ព្រះសីហនុៈ រថយន្តស្ទូចខា្នតយក្យ ២ គ្រឿង ត្រូវបានមន្ត្រីជំនាញនាំចូលទៅកាន់ការដ្ឋានសំណង់អគារមួយកន្លែងនៅក្នុងភូមិ ២ សង្កាត់លេខ ៤ ក្រុងព្រះសីហនុដើម្បីជួយស្ទូចយកចេញនូវដងស្ទូចនៃគ្រឿងចក្រ TowerCrane ដែលបានបាក់គងលើដំបូលអគារកាលពីថ្ងៃសៅរិ៍ ខណៈពលរដ្ឋនៅក្បែរនោះត្រូវបានអាជ្ញាធរឲ្យចាកចេញសិនដើម្បីបញ្ចៀសគ្រោះថ្នាក់។
លោក សំ ប្រាក់ នាយនគរបាលប៉ុស្តិ៍សង្កាត់លេខ ៤ បានប្រាប់ភ្នំពេញប៉ុស្តិ៍ពីម្សិលមិញថា ថ្វីបើពុំមានអ្នកគ្រោះថ្នាក់ក្នុងពេលបាក់ដងស្ទូចគ្រឿងចក្រ TowerCrane នោះក្ដី ប៉ុន្តែស្ថានភាពដ៏គួរឲ្យគ្រោះថ្នាក់នេះបានធ្វើឲ្យពលរដ្ឋនៅជិតការដ្ឋាននោះព្រួយបារម្ភខ្លាំង។
លោកថា៖ «យើងមិនដឹងថាតើវានឹងមានបញ្ហាអ្វីកើតមានឡើងទៀតនោះទេខណៈក្រុមមន្ត្រីជំនាញកំពុងបើកប្រតិបត្តិការស្ទូចទាញយកដងស្ទូចគ្រឿងចក្រដែលបាក់នោះចេញពីដំបូលសំណង់អគារ ដូច្នេះយើងចាំបាច់ស្នើឲ្យពលរដ្ឋដែលរស់នៅជិតនោះប្រមាណ ៣០-៤០ គ្រួសារ ចាកចេញពីផ្ទះពួកគេបណ្ដោះអាសន្នសិន ដើម្បីចៀសវាងគ្រោះថ្នាក់កើតឡើង»។
លោក អេង សុកប ជាពលរដ្ឋរស់នៅជិតកន្លែងកើតហេតុបានប្រាប់ភ្នំពេញប៉ុស្តិ៍ថា ក្រុមគ្រួសារគាត់បានរត់ចេញពីផ្ទះ បន្ទាប់ពីឃើញដងស្ទូចគ្រឿងចក្រ Tower Crane បាក់គ្រេចគងលើដំបូលអគារ។
លោកបានថ្លែងថា៖ «ខ្ញុំពិតជាភ័យខ្លាចខ្លាំងនៅពេលឃើញដងស្ទូចនៃគ្រឿងចក្រនោះបានទ្រេត ហើយកាច់កបាក់នៅក្នុងលម្ហអាកាសក្នុងកម្ពស់ជាង ២០ ម៉ែត្រ។ ប៉ុន្តែសំណាងល្អដែលវាមិនរេបាក់ធ្លាក់មកលើផ្ទះរបស់ពួកយើង ដោយសារផ្នែកដែលមានភ្ជាប់ដុំថ្មបានទាញទៅផ្នែកម្ខាងទៀតនៃសំណង់អគារនោះ បណ្ដាលឲ្យបាក់គងបន្ទប់បញ្ជាដងស្ទូចនៅលើដំបូលអគារ មិនធ្លាក់ចុះមកដី»។
ចំណែកលោក ស៊ឹមសាមឿន មេភូមិ ២ បានប្រាប់ភ្នំពេញប៉ុស្តិ៍ថា មុនដំបូងគាត់ស្មានតែបាក់ស្រុតសំណង់អគារដ៏ធំនោះ ព្រោះមើលពីចម្ងាយឃើញដងស្ទូចបាក់ស្រុតចុះមកក្រោម។
លោកថ្លែងថា៖ «តាមមន្ត្រីបច្ចេកទេស ករណីបាក់គ្រេច ក ដងស្ទូចនៃគ្រឿងចក្រខាងលើនេះបណ្ដាលមកពីមានការដោះទម្លាក់ជើងទម្រនៃដងស្ទូចខុសលក្ខណៈបច្ចេកទេស»។
អគ្គលេខាធិការសហព័ន្ធសហជីពកម្មករសំណង់ និងព្រៃឈើកម្ពុជាលោក យ៉ាន់ ធី បានប្រាប់ភ្នំពេញប៉ុស្តិ៍ថា ករណីនេះបានបង្កឲ្យប៉ះពាល់ដល់អារម្មណ៍ពលរដ្ឋរាប់សិបគ្រួសារដែលនៅជិតការដ្ឋាននោះ។
លោកថា៖ «ជាធម្មតា Tower Crane មិនងាយបាក់ទេ ប្រសិនបើប្រើប្រាស់ត្រឹមត្រូវតាមស្ដង់ដាបច្ចេកទេស និងមានការត្រួតពិនិត្យគុណភាពនៃឧបករណ៍នោះបានត្រឹមត្រូវ។ ប៉ុន្តែករណីនេះយើងយល់ថា ជាផ្នែកមួយនៃការធ្វេសប្រហែសរបស់ក្រុមការងារបច្ចេកទេស និងអ្នកគ្រប់គ្រងការដ្ឋាន»៕