័ន្ធនៅក្នុងបទល្មើសនេះ ហើយក្នុងអំឡុងពេលនេះ វាគួរត្រូវបានរក្សាជាការ «សម្ងាត់» ដើម្បីទុកឱកាសឲ្យសមត្ថកិច្ចធ្វើការងារទៅតាមជំនាញ និងតួនាទីរបស់ខ្លួន។
ដោយឡែក បុរសជនជាតិឡាវម្នាក់ឈ្មោះ ងួន ឡែ អាយុ ៤០ ឆ្នាំ ត្រូវបានកម្លាំងកងរាជអាវុធហត្ថខេត្តស្ទឹងត្រែងចាប់ខ្លួននៅវេលាម៉ោង ១០:៤២ នាទីព្រឹកថ្ងៃទី ៦ ខែកុម្ភៈ ដោយដកហូតបានគ្រឿងញៀនប្រភេទថ្នាំគ្រាប់មេតំហ្វេតាមីន (WY) សរុបជាង ៥ ០០០ គ្រាប់ឬស្មើជាង ១ គីឡូក្រាម។ នេះបើយោងតាមមន្ត្រីកងរាជអាវុធហត្ថម្នាក់ដែលចូលរួមនៅក្នុងប្រតិបត្តិការបង្ក្រាបបទល្មើសដឹកជញ្ជូនគ្រឿងញៀនឆ្លងដែនខាងលើនេះ។
លោក អ៊ុយ ខ្វៃ អនុប្រធានការិយាល័យស្រាវជ្រាវបទល្មើសនៃបញ្ជាការដ្ឋានកងរាជអាវុធហត្ថខេត្តស្ទឹងត្រែង ប្រាប់ភ្នំពេញប៉ុស្តិ៍ ម្សិលមិញថា ការឃាត់ខ្លួនបុរសជនជាតិឡាវខាងលើនេះ បានធ្វើឡើងខណៈក្រុមកម្លាំងរបស់លោកកំពុងចុះល្បាតដើម្បីការពារ និងទប់ស្កាត់រាល់បទល្មើសនៅតាមមូលដ្ឋានជាប់តំបន់ព្រំដែន កម្ពុជា-ឡាវ ហើយបានជួបប្រទះជនសង្ស័យកំពុងធ្វើដំណើរឆ្លងដែនចូលមកក្នុងទឹកដីកម្ពុជាដោយខុសច្បាប់នៅចំណុចចន្លោះបង្គោលព្រំដែន លេខ ៣៦ ស្ថិតក្នុងភូមិខាំផាន់ សង្កាត់សាមគ្គី ក្រុង-ខេត្តស្ទឹងត្រែង។
លោក អ៊ុយ ខ្វៃ បានបញ្ជាក់ថា៖ «ក្រោយការឃាត់ខ្លួន កម្លាំងសមត្ថកិច្ចយើងបានធ្វើការឆែកឆេររកឃើញថ្នាំញៀនប្រភេទគ្រាប់មេតំហ្វេតាមីន WY ចំនួន ២៧ កញ្ចប់ សរុបជាង ៥ ០០០ គ្រាប់ ឬជាង ១ គីឡូក្រាម ដែលលាក់ទុកជាប់ខ្លួនរបស់គេ។ បច្ចុប្បន្ន ជនសង្ស័យ និងវត្ថុតាងជាថ្នាំញៀនទាំងនោះ កំពុងត្រូវបានកម្លាំងសមត្ថកិច្ចជំនាញកសាងសំណុំរឿង ដើម្បីបញ្ជូនទៅកាន់តុលាការ ដើម្បីចំណាត់ការបន្តតាមនីតិវីធី»។
សមត្ថកិច្ចខេត្តស្ទឹងត្រែង និងខេត្តសៀមរាប នាពេលកន្លងមកនេះត្រូវបានគេកត់សម្គាល់ថា មានភាពសកម្មនៅក្នុងការប្រយុទ្ធប្រឆាំងបទល្មើសជួញដូរ និងដឹកជញ្ជូនគ្រឿងញៀនឆ្លងដែនដោយខុសច្បាប់។
ជនសង្ស័យជាជនជាតិបរទេស និងខ្មែរជាច្រើននាក់ ដែលបានប្រព្រឹត្តបទល្មើសទាក់ទងនឹងករណីជួញដូរ និងដឹកជញ្ជូនគ្រឿងញៀនឆ្លងដែនត្រូវបានបង្ក្រាប និងចាប់បញ្ជូនខ្លួន ព្រមទាំងថ្នាំញៀនឲ្យតុលាការផ្ដន្ទាទោសទៅតាមផ្លូវច្បាប់ជាបន្តបន្ទាប់ ដែលរហូតមកទល់ពេលនេះ ពួកគេកំពុងត្រូវបានឃុំខ្លួនក្នុងពន្ធនាគារនៅឡើយ៕
