ភ្នំពេញៈ ពលរដ្ឋខ្មែរចំនួន ១៤៣ នាក់ ដែលក្នុងនោះមាននិស្សិតនៅអេហ្ស៊ីបចំនួន ៤៣ នាក់ និងសិក្ខាកាមយោធា ៩៨ នាក់ និស្សិតម្នាក់ និងពលរដ្ឋជាប់គាំងម្នាក់មកពីប្រទេសរុស្ស៊ីបានធ្វើដំណើរដោយតជើងហោះហើរចេញពីប្រទេសម៉ាឡេស៊ីមកដល់ប្រទេសកម្ពុជាកាលពីថ្ងៃម្សិលមិញ។
ស្ថានទូតខ្មែរប្រចាំប្រទេសម៉ាឡេស៊ី ឲ្យដឹងថា អ្នកដំណើរតាមជើងហោះហើរលេខ MH ៧៥៤ ទាំងនេះគឺមួយចំនួនបានបញ្ចប់ការសិក្សាមួយចំនួនត្រូវទៅធ្វើកម្មសិក្សានៅប្រទេសកម្ពុជា ហើយមួយចំនួនទៀតដោយសារមានវិស្សមកាលរយៈពេលយូរ។
សមាគមនិស្សិតខ្មែរនៅប្រទេសអេហ្ស៊ីបប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា និស្សិតចំនួន ៤៣ នាក់ ក្នុងចំណោមនិស្សិតខ្មែរទាំងអស់ ១០៨ នាក់ដែលសិក្សានៅប្រទេសអេហ្ស៊ីបដែលវិលមកប្រទេសកម្ពុជា នៅពេលនេះគឺមាន ២ នាក់បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ និង ៤១ នាក់ទៀតដោយសារមានវិស្សមកាលធំ។
មន្ត្រីក្រសួងសុខាភិបាលធ្លាប់បានបញ្ជាក់កាលពីពេលថ្មីៗនេះថា គិតចាប់តាំងពីថ្ងៃទី ២០ ខែឧសភា មក និស្សិតខ្មែរដែលសិក្សានៅក្រៅប្រទេសបានវិលត្រឡប់មកកម្ពុជាវិញមានប្រហែល ១ ពាន់នាក់ ខណៈក្រសួងបានតម្រូវឱ្យរាល់អ្នកដំណើរទាំងអស់ត្រូវធ្វើតេស្ដរកជំងឺកូវីដ១៩ និងត្រូវធ្វើចត្តាឡីស័ក ១៤ ថ្ងៃមុនអនុញ្ញាតឱ្យទៅប៉ះពាល់ផ្ទាល់ជាមួយក្រុមគ្រួសារ ឬអ្នករស់នៅក្នុងសហគមន៍ជាមួយគ្នា។
កាលពីពេលថ្មីៗនេះក្នុងចំណោមក្រុមនិស្សិតខ្មែរចំនួន ៨០ នាក់ ដែលវិលត្រឡប់មកពីប្រទេសអារ៉ាប៊ីសាអ៊ូឌីតមកដល់កម្ពុជាវិញកាលពីថ្ងៃទី ១០ ខែកក្កដា គឺមានចំនួន ២៥ នាក់ ត្រូវបានធ្វើតេស្ដវិជ្ជមានជំងឺកូវីដ ១៩ ប៉ុន្តែនៅថ្ងៃម្សិលមិញមាននិស្សិតចំនួន ៣ នាក់ ត្រូវបានក្រសួងសុខាភិបាលប្រកាសថាបានព្យាបាលជាសះស្បើយក្រោយលទ្ធផលធ្វើតេស្ដ ២ ដងអវិជ្ជមាន។
គិតត្រឹមថ្ងៃទី ១៩ កក្កដា កម្ពុជាបានធ្វើតេស្ដរកឃើញអ្នកឆ្លងជំងឺកូវីដ ១៩ ទាំងជនបរទេស និងពលរដ្ឋខ្មែរមានចំនួន ១៧១ នាក់ ក្រោយពីមានអ្នកដំណើរមកពីសហរដ្ឋអាមេរិកចំនួន ៥ នាក់ទៀត បានធ្វើតេស្ដវិជ្ជមានកាលពីថ្ងៃទី ១៦ កក្កដា គឺជាពលរដ្ឋខ្មែរប្រុសស្រីចំនួន ៣ នាក់ និងមន្ត្រីទូតរបស់ស្ថានទូតសហរដ្ឋអាមេរិកចំនួន ២ នាក់ ដែលបានធ្វើដំណើរមកដល់កម្ពុជាកាលពីថ្ងៃទី ១៥ កក្កដា។
នៅក្នុងចំណោមអ្នកជំងឺកូវីដ ១៧១ នាក់នេះ គឺត្រូវបានព្យាបាលជាសះស្បើយអស់ចំនួន ១៣១ នាក់ ស្របពេលស្ដ្រីខ្មែរទើបធ្វើដំណើរមកពីអាមេរិកម្នាក់កាលពីថ្ងៃទី ១៥ កក្កដា បានរត់គេចចេញពីកន្លែងធ្វើចត្តាឡីស័កនៅសណ្ឋាគារមួយក្នុងក្រុងភ្នំពេញកាលពីយប់ថ្ងៃទី ១៧ ហើយជិះរថយន្តតាក់ស៊ីទៅកាន់ខេត្តកំពង់ចាម និងបានធ្វើដំណើរទៅហូបបាយ និងធ្វើសក់ក្នុងហាងមួយកន្លែងដែលស្ថិតនៅផ្សារធំនៅក្រុងកំពង់ចាមមុនអាជ្ញាធរក្នុងខេត្តនេះ ស្វែងរកឃើញ និងបញ្ជូនទៅធ្វើចត្តាឡីស័កវិញនៅយប់ថ្ងៃទី ១៨ កក្កដា។
លោកស្រី ឱ វណ្ឌឌីន អ្នកនាំពាក្យក្រសួងសុខាភិបាលលើកឡើងថា ក្រសួងមិនទាន់បានកំណត់អំពីការដាក់ទោសទណ្ឌ ឬពិន័យចំពោះអ្នករត់គេចចេញពីកន្លែងធ្វើចត្តាឡីស័កនៅឡើយទេ។
លោកស្រីថា៖ «នេះគឺជាករណីដែលបានចាកចេញពីកន្លែងធ្វើចត្តាឡីស័កដោយមិនបានស្នើសុំត្រឹមត្រូវដែលជាទង្វើលួចចេញដោយមិនគោរពតាមវិធានការចត្តាឡីស័កសម្រាប់ការគ្រប់គ្រងប្រទេសក្នុងគ្រាមានការរាតត្បាតជំងឺឆ្លងជាអន្តរជាតិ។ ករណីនេះទាមទារពេលវេលាបន្តិចសិន ដើម្បីក្រុមការងារថ្នាក់ក្រោមជាតិ ដែលមានអាជ្ញាធរខេត្តដឹកនាំកំពុងធ្វើការងារបន្តទៀតសិន»។
រដ្ឋាភិបាលបានប្រកាសអនុញ្ញាតឱ្យពលរដ្ឋឈប់សម្រាកសងថ្ងៃចូលឆ្នាំរយៈពេល ៥ ថ្ងៃនៅថ្ងៃទី ១៧ ដល់ថ្ងៃទី ២១ ខែសីហា ខាងមុខនេះ ដោយរំពឹងថា ការឈប់សម្រាកនៅពេលនោះនឹងផ្ដល់ឱកាសដល់ពលរដ្ឋធ្វើដំណើរកម្សាន្តទៅកាន់តំបន់ទេសចរណ៍នានា ដើម្បីជួយលើកកម្ពស់វិស័យទេសចរណ៍ក្នុងស្រុកស្របពេលកំពុងរងផលប៉ះពាល់យ៉ាងខ្លាំងដោយសារជំងឺកូវីដ ១៩។
ក្រសួងសុខាភិបាលទើបចេញសេចក្ដីណែនាំមួយកាលពីចុងសប្ដាហ៍នេះ ដើម្បីបង្ការកុំឱ្យមានរីករាលដាលនៃជំងឺកូវីដ ១៩ នៅអំឡុងពេលដែលពលរដ្ឋត្រូវឈប់សម្រាករយៈពេលយូរនៅក្នុងខែសីហាខាងមុខនេះ គឺពលរដ្ឋត្រូវជ្រើសរើសទីតាំងកម្សាន្តដែលមានបរិយាកាសល្អមានខ្យល់ចេញចូលគ្រប់គ្រាន់ហើយត្រូវចៀសវាងការកម្សាន្តនៅតាមខារ៉ាអូខេ និងក្លិបកម្សាន្ត ឬជួបជុំគ្នាលេងល្បែង ច្រៀងរាំ និងផឹកស៊ីដែលមានគ្នាច្រើននាំឱ្យបាត់បង់គម្លាតសុវត្ថិភាព។
កាលពីថ្ងៃម្សិលមិញលោក ហ៊ុន សែន ក៏បានសរសេរបង្ហោះនៅក្នុងហ្វេសប៊ុករបស់លោកថា នៅតាមទីកន្លែងអាជីវកម្មទាំងអស់គឺត្រូវមានជែល ឬអាល់កុលសម្រាប់លាងដៃ និងម៉ាស់សម្រាប់ពាក់ ដើម្បីការពារការឆ្លងរាលដាលជំងឺពីមនុស្សម្នាក់ទៅមនុស្សម្នាក់ ហើយអ្នកដំណើរមកពីក្រៅប្រទេសទាំងអស់ត្រូវគោរពតាមការណែនាំរបស់ក្រសួងសុខាភិបាល។
លោកបញ្ជាក់ថា៖ «ចំពោះបងប្អូនប្រជាពលរដ្ឋខ្មែរក៏ដូចភ្ញៀវទេសចរដែលធ្វើដំណើរមកកម្ពុជា ត្រូវតែធ្វើតាមការណែនាំរបស់ក្រសួងសុខាភិបាលឲ្យបានខ្ជាប់ខ្ជួន ជាពិសេសនៅពេលដែលពិនិត្យសុខភាពរួចហើយអនុញ្ញាតឱ្យរស់នៅដាច់ដោយឡែកចំនួន ១៤ ថ្ងៃគឺត្រូវទទួលខុសត្រូវធ្វើតាមបញ្ជាណែនាំរបស់ក្រសួងសុខាភិបាលឲ្យបានដាច់ខាត ដើម្បីសុវត្ថិភាព សុខភាពខ្លួនឯងផង និងសម្រាប់អ្នកដទៃផង»៕