.jpg)
ពលរដ្ឋដែលមានជម្លោះដីធ្លីនៅពេលតវ៉ាកន្លងមក។ រូបថត សហការី
ឧត្តរមានជ័យ: សាលាដំបូងខេត្តឧត្តរមានជ័យបានសម្រេចផ្តន្ទាទោសពលរដ្ឋ ៣ នាក់ ដែលជាតំណាងពលរដ្ឋ ៨៩ គ្រួសារ រស់នៅភូមិជើងភ្នំ ឃុំត្រពាំងប្រិយ៍ ស្រុកអន្លង់វែង ឱ្យជាប់ពន្ធនាគារក្នុងម្នាក់ៗ ១ ឆ្នាំ និងពិន័យជាប្រាក់ចំនួន ៤ លានរៀលពាក់ព័ន្ធរឿងជម្លោះដីធ្លីប្រមាណ ៦០០ ហិកតាដែលត្រូវបានប្តឹងដោយលោកឧត្តមសេនីយ៍ទោ អ៊ុក គឹមលី។
លោក នឿន សាវុធ តំណាងពលរដ្ឋចំនួន ៨៩ គ្រួសារ ដែលជាអ្នករងបណ្ដឹងម្នាក់ក្នុងចំណោម ៣ នាក់ថ្លែងពីថ្ងៃទី ១១ ខែវិច្ឆិកា ថា ការសម្រេចរបស់សាលាដំបូងខេត្តឧត្តរមានជ័យពិតជាអយុត្តិធម៌ខ្លាំងណាស់ ហើយពួកលោកគ្រោងដាក់បណ្ដឹងប្ដឹងជំទាស់នឹងការសម្រេចនេះទៅសាលាឧទ្ធរណ៍បន្តទៀត ដើម្បីស្វែងរកយុត្តិធម៌។ លោកបន្តថា ការសម្រេចរបស់តុលាការធ្វើឡើងតាមបណ្ដឹងរបស់ឈ្មោះ ម៉ែន សារ៉េត និងឈ្មោះ ទៀង ឡាយ ដែលជាអ្នកចាំចម្ការឱ្យលោកឧត្តមសេនីយ៍ទោ អ៊ុក គឹមលី តួនាទីជានាយរងទីចាត់ការការងារព្រំដែននៃអគ្គបញ្ជាការដ្ឋានកងទ័ពជើងគោក។
លោក សាវុធ អះអាងថា៖ «ដីប្រមាណ ៦០០ ហិកតា ជាកម្មសិទ្ធិរបស់ពលរដ្ឋចំនួន ៨៩ គ្រួសារ សម្រាប់អាស្រ័យផលជាយូរឆ្នាំមកហើយ ស្រាប់តែនៅឆ្នាំ ២០-១៧ លោកផ្កាយ ២ អ៊ុក គឹមលី បានយកគ្រឿងចក្រមកឈូសឆាយដីពលរដ្ឋ ប៉ុន្ដែពលរដ្ឋបាននាំគ្នាតវ៉ា និងរារាំងមិនឱ្យឈូសឆាយ ហើយត្រាក់ទ័រក៏ត្រឡប់ទៅវិញ»។ រហូតដល់ឆ្នាំ ២០១៩ ស្រាប់តែគេដាក់ត្រាក់ទ័រមកឈូសឆាយម្ដងទៀត ហើយពលរដ្ឋក៏បានរារាំងទៀត ក្រោយមករូបលោក និងតំណាងពលរដ្ឋ ២ នាក់ទៀតក៏មានឈ្មោះត្រូវតុលាការកោះហៅជាច្រើនលើក។
បើតាមដីការបស់តុលាការតំណាងពលរដ្ឋទាំង ៣ នាក់ដែលត្រូវបានតុលាការផ្តន្ទាទោសមានឈ្មោះ សឿន ប៉ាច ភេទស្រី អាយុ ៤៤ ឆ្នាំ វ៉ាន់ ចំរើន ភេទប្រុស អាយុ ៤៩ ឆ្នាំ និង នឿន សាវុធ ភេទប្រុស អាយុ ៥០ ឆ្នាំ។
លោក សឿន ប៉ាច តំណាងពលរដ្ឋម្នាក់ទៀតថ្លែងថា ដោយសារពួកលោកបានរារាំងសកម្មភាពឈូសឆាយដីពលរដ្ឋនេះទើបពួកលោកត្រូវបានអ្នកចាំចម្ការឱ្យលោកផ្កាយ ២ អ៊ុក គឹមលី ប្ដឹងឡើងតុលាការ។ លោកថា៖ «ពួកខ្ញុំមិនសុខចិត្តនឹងការសម្រេចរបស់តុលាការខេត្តឧត្តរមានជ័យទេ គឺពួកខ្ញុំនឹងប្ដឹងទៅសាលាឧទ្ធរណ៍បន្តទៀត។ ពួកខ្ញុំពិតជារងអយុត្តិធម៌ខ្លាំងណាស់។ សូមលោកតុលាការរកយុត្តិធម៌ជូនពលរដ្ឋទន់ខ្សោយផង»។
លោក ហែល ឆេងហុង អ្នកនាំពាក្យសាលាដំបូងខេត្តឧត្តរមានជ័យបានថ្លែងនៅថ្ងៃទី ១១ វិច្ឆិកាថា បន្ទាប់ពីបានបើកសវនាការលោកចៅក្រម ចន សុភ័ក្រ បានសម្រេចផ្តន្ទាទោសឈ្មោះ នឿន សាវុធ ឈ្មោះ វ៉ាន់ ចំរើន និងឈ្មោះ សឿន ប៉ាច ឱ្យជាប់ពន្ធនាគារក្នុងម្នាក់ ១ ឆ្នាំ និងពិន័យជាប្រាក់ចំនួន ៤ លានរៀលប៉ុន្ដែទោសជាប់ពន្ធនាគារត្រូវបានព្យួរទាំងអស់។
លោកបញ្ជាក់ថា៖ «តុលាការបានសម្រេចផ្តន្ទាទោសពួកគាត់ហើយ ប៉ុន្ដែប្រសិនបើពួកគាត់មិនសុខចិត្តទេ អាចប្ដឹងបន្តទៅសាលាឧទ្ធរណ៍ ដើម្បីជំទាស់។ បើពួកគាត់ចង់ប្ដឹងទៅសាលាឧទ្ធរណ៍អាចមកជួបខ្ញុំ ហើយខ្ញុំនឹងប្រាប់ពីនីតិវិធីបំពេញបែបបទដាក់ពាក្យទៅសាលាឧទ្ធរណ៍ទៀត»។
លោក ហោ ជិនវិរៈយុទ្ធ អភិបាលស្រុកអន្លង់វែងបានថ្លែងថា លោកមិនទាន់បានទទួលព័ត៌មានពីការសម្រេចរបស់តុលាការចំពោះពលរដ្ឋទាំង ៣ នាក់នេះទេ។ ប៉ុន្ដែលោកក៏មិនអាចជួយដោះស្រាយជូនពួកគាត់បានដែរ ព្រោះសំណុំរឿងត្រូវបានបញ្ជូនទៅដល់ដៃតុលាការ។
លោកបញ្ជាក់ថា៖ «យើងបានបង្កើតគណៈកម្មការដោះស្រាយទំនាស់នេះជាច្រើនឆ្នាំហើយ ប៉ុន្ដែភាគីទាំង ២ នៅតែមិនព្រមទទួលយកការសម្របសម្រួលរបស់អាជ្ញាធរ ទើបពួកគាត់នាំគ្នាប្ដឹងទៅតុលាការ ដើម្បីរកអ្នកខុស អ្នកត្រូវ»។
លោកលើកឡើងថា៖ «បើយើងសួរខាងពលរដ្ឋ គាត់ថា គាត់មករស់នៅយូរឆ្នាំហើយ គឺដីនេះជាកម្មសិទ្ធិពួកគាត់ ប៉ុន្ដែមិនទាន់មានប្លង់រឹងទេ រីឯភាគីម្ខាងទៀតគាត់ថា ពលរដ្ឋនាំគ្នាមករំលោភយកដីគាត់។ អ៊ីចឹងហេតុផលមានរៀងៗខ្លួន ពួកគាត់មិនទទួលយកអនុសាសន៍អាជ្ញាធរទេ»។
ភាគីជម្លោះម្ខាងទៀតគឺលោក អ៊ុក គឹមលី មិនទាន់អាចស្វែងរកប្រភពទាក់ទង សុំការបញ្ជាក់បន្ថែមជុំវិញករណីនេះបានទេ។
លោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) ដែលបានតាមដានដំណើរការរឿងក្តីនេះបានថ្លែងថា ការសម្រេចរបស់តុលាការខេត្តឧត្តរមានជ័យនេះគឺជារឿងអយុត្តិធម៌ សម្រាប់ប្រជាពលរដ្ឋដែលជាអ្នករងគ្រោះពិតប្រាកដក្នុងរឿងទំនាស់ដីធ្លី។
លោកបន្តថា តុលាការត្រូវតែធ្វើការស៊ើបអង្កេតអង្គហេតុឱ្យបានច្បាស់លាស់មុនធ្វើការសម្រេចផ្តន្ទាទោសពលរដ្ឋទាំងអយុត្តិធម៌បែបនេះ។ លោកបញ្ជាក់ថា៖ «ខ្ញុំគិតថា ការសម្រេចនេះគឺអយុត្តិធម៌សម្រាប់ពលរដ្ឋរងគ្រោះពិតប្រាកដ ហើយខ្ញុំអំពាវនាវឱ្យពួកគាត់បន្តដាក់ពាក្យប្ដឹងទៅសាលាឧទ្ធរណ៍ទៀត រីឯមេធាវី គឺខ្ញុំនឹងជួយគាត់»៕
