ឧត្តរមានជ័យៈ នគរបាលមូលដ្ឋានស្រុកអន្លង់វែងបានប្រទះឃើញសត្វខ្ទីងញី ១ ក្បាល ត្រូវគេបាញ់ងាប់នៅក្នុងព្រៃ ក្បែរជើងភ្នំជញ្ជាំង ស្ថិតក្នុងភូមិ-ឃុំលំទង សង្ស័យត្រូវព្រានព្រៃបាញ់ប្រហារ។
លោក ម៉ែន មូល នាយរងនគរបាលប៉ុស្តិ៍ ឃុំលំទង ប្រាប់ ភ្នំពេញ ប៉ុស្តិ៍ ពីម្សិលមិញថា កាលពីមួយសប្ដាហ៍មុនក្នុងអំឡុងពេលចុះល្បាតតាមដងព្រៃ ដើម្បីការពារ និងទប់ស្កាត់ប្រជាពលរដ្ឋដែលគេចវេះពីការធ្វើចត្តាឡីស័ក បន្ទាប់ពីលួចឆ្លងដែនត្រឡប់ពីប្រទេសថៃ ក្រុមសមត្ថកិច្ចក៏បានប្រទះឃើញសត្វខ្ទីងញី ១ ក្បាលងាប់នៅក្នុងព្រៃរបោះក្បែរជើងភ្នំជញ្ជាំងស្ថិតក្នុងភូមិ-ឃុំ លំទង ស្រុកអន្លង់វែង។ «សត្វខ្ទីងញី ១ ក្បាលនោះ ទំនងជាត្រូវក្រុមព្រានព្រៃបាញ់ឱ្យត្រូវរបួសពីកន្លែងណាមួយ ហើយបានរត់មកងាប់នៅក្នុងព្រៃរបោះក្បែរជើងភ្នំជញ្ជាំង ព្រោះនៅផ្នែកខាងក្រោមគុម្ពត្រចៀកខាងស្ដាំរបស់វា មានស្នាមរបួស»។
លោកបានបន្តថា៖ «វាទំនងជាងាប់ ៣-៤ ថ្ងៃមុនពេលពួកយើងបានប្រទះឃើញ ព្រោះសពរបស់វា មានសភាពហើមស្អុយ។ ពួកយើងក៏បានសម្រេចជីកដីកប់សពរបស់វានៅក្នុងព្រៃក្បែរទីតាំងដែលវាងាប់»។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យថ្លែងថា តំបន់ដែលសត្វខ្ទីងនោះងាប់មិនស្ថិតនៅក្នុងតំបន់ដែនជម្រកនោះទេ។ ប៉ុន្តែតំបន់នោះត្រូវបានអ្នកភូមិ និងអាជ្ញាធរមូលដ្ឋានធ្លាប់បានប្រទះឃើញហ្វូងសត្វខ្ទីងប្រមាណ ១០ ក្បាល និងហ្វូងសត្វទន្សោងជាង ១០ ក្បាលចូលទៅរកស៊ីស្មៅ នៅក្នុងចម្ការកៅស៊ូហើយពេលខ្លះហ្វូងសត្វខ្ទីងទាំងនោះក៏បានចូលទៅក្នុងចម្ការដំឡូងមីរបស់អ្នកភូមិផងដែរ។ «យើងមានការសោកស្ដាយណាស់នៅពេលទទួលដំណឹងពីអាជ្ញាធរមូលដ្ឋានថា មានសត្វខ្ទីងមួយក្បាលងាប់»។ លោកបានអំពាវនាវដល់ពលរដ្ឋ និងអាជ្ញាធរមូលដ្ឋានក្នុងតំបន់នោះសូមជួយការពារ និងអភិរក្សហ្វូងសត្វព្រៃដ៏កម្រទាំងនោះ ដោយត្រូវចេះសហការគ្នាទប់ស្កាត់ឱ្យបាននូវបទល្មើសបរបាញ់ ដាក់អន្ទាក់សត្វព្រៃ។
បើតាមលោក លីណា ខ្ទីង ជាប្រភេទសត្វមានដោយកម្រ និងមានដង់ស៊ីតេរស់នៅកម្រិតទាប។ គេកម្រឃើញវារស់នៅតាមវាលទំនាបណាស់ព្រោះសត្វនេះ មិនចូលចិត្តកម្តៅថ្ងៃយូរពេកទេ។ សត្វខ្ទីងមានមាឌធំ ខ្លួនខ្មៅ បូកក្រាស់លាតសន្ធឹងរហូតដល់ស្ទើរពាក់កណ្តាលខ្នង។ ចំណែកកខ្លីបន្តិច រាងមាំ ដោយមានបូកនៅផ្នែកខាងក្រោម។ ជើងទាំង ៤ របស់វាចាប់ពីជង្គង់ចុះក្រោមពណ៌ប្រផេះ។ បច្ចុប្បន្នសត្វខ្ទីងកំពុងប្រឈមការរងគ្រោះថ្នាក់ដោយសារការបាត់បង់ទីជម្រករស់នៅ ការបរបាញ់ដើម្បីយកសាច់ ស្នែង ឆ្អឹង និងការជួញដូរ៕
វីដេអូ៖