សៀមរាបៈ ជនដៃដល់ម្នាក់ដែលជាប់សង្ស័យថា បានចាក់សម្លាប់បុរសលក់គ្រឿងបន្លាស់រថយន្តប្រព្រឹត្តកាលពីថ្ងៃទី ២៣ មេសា នៅភូមិក្រួស សង្កាត់ស្វាយដង្គុំ ក្រុង-ខេត្តសៀមរាបនោះត្រូវសមត្ថកិច្ចចាប់ខ្លួនបានហើយកាលពីថ្ងៃទី ២ ឧសភា ហើយកំពុងឃុំខ្លួននៅស្នងការដ្ឋាននគរបាលខេត្ត។
លោក ឌួង សុខា នាយការិយាល័យព្រហ្មទណ្ឌកម្រិតធ្ងន់ខេត្តសៀមរាបបានប្រាប់នៅរសៀលម្សិលមិញថា ជនសង្ស័យក្នុងករណីនេះត្រូវសមត្ថកិច្ចចាប់ខ្លួនបានហើយ បន្ទាប់ពីគេបានរត់គេចខ្លួនក្រោយធ្វើសកម្មភាព។
ប៉ុន្តែលោកមិនបានប្រាប់ពីឈ្មោះជនសង្ស័យរូបនេះទេដោយអះអាងថាសមត្ថកិច្ចកំពុងបន្តស្វែងរកបក្ខពួករបស់គេទៀត។
លោកថ្លែងប្រាប់ថា៖ «ជនដៃដល់នោះយើងចាប់បានហើយ ប៉ុន្តែយើងសូមលាក់អត្តសញ្ញាណជនល្មើសរូបនេះសិន ព្រោះទុកឱកាសឲ្យសមត្ថកិច្ចស្រាវជ្រាវបន្តទៀត»។
បើតាមលោក សុខា ជនសង្ស័យត្រូវសមត្ថកិច្ចចាប់ខ្លួននៅម៉ោងប្រមាណជា ១០ យប់នៅក្នុងស្រុកសូទ្រនិគម ខេត្តសៀមរាប។
គួររំឭកដែរថាកាលពីថ្ងៃទី ២៥ ខែមេសាឆ្នាំ ២០១៨ បន្ទាប់ពីកើតហេតុបាន ២ ថ្ងៃ សមត្ថកិច្ចបានស្រាវជ្រាវ និងកោះហៅបុរសម្នាក់ឈ្មោះ ព្រហ្ម សុព្រឹក្ស អាយុ ២៨ ឆ្នាំរស់នៅចំណុចព្រៃគុយក្នុងឃុំអម្ពិល ស្រុកប្រាសាទបាគងខេត្តសៀមរាបដើម្បីបំភ្លឺក្នុងនាមជាសាក្សី ប៉ុន្តែមិនមែនជាជនដៃដល់ពិតប្រាកដទេ។
ដោយឡែក បុរសរងគ្រោះឈ្មោះ ពិត បារាំង អាយុ ៤៥ ឆ្នាំរស់នៅក្នុងភូមិក្រួស សង្កាត់ស្វាយដង្គុំ ក្រុងសៀមរាបជាអ្នកលក់គ្រឿងបន្លាស់រថយន្ត។ គាត់ត្រូវបានជនល្មើសចាក់សម្លាប់ដោយកាំបិតចុងស្រួច។
ក្នុងអំពើមនុស្សឃាតនោះសមត្ថកិច្ចបានចុះធ្វើកោសល្យវិច័យដោយបង្ហាញថា សកម្មភាពឃាតកម្មនេះកើតឡើងក្នុងចន្លោះម៉ោង ២១ នៅថ្ងៃទី ២៣ ខែមេសា ឆ្នាំ ២០១៨ ខណៈមានការភ្ញាក់ផ្អើលនៅថ្ងៃទី ២៤ ខែមេសា ៕