.jpg)
ជនសង្ស័យ ដែលយកដងពូថៅទៅញាត់មាត់ប្រពន្ធធ្វើឲ្យស្លាប់។ រូបថត នគរបាល
ភ្នំពេញៈ នគរបាលខណ្ឌមានជ័យ រាជធានីភ្នំពេញបានកសាងសំណុំរឿងជនសង្ស័យម្នាក់បញ្ជូនទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីតាមចាប់ខ្លួនបាននៅភូមិទ្រា សង្កាត់ស្ទឹងមានជ័យ ១ ខណ្ឌមានជ័យ ជាភូមិសាស្ត្រដែលជននេះបានយកដងពូថៅញាត់មាត់ប្រពន្ធបណ្ដាលឲ្យស្ទះខ្យល់ស្លាប់។
ពាក់ព័ន្ធការបញ្ជូនជនសង្ស័យទៅតុលាការនេះលោក ម៉េង វិមានតារា អធិការនគរបាលខណ្ឌមានជ័យមិនអាចសុំបញ្ជាក់បានទេពីម្សិលមិញ ដោយសារទូរស័ព្ទលោកគ្មានអ្នកទទួល។
ក៏ប៉ុន្តែលោក ម៉ៅ សាវឿន នាយប៉ុស្តិ៍នគរបាលស្ទឹងមានជ័យ ១ បានឲ្យដឹងថា ជនសង្ស័យនោះឈ្មោះ កែវ វណ្ណៈ អាយុ ២២ ឆ្នាំ ត្រូវបញ្ជូនទៅសាលាដំបូងរាជធានីភ្នំពេញនៅថ្ងៃទី ១៥ កក្កដា នេះហើយ បន្ទាប់ពីបញ្ចប់ការសាកសួរនៅអធិការដ្ឋាននគរបាលខណ្ឌ ក្រោយចាប់ខ្លួនកាលពីថ្ងៃទី ១៣ កក្កដា។
លោកថ្លែងថា៖ «របាយការណ៍នៃសំណុំរឿងនេះបានសុំឆ្លងទៅផែនកណ្តាលយុត្តិធម៌នៅថ្ងៃនេះ (ថ្ងៃទី ១៤ ខែកក្កដា) ហើយ ហើយមនុស្សក៏យកទៅតុលាការនៅថ្ងៃស្អែកដែរ»។
លោកឲ្យដឹងថា កាលពីយប់ថ្ងៃទី ១១ ខែកក្កដា ពលរដ្ឋបានប្រទះឃើញស្ត្រីរងគ្រោះដេកស្លាប់ទាំងអាក្រាតក្នុងខ្ទមបាក់បែកក្នុងដីឡូត៍ ១ កន្លែងនៅភូមិទ្រា សង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញដោយសពមានដងពូថៅញាត់ចូលជ្រៅក្នុងមាត់ផង។
លោកថា បន្ទាប់ពីដឹងព័ត៌មានពីពលរដ្ឋភ្លាម លោកបានរាយការណ៍ទៅលោកអធិការនគរបាលខណ្ឌមានជ័យ។ បន្ទាប់មកសមត្ថកិច្ចក៏ស្រាវជ្រាវចាប់បានជនសង្ស័យនៅភូមិ-សង្កាត់កើតហេតុតែម្ដង។
លោកបន្តថា ជនសង្ស័យបានប្រាប់ថា គាត់បានយកគ្នាជាប្តី-ប្រពន្ធ ៥ ខែមកហើយ ដោយមានរបររើសអេតចាយ រីឯប្រពន្ធគាត់មានផ្ទៃពោះ ៥ ខែហើយដែរ។
លោក សាវឿន ប្រាប់តាមសម្តីជនសង្ស័យទៀតថា ប្រពន្ធរបស់គាត់មានជំងឺតេតាណូសហើយចេះតែប្រកាច់។ លុះនៅយប់កើតហេតុប្រពន្ធគាត់ប្រកាច់ និងរឹងថ្គាម ពេលនោះគាត់ក៏បានយកដងពូថៅទៅញាត់មាត់ប្រពន្ធធ្វើឲ្យស្លាប់រួចរត់គេចខ្លួន។ ករណីនេះសមត្ថកិច្ចជំនាញ និងគ្រូពេទ្យបានធ្វើកោសល្យវិច័យឃើញថា ស្ត្រីរងគ្រោះបានស្លាប់ដោយថប់ដង្ហើម។ ដូច្នេះសមត្ថកិច្ចសន្និដ្ឋានថា ជាករណីឃាតកម្មពិតប្រាកដ៕
