.jpg)
បុរសជាជនសង្ស័យត្រូវបាននគរបាលខេត្តបាត់ដំបង ចាប់ខ្លួនជាមួយវត្ថុតាង។ រូបថត ប៉ូលិស
បាត់ដំបងៈ បុរសជាជនសង្ស័យម្នាក់ត្រូវបាននគរបាលខេត្តបាត់ដំបង បញ្ជូនទៅសាលាដំបូងខេត្ត នៅថ្ងៃទី ៥ ឧសភានេះ បន្ទាប់ពីចាប់ខ្លួនបាន ១ ថ្ងៃ ជាមួយនឹងកាំភ្លើងខ្យល់ ៤ ដើម ដាវសាមូរ៉ៃចំនួន ១ និង គ្រឿងញៀនប្រភេទមេតំហ្វេតាមីន ចំនួន ១៦ ថង់តូច នៅភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបង។
លោកឧត្តមសេនីយ៍ត្រី កុយ ហៀង ស្នងការនគរបាលខេត្តបាត់ដំបង ទទួលផែនប្រឆាំងគ្រឿងញៀនប្រាប់ នៅថ្ងៃនេះ ថា ជនសង្ស័យឈ្មោះ សុង គឹមសឿត អាយុ ៣០ ឆ្នាំ ត្រូវសមត្ថកិច្ចជំនាញរបស់លោកបញ្ជូនទៅសាលាដំបូងខេត្តបាត់ដំបង នៅថ្ងៃនេះ (ថ្ងៃទី ៥ ឧសភា) ដើម្បីចាត់ការតាមច្បាប់។ ក្រៅពីបទល្មើសជួញដូរគ្រឿងញៀន ជនសង្ស័យមានជាប់ពាក់ព័ន្ធនឹងបទល្មើសមួយទៀត គឺប្រើប្រាស់អាវុធខុសច្បាប់។
លោកថ្លែងថា៖ «ជននោះគាត់ជាប់ពាក់ព័ន្ធបទល្មើស ២ ហើយគាត់នឹងត្រូវតុលាការសាកសួរបន្តទៀតមុនធ្វើការចោទប្រកាន់»។
លោក កុយហៀង បានបញ្ជាក់ថា ដោយសារជនសង្ស័យជាមុខសញ្ញាល្មើស សមត្ថកិច្ចជំនាញបានបើកការស៊ើបអង្កេតហើយក៏ដឹងថា ពាក់ព័ន្ធនឹងគ្រឿងញៀន ទើបប្រតិបត្តិការចាប់ខ្លួនជាក់ស្តែងតែម្តង។ រីឯវត្ថុតាងដែលដកហូតបានមានម្សៅក្រាមពណ៌សថ្លាច្រកក្នុងថង់ប្លាស្ទិក១៦ថង់តូចសង្ស័យជាប្រភេទមេតំហ្វេតាមីនម៉ាទឹកកក ICE, កាំភ្លើងវែងប្រើខ្យល់ ចំនួន ៤ ដើម,ជញ្ជីងថ្លឹងគ្រឿងញៀន ១ គ្រឿង, ដាវសាមូរ៉ៃចំនួន ១, ដបសម្រាប់ជក់គ្រឿងញៀន ១ និង ទុយោជ័រ ចំនួន ២ ដុំរួមនឹងថង់ប្លាស្ទិកសម្រាប់ច្រករំលែកថ្នាំញៀនមួយចំនួនទៀត។
លោកបានបន្តថា នៅចំពោះមុខសមត្ថកិច្ច ជនសង្ស័យបានឆ្លើយថា កាំភ្លើងទាំង ៤ ដើមនោះរូបគេមិនបានយកទៅប្រើសម្លាប់មនុស្ស ឬ ក៏ប្រើក្នុងផ្លូវអាក្រក់ទេ តែគេប្រើសម្រាប់បាញ់មាន់និងបាញ់សត្វកណ្តុរ។ ឯចំពោះកាំបិតនិងដាវវិញគេថា ទុកការពារខ្លួនមិនមែនយកទៅគំរាមនរណាទេ។ ក៏ប៉ុន្តែតាមរយៈឧបករណ៍ល្មើសបែបនេះគេអាចវាយតម្លៃពីអត្តចរិតគាត់បានថា យ៉ាងម៉េចហើយ។
លោកថា៖ «ជនល្មើសមិនបានឆ្លើយប្រាប់យើងត្រង់ទេគេឆ្លើយ ដើម្បីការពារខ្លួនតែប៉ុណ្ណោះហើយបើមិនមែនជាមនុស្សអាក្រក់ជនសង្ស័យក៏មិនទុកវត្ថុបទល្មើសទាំងនេះទេ»។
លោកបានបន្តថា ធម្មតាមនុស្សល្អគឺមិនដែលទុកអាវុធខុសច្បាប់ជាប់នឹងខ្លួនទេ ហើយនេះគេមានអាវុធល្មើសគ្រប់ប្រភេទ។ដូច្នេះជនម្នាក់នេះនឹងជាប់បទល្មើសមួយករណីទៀតដែលមិនត្រឹមតែករណីគ្រឿងញៀនទេ។
បើតាមលោក កុយ ហៀង ថ្វីបើសមត្ថកិច្ចចាប់ខ្លួនបានតែម្នាក់ក្ដី ប៉ុន្តែបើគ្មានបក្ខពួកទេក៏គេមិនអាចលក់គ្រឿងញៀនឲ្យនរណាបានដែរផ្ទុយទៅវិញជននេះពិតជាមានបក្ខពួកទៀត។ សមត្ថកិច្ចមិនបញ្ចប់ត្រឹមហ្នឹងទេកាលណាសួរជនសង្ស័យរួចនឹងបន្តស៊ើបអង្កេតបន្ថែមទៀត៕
