.jpg)
បុរសដែលតុលាការឃុំខ្លួន ពីថ្ងៃទី ២៦ ឧសភា។ រូបថត កងរាជអាវុធហត្ថ
ភ្នំពេញៈ សាលាដំបូងរាជធានីភ្នំពេញកាលពីថ្ងៃទី ២៦ ខែឧសភា បានសម្រេចឃុំខ្លួនបុរសម្នាក់ជាបណ្តោះអាសន្នក្នុងមណ្ឌលអប់រំកែប្រែទី១ (ម១) រហូតដល់មានសម្រេចសាជាថ្មី ពាក់ព័ន្ធនឹងករណីគេចវេះពីការព្យាបាល ឬគេចចេញពីទីកន្លែងព្យាបាលជំងឺកូវីដ ១៩ ប្រព្រឹត្តនៅខណ្ឌដង្កោ រាជធានីភ្នំពេញកាលពីថ្ងៃទី ២២ ឧសភា កន្លងទៅ។
តាមដីកាបង្គាប់ឱ្យឃុំខ្លួនរបស់លោក រស់ សាម៉ឺឌី ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី ២៦ ឧសភា ឆ្នាំ ២០២១ ឱ្យដឹងថា ឈ្មោះ សៀ ស៊ាន់ ភេទប្រុស អាយុ ២៨ ឆ្នាំ ជនជាតិខ្មែរមានទីកន្លែងកំណើតភូមិចំបក់កោង ឃុំទួលព្រិច ស្រុកអង្គស្នួល ខេត្តកណ្តាលបានគេចវេះពីការព្យាបាល ឬគេចចេញពីទីកន្លែងព្យាបាលប្រព្រឹត្តនៅចំណុចមណ្ឌលព្យាបាលជំងឺកូវីដ ១៩ កម្រិតស្រាលទួលពង្រមណ្ឌលលេខ ៩ ផ្លូវលេខ ១៦៨៣ ភូមិសំបូរ សង្កាត់ដង្កោ រាជធានីភ្នំពេញ កាលពីថ្ងៃទី ២២ ខែ ឧសភា ឆ្នាំ ២០២១។
លោក រស់ សាម៉ឺឌី បានចោទ ឈ្មោះ សៀ ស៊ាន់ ពីបទគេចវេះពីការព្យាបាល ឬគេចចេញពីទីកន្លែងព្យាបាលជំងឺកូវីដ ១៩ តាមបញ្ញត្តិមាត្រា ៨ នៃច្បាប់ស្តីពីវិធានការឆ្លងរាលដាលនៃជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងៗ បន្ទាប់ពីបុរសខាងលើត្រូវបានព្យាបាលជាសះស្បើយពីជំងឺកូវីដ ១៩។
តាមរបាយការណ៍របស់កងរាជអាវុធហត្ថរាជធានីភ្នំពេញ កាលពីថ្ងៃទី ២៧ ខែឧសភា បង្ហាញថា បុរសខាងលើបានព្យាយាមរត់ចេញពីមណ្ឌលព្យាបាលជំងឺកូវីដ ១៩ បង្កការភ្ញាក់ផ្អើលដល់ក្រុមគ្រូពេទ្យដែលប្រចាំការក្នុងមណ្ឌលគ្រប់ៗគ្នាកាលពីល្ងាច ថ្ងៃទី ២២ ខែ ឧសភា ឆ្នាំ ២០២១។
បន្ទាប់ពីបានទទួលការស្នើសុំឱ្យជួយអន្តរាគមន៍ពីក្រុមគ្រូពេទ្យ កម្លាំងអន្តរាគមន៍កងរាជអាវុធហត្ថរាជធានីភ្នំពេញបានចេញស្រាវជ្រាវរុករកមុខសញ្ញាអស់រយៈពេលប្រមាណ ១៥ នាទី ក៏រកឃើញអ្នកជំងឺកូវីដ ១៩ ម្នាក់នោះ នៅចំណុចផ្លូវ ៣៧១ កែងនឹងផ្លូវ ២០០២ ទើបសមត្ថកិច្ចកងរាជអាវុធហត្ថរាជធានីភ្នំពេញដែលបានត្រៀមរួចជាស្រេចជាមួយសម្លៀកបំពាក់ការពារមេរោគ និងឧបករណ៍ចាប់ពីចម្ងាយស្វ័យប្រវត្តិឃាត់ខ្លួនអ្នកជំងឺកូវីដ ១៩ នោះបានភ្លាមៗតែម្តង។
យោងតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ ការរត់គេចចេញពីមណ្ឌលព្យាបាលត្រូវប្រឈមនឹងការផ្តន្ទាទោសដាក់ពន្ធនាគារពី ១ ឆ្នាំទៅ ៥ ឆ្នាំ និងពិន័យជាប្រាក់ពី ៥ លានរៀល ទៅ ២០ លានរៀល តែបើមានការចម្លងដល់អ្នកដទៃនឹងត្រូវផ្តន្ទាទោសដាក់ពន្ធនាគារពី ៥ ឆ្នាំទៅ ១០ ឆ្នាំ៕
