ភ្នំពេញៈ តុលាការបារាំងបានសម្រេចចោទប្រកាន់លោក សម រង្ស៊ី អតីតប្រធានគណបក្សសង្គ្រោះជាតិពីបទបរិហារកេរ្តិ៍ជាសាធារណៈ ចំពោះបុគ្គលតាមបណ្ដឹងរបស់លោកនាយករដ្ឋមន្ត្រី ហ៊ុន សែន និងលោក ឌី វិជ្ជា ជុំវិញការចោទប្រកាន់លោក ហ៊ុន សែន ថាជាអ្នកបញ្ជាឱ្យមានការសម្លាប់លោក ហុក ឡង់ឌី អតីតស្នងការនគរបាលជាតិ។
លោក គី តិច មេធាវីតំណាងដោយអាណត្តិរបស់រដ្ឋាភិបាលបានប្រាប់ភ្នំពេញប៉ុស្ដិ៍ម្សិលមិញថា យោងតាមលិខិតមួយដែលទទួលបានពីក្រុមមេធាវីនៅបារាំងបញ្ជាក់ថា កាលពីថ្ងៃទី ៨ ខែមិថុនា ចៅក្រមស៊ើបសួរនៃតុលាការព្រហ្មទណ្ឌទីក្រុងប៉ារីសបានសម្រេចដាក់លោក សម រង្ស៊ី ឱ្យស្ថិតនៅក្រោមការចោទប្រកាន់អំពីបទបរិហារកេរ្តិ៍។
លោកថា៖ «សូមបញ្ជាក់ជូនថា មេធាវីរដ្ឋាភិបាលកម្ពុជាយើងបានទទួលព័ត៌មាននេះ តាមលិខិតជាភាសាបារាំងមានប្រថាប់ត្រាច្បាស់លាស់អំពីការិយាល័យមេធាវីនៅបារាំងអំពីការចោទប្រកាន់ទៅលើបុគ្គល សម រង្ស៊ី ហើយនេះគឺជាការពិត»។
នៅក្នុងលិខិតមួយទំព័រ ដែលបកប្រែពីភាសាបារាំងបញ្ជាក់ដែរថា ការចោទប្រកាន់លោក សម រង្ស៊ី នេះ ត្រូវបានធ្វើចំពោះគ្រប់ពាក្យសម្ដីចោទប្រកាន់ទាំងអស់ដែលបានលើកឡើងនៅក្នុងពាក្យបណ្ដឹងរបស់លោក ហ៊ុន សែន ចុះថ្ងៃទី ២០ ខែសីហា ឆ្នាំ ២០១៩។ លិខិតបន្តថា ការបញ្ជូនខ្លួនលោក សម រង្ស៊ី ទៅតុលាការព្រហ្មទណ្ឌទីក្រុងប៉ារីស ដើម្បីកាត់ទោស គឺជារឿងមិនអាចចៀសផុតឡើយ។ «ចៅក្រមស៊ើបសួរបារាំងបានចាត់ទុកថា មានតម្រុយ និងភ័ស្ដុតាងគ្រប់គ្រាន់ និងស៊ីសង្វាក់ ដែលអាចបញ្ជាក់ថាបុគ្គល សម រង្ស៊ី បានប្រព្រឹត្តបទល្មើសដែលបានចោទប្រកាន់ខាងលើ។ សូមបញ្ជាក់ថា បុគ្គល សម រង្ស៊ី មិនបានធ្វើការជំទាស់នឹងពាក្យសម្ដីរបស់ខ្លួន ដែលត្រូវបានចោទប្រកាន់នោះទេ»។
លោក ហ៊ុន សែន និងលោក ឌី វិជ្ជា អគ្គស្នងការរងនគរបាលជាតិ និងជាកូនប្រសាលោក ហ៊ុន សែន បានប្ដឹងលោក សម រង្ស៊ី អតីតប្រធានគណបក្សសង្គ្រោះជាតិទៅតុលាការបារាំង បន្ទាប់ពីលោក សម រង្ស៊ី បានលើកឡើងថា លោក ហ៊ុន សែន គឺជាអ្នកសម្លាប់លោក ហុក ឡង់ឌី តាមរយៈការបញ្ជាឱ្យបំផ្ទុះឧទ្ធម្ភាគចក្រដែលលោក ហុក ឡង់ឌី បានជិះចេញពីទីក្រុងភ្នំពេញទៅកាន់ខេត្តស្វាយរៀងកាលពីឆ្នាំ ២០០៨។
លោក សម រង្ស៊ី ថែមទាំងបានលើកឡើងទៀតថា លោក ឌី វិជ្ជា កូនប្រុសរបស់លោក ហុក ឡង់ឌី និងលោក ស ខេង រដ្ឋមន្ត្រីក្រសួងមហាផ្ទៃកំពុងរៀបចំផែនការ ដើម្បីសងសឹកលោក ហ៊ុន សែន។
នៅក្នុងសារតាមរយៈអ៊ីមែលផ្ញើមកភ្នំពេញប៉ុស្ដិ៍ពីថ្ងៃម្សិលមិញលោក សម រង្ស៊ី មិនឆ្លើយតបទៅនឹងការសម្រេចរបស់តុលាការទីក្រុងប៉ារីស ដែលបានសម្រេចចោទប្រកាន់លោកតាមបណ្ដឹងរបស់លោក ហ៊ុន សែន និងលោក ឌី វិជ្ជា ឡើយ។ ប៉ុន្តែលោកបញ្ជាក់ថា លោក ហ៊ុន សែន បានធ្លាក់ចូលក្នុងអន្ទាក់របស់លោកហើយបានផ្ដល់ឱកាសមាសដ៏កម្រឱ្យលោកបានលាតត្រដាងអំពីអំពើឧក្រិដ្ឋរបស់លោក ហ៊ុន សែន និងក្រុមគ្រួសារលោក ហ៊ុន សែន នៅចំពោះមុខតុលាការឯករាជ្យមួយ។
លោក សម រង្ស៊ី បញ្ជាក់ថាអំពើឧក្រិដ្ឋដែលលោកត្រូវលាតត្រដាងនោះ ដូចជាអំពើភេរវកម្មគប់គ្រាប់បែកដៃនៅភ្នំពេញនៅថ្ងៃទី ៣០ ខែមីនា ឆ្នាំ ១៩៩៧ ការលួចសម្លាប់អ្នកស្រី ពិសិដ្ឋ ពិលិកា កាលពីឆ្នាំ ១៩៩៩ ពីសំណាក់ភរិយាលោក ហ៊ុន សែន គឺលោកស្រី ប៊ុន រ៉ានី ការធ្វើឃាតលោក ជា វិជ្ជា លោកឈុត វុទ្ធី និងលោក កែម ឡី ជាដើម។ «តាមការពិត ពាក្យបណ្តឹងរបស់ ហ៊ុន សែន នេះនាំមកនូវក្តីសង្ឃឹមឲ្យយើងវិញទេ ក្នុងការតស៊ូរបស់យើង ដើម្បីបញ្ចប់និទ្ទណ្ឌភាពនៅកម្ពុជា»។
ប៉ុន្តែលោក ផៃ ស៊ីផាន អ្នកនាំពាក្យរដ្ឋាភិបាលបញ្ជាក់ថា អ្វីដែលលោក សម រង្ស៊ី ចង់លាតត្រដាងនោះ គឺជារឿងបំភ្លៃ ដើម្បីធ្វើឱ្យមានការយល់ច្រឡំ ខណៈលោកថា អ្វីដែលតុលាការបារាំងបានចោទប្រកាន់នៅពេលនេះគឺឈរនៅលើអង្គហេតុ។ «ឥរិយាបថរបស់ សម រង្ស៊ី គឺជាអ្នកនយោបាយមួយដែលគ្មានកិត្តិយស ក្រៅតែពីការបំភ្លៃ និងប្រឌិតដើម្បីធ្វើឱ្យគេយល់ច្រឡំ អាហ្នឹងគឺជាជំនាញរបស់គាត់ហើយ ហើយគាត់និយាយថា ជាឱកាសមាសនោះហើយគឺជាឱកាសមាសប៉ុណ្ណោះឯង!»៕
វីដេអូ៖