.jpg)
រ៉ាត់ រ័ត្នមុនី ផលិតករវីដេអូឯកសារមានចំណងជើងថា «ម្តាយខ្ញុំ លក់ខ្ញុំ» ត្រូវបានចាប់ខ្លួននៅក្នុងប្រទេសថៃនៅថ្ងៃទី ៧ ខែ ធ្នូ ឆ្នាំ ២០១៨។ សហការី
ភ្នំពេញៈ មន្ត្រីជាន់ខ្ពស់នគរបាលជាតិបានអះអាងថា សមត្ថកិច្ច និងក្រុមជំនាញស្រាវជ្រាវបានស្រាវជ្រាវឃើញថា វីដេអូឯកសារ «ម្តាយខ្ញុំ លក់ខ្ញុំ»បានធ្វើឲ្យប៉ះពាល់យ៉ាងខ្លាំងដល់កិត្តិយសប្រទេសជាតិ ប្រពៃណី និងស្ត្រីខ្មែរ ហើយបានអះអាងថាអាជ្ញាធរថៃនឹងប្រគល់ជនសង្ស័យដែលផលិតវីដេអូឯកសារនេះមកកម្ពុជាវិញក្នុងពេលឆាប់ៗនេះ។
ជនសង្ស័យម្នាក់ឈ្មោះ រ៉ាត់ រ័ត្នមុនី ដែលជាប់ទាក់ទងការផលិតវីដេអូឯកសារមានចំណងជើងថា «ម្តាយខ្ញុំ លក់ខ្ញុំ» ត្រូវបានចាប់ខ្លួននៅក្នុងប្រទេសថៃនៅថ្ងៃទី ៧ ខែធ្នូ ឆ្នាំ ២០១៨ តាមសំណើរបស់អាជ្ញាធរកម្ពុជា បន្ទាប់ពីសមត្ថកិច្ច និងក្រុមជំនាញកម្ពុជាបានស្រាវជ្រាវរកឃើញថា ការផលិតភាពយន្តឯកសារមួយនេះគ្មានការពិត និងបានធ្វើឲ្យប៉ះពាល់យ៉ាងខ្លាំងដល់កិត្តិយសប្រទេសកម្ពុជា និងស្ត្រីខ្មែរបន្ទាបបន្ថោកដល់ស្ត្រីជាមាតាដែលបានលក់ព្រហ្មចារីកូនស្រីរបស់ខ្លួន។
ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិបានថ្លែងប្រាប់កាសែតភ្នំពេញប៉ុស្តិ៍ថា អាជ្ញាធរនៃប្រទេសថៃនឹងប្រគល់ជនសង្ស័យ រ៉ាត់ រ័ត្នមុនី ឲ្យសមត្ថកិច្ចកម្ពុជានាពេលខាងមុខដើម្បីធ្វើការស្រាវជ្រាវ និងសាកសួរអំពីការពិតក្នុងការផលិតវីដេអូរឿង «ម្តាយខ្ញុំ លក់ខ្ញុំ»។
លោកបញ្ជាក់ថា៖ «យើងបានទាក់ទងទៅប្រទេសថៃដើម្បីចាប់បញ្ជូនមកឲ្យអាជ្ញាធរយើង។ អាជ្ញាធរថៃបានសហការជាមួយយើង ហើយគេបានចាប់ខ្លួន។ គេនឹងបញ្ជូនមកយើងប្រហែលជាមិនយូរទេ អាជ្ញាធរថៃបានឃាត់ខ្លួនគាត់ប៉ុន្មានថ្ងៃហើយ»។
លោកបន្ថែមថាវីដេអូឯកសារនេះគឺជាការប្រឌិតបានធ្វើឲ្យប៉ះពាល់ប្រពៃណីកម្ពុជា ប៉ះពាល់ដល់កិត្តិយសប្រទេសជាតិខ្លាំង ហើយវីដេអូឯកសារនេះហាក់បីដូចមានចេតនាវាយប្រហាទៅលើគោលនយោបាយរដ្ឋាភិបាលកម្ពុជាក្នុងការប្រឆាំងការជួញដូរ ហើយបានលើកឡើងថាបើយោងតាមម្តាយ និងកូនស្រីឈ្មោះ កែវ ម៉ាឡៃ និងឈ្មោះ ឃៀង ស្រីម៉ិច បានស្នើឲ្យសមត្ថកិច្ចជួយរកយុត្តិធម៌ឲ្យពួកគេ បន្ទាប់ពីពួកគេបានឃើញមានឃ្លីបវីដេអូឯកសារ «ម្តាយខ្ញុំ លក់ខ្ញុំ»។
ពួកគេបានប្រាប់សមត្ថកិច្ចថា ឈ្មោះ រ៉ាត់ រ័ត្នមុនី បានប្រាប់ពួកគេទាំង ២ ថា ការថតនោះគឺក្នុងរឿងប្រទេសខ្មែរក្រោយរបបប៉ុលពតហើយ ការល្បួងឲ្យពួកគេថតរឿងនោះទៀតក៏មានជនបរទេស ៤ រូបដែលបានជួយថត និងរៀបចំឈុតឆាក។
លោក គឹមខឿន បញ្ជាក់ថា៖ «នៅពេលដែលឃើញឃ្លីបវីដេអូ «ម្តាយខ្ញុំ លក់ខ្ញុំ» គាត់ខកចិត្តខ្លាំងណាស់ហើយគាត់បានប្តឹងមកសមត្ថកិច្ចយើងជួយរកយុត្តិធម៌លុបលាងកិត្តិយសគាត់វិញ ពីព្រោះនេះមិនមែនភាពយន្តឯកសារ ប្រទេសកម្ពុជាក្រោយរបបប៉ុលពតទោះបីយើងមិនទាន់សន្និដ្ឋានថាយ៉ាងម៉េចក៏ប៉ុន្តែយើងដឹងថារឿងនេះវាពាក់ព័ន្ធជាមួយឯកសារមួយចំនួនដែលយើងប្រមូលបាន និងស៊ើបអង្កេត និងវាយតម្លៃរបស់យើង និងព័ត៌មានដែលសាក្សីផ្តល់ជូនយើង»។
លោក ឆាយ គឹមខឿន បានបន្ថែមថាសមត្ថកិច្ចមានកិច្ចខិតខំប្រឹងប្រែងខ្លាំងណាស់ហើយបានចាត់វិធានការ និងគោលនយោបាយរបស់រាជរដ្ឋាភិបាលក្នុងការប្រឆាំងការជួញដូរមនុស្សគឺបាននិងកំពុងតែអនុវត្តយ៉ាងសកម្មហើយរាជរដ្ឋាភិបាលថែមទាំងបានបង្កើតដល់គណៈកម្មការជាតិប្រឆាំងការជួញដូរមនុស្សនេះទៀតផង ដែលជាយន្តការថ្នាក់ជាតិមួយដែលបានដាក់ចេញនូវគោលនយោបាយជំរុញឲ្យកម្លាំងអនុវត្តច្បាប់។
ក៏ប៉ុន្តែអ្នកស្រី ឡុង គឹមហ៊ាង ជាភរិយារបស់ រ៉ាត់ រ័ត្នមុនី បាននិយាយប្រាប់ភ្នំពេញប៉ុស្តិ៍ថាប្តីរបស់អ្នកស្រីបានចាកចេញពីប្រទេសកម្ពុជាកាលពីចុងខែតុលា ហើយចំណែកអ្នកស្រីបានចាកចេញពីកម្ពុជានៅដើមខែវិច្ឆិកា ហើយអ្នកស្រីអះអាងថាការងារ និងតួនាទីរបស់ប្តីអ្នកស្រីក្នុងភាពយន្តឯកសារគឺជាអ្នកសម្របសម្រួលរៀបចំឯកសារ ដើម្បីស្នើសុំសម្ភាស និងផ្តល់ការបកប្រែអំឡុងពេលសម្ភាសជាមួយស្ត្រីនៅក្នុងភាពយន្តឯកសារ។
អ្នកស្រីបានបញ្ជាក់ថា៖ «ខ្ញុំបានដំណឹងគេតាមចាប់តាំងពីថ្ងៃព្រហស្បតិ៍តាមរយៈសហគមន៍នៅថៃ ។ ប៉ូលិសតាមចាប់ប្តីខ្ញុំនៅពេលដែលគាត់ទៅការិយាល័យធ្វើទិដ្ឋាការដាក់ពាក្យពេលថ្ងៃ ថ្ងៃទី ៧ ពេលល្ងាចហ្នឹងប៉ូលិសរបស់រដ្ឋាភិបាលថៃ ពេលដែលគេចាប់ប្តីខ្ញុំហ្នឹង គេប្រាប់ខ្ញុំថា គេបានទទួលលិខិតពីរដ្ឋាភិបាលកម្ពុជាដែលថាប្តីខ្ញុំមានទោសផលិតភាពយន្តឯកសារមិនពិត រឿងជួញដូរផ្លូវភេទ អីហ្នឹងគឺមិនពិតទេ»។ អ្នកស្រីបានបញ្ជាក់ថា៖ «ប៉ូលិសខ្មែរគេបានស្នើសុំឲ្យប៉ូលិសថៃសហការចាប់បញ្ជូនមកកម្ពុជាវិញ»។
អ្នកស្រី ឡុង គឹមហ៊ាង បានទទូចឲ្យរដ្ឋាភិបាលកម្ពុជាធ្វើសកម្មភាពបំបាត់អំពើជួញដូរមនុស្សជាជាងតាមចាប់អ្នកដែលលើកយកបញ្ហាហ្នឹងមកលាតត្រដាងហើយអ្នកស្រីក៏ស្នើឲ្យមានការស៊ើបអង្កេតឯករាជ្យផងដែរ។
អ្នកស្រីបញ្ជាក់៖ «ខ្ញុំគិតថាវាជារឿងមិនត្រឹមត្រូវដែលរដ្ឋាភិបាលគាត់ព្យាយាមចាប់ប្តីខ្ញុំ។ វាជារឿងមិនត្រឹមត្រូវទេព្រោះគាត់ជាអ្នកប្រឆាំងការជួញដូរ។ ពួកគាត់គួរតែប្រើប្រាស់ធនធានចំណេះដឹង ឱកាស តួនាទី ដែលគាត់មានទប់ស្កាត់រឿងហ្នឹងហើយរកឱកាស និងរកមធ្យោបាយជួយជនរងគ្រោះវិញថា តើអ្នកទាំងអស់គ្នាហ្នឹងត្រូវជួយគាត់ដោយវិធីណា? ជួយគាត់យ៉ាងម៉េច?»។
អង្គការឃ្លាំមើលសិទ្ធិមនុស្ស Human Rights Watch បានចេញសេចក្តីថ្លែងការណ៍កាលពីថ្ងៃអង្គារស្នើឲ្យរដ្ឋាភិបាលថៃកុំបញ្ជូនពលរដ្ឋខ្មែរឈ្មោះ រ៉ាត់ រ័ត្នមុនី មកឲ្យរដ្ឋាភិបាលកម្ពុជាហើយបានស្នើឲ្យរដ្ឋាភិបាលថៃដោះលែងជនជាតិខ្មែររូបនេះជាបន្ទាន់ ដើម្បីឲ្យគាត់មានសិទ្ធិស្នើសុំសិទ្ធិជ្រកកោននៅអង្គការសហប្រជាជាតិ៕
