សៀមរាបៈ បុរសម្នាក់បានស្លាប់នៅកន្លែងកើតហេតុ ដោយសារបាក់ច្រាំងអូរសង្កត់ពីលើ ខណៈគាត់កំពុងគ្របសំណាញ់ហើយរាវចាប់ត្រីក្នុងអូរ ១ កន្លែង នៅភូមិរហាល ឃុំតាសៀម ស្រុកស្វាយលើ ខេត្តសៀមរាបពីល្ងាចថ្ងៃទី ៤ ខែមេសា។
អធិការនគរបាលស្រុកស្វាយលើលោក ស៊ុន អេង ប្រាប់ ភ្នំពេញ ប៉ុស្តិ៍ ពីម្សិលមិញថា ក្រោយកម្លាំងជំនាញបានចុះទៅពិនិត្យជាក់ស្តែងឃើញថា ពិតជាមានករណីបាក់ច្រាំងអូរសង្កត់មនុស្សម្នាក់ស្លាប់មែន។
លោកថ្លែងថា៖ «ជនរងគ្រោះបានបង់សំណាញ់ ហើយចុះទៅសង្គ្រប់ត្រីនៅក្រោមច្រាំងអូរដែលមានគល់ឫស្សីហើយច្រាំងក៏បានបាក់សង្កត់ធ្វើឱ្យជនរងគ្រោះស្លាប់តែម្តង រឿងមានតែប៉ុណ្ណឹងឯង»។
លោក អ៊ឹម ឡាំ មេប៉ុស្តិ៍រដ្ឋបាលឃុំតាសៀមបានប្រាប់ដែរថា ជនរងគ្រោះឈ្មោះ ចក់ ចែម អាយុ ២១ ឆ្នាំ ជាពលរដ្ឋរស់នៅភូមិរហាល ឃុំតាសៀម ស្រុកស្វាយលើ ខេត្តសៀមរាប។ មុនកើតហេតុពលរដ្ឋច្រើននាក់បានទៅបង់សំណាញ់នៅទីនោះពីម៉ោងប្រមាណ ១ និង ៣០ នាទីរសៀលរហូតដល់ម៉ោង ៥ ល្ងាច ទើបចែកត្រីគ្នារួចត្រឡប់ទៅផ្ទះវិញ។
លោកថា៖ «មុនពួកគាត់បង់ត្រីគាត់បានកាប់ឫស្សីដែលបានបាក់ស្រាប់ចូលក្នុងអូរ ក្រោយកាប់ចុងឫស្សីអស់ក៏នាំគ្នាយកសំណាញ់គ្របដើម្បីចាប់ត្រីក្រោមច្រាំងអូរដែលមានគល់ឫស្សីហ្នឹង។ បន្ទាប់ពីបានត្រីចែកគ្នាហើយ អ្នកខ្លះក៏ទៅផ្ទះ ខ្លះក៏នៅ ឯជនរងគ្រោះក៏នៅដែរ តែអ្នកផ្សេងៗគេឡើងអស់ហើយ សល់តែគាត់ម្នាក់ឯងនៅរាវចាប់ត្រីព្រោះស្តាយ»។
បើតាមលោក អ៊ឹម ឡាំ ដែលបានស្រង់សម្ដីឪពុកជនរងគ្រោះបញ្ជាក់ថានៅម៉ោង ៥ និង ៣០ នាទីល្ងាច ជនរងគ្រោះបានយកសំណាញ់ទៅគ្របនៅច្រាំងក្រោមគុម្ពឫស្សី។ លុះពេលមុជទឹករាវរកត្រីស្រាប់តែបាក់ច្រាំងសង្កត់លើតែម្តង។ ឪពុកជនរងគ្រោះបានរាយការណ៍មកសមត្ថកិច្ច និងបានហៅអេស្កាវទ័រ មកកាយយកកូនគាត់ចេញពីក្នុងទឹក។
បើតាមលោក ឡាំ ការពិនិត្យពីជំនាញបច្ចេកទេសឃើញថាសពមានស្នាមដាច់រលាត់លើភ្នែក និងខ្ទង់ច្រមុះបណ្ដាលមកពីច្រាំងសង្កត់ គឺគ្មានពាក់ព័ន្ធរឿងព្រហ្មទណ្ឌផ្សេងទេ ហើយករណីនេះសមត្ថកិច្ចក៏បានធ្វើលិខិតប្រគល់សព ជូនក្រុមគ្រួសារយកទៅធ្វើបុណ្យតែម្ដង៕