ភ្នំពេញៈ នគរបាលខណ្ឌច្បារអំពៅនឹងបញ្ជូនជនជាឪពុកចុងម្នាក់ទៅសាលាដំបូងរាជធានីភ្នំពេញនៅថ្ងៃទី ៤ ខែ មេសា បន្ទាប់ពីសមត្ថកិច្ចឃាត់ខ្លួនកាលពីថ្ងៃទី ២ ខែ មេសា តាមបណ្តឹងរបស់ ម្តាយក្មេងស្រីរងគ្រោះ ក្រោយពីកូនស្រីរបស់ខ្លួនត្រូវជនសង្ស័យចាប់រំលោភសេពសន្ថវៈបានសម្រេច ៣ លើក។
លោកវរសេនីយ៍ទោ ម៉ៅ សឿត អធិការរងទទួលផែនយុត្តិធម៌នៃអធិការដ្ឋាននគរបាលខណ្ឌច្បារអំពៅប្រាប់ភ្នំពេញប៉ុស្តិ៍ កាលពីម្សិលមិញថា ជនសង្ស័យដែលជាឪពុកចុងនោះឈ្មោះ ព្រុំ ភារម្យ អាយុ ២៧ ឆ្នាំ រីឯក្មេងស្រីរងគ្រោះឈ្មោះយ.ស.ន អាយុ ១៣ ឆ្នាំ។ ចំណែកក្មេងស្រីរងគ្រោះសមត្ថកិច្ចរបស់លោកបានប្រគល់ទៅឲ្យម្តាយនាងវិញហើយ។
លោកបញ្ជាក់ថា៖ «ជនសង្ស័យត្រូវបានសមត្ថកិច្ចរបស់ខ្ញុំកំពុងកសាងសំណុំរឿងនិងបញ្ជូនជននេះទៅតុលាការហើយដើម្បីចាត់ការតាមច្បាប់»។
តាមកំណត់ហេតុ នគរបាល ឲ្យដឹងថា កាលពីថ្ងៃទី ៣១ ខែមីនា ឆ្នាំ ២០១៩ ម្តាយក្មេងស្រីរងគ្រោះបានចេញទៅរើសអេតចាយនៅ វេលាម៉ោង ១០ យប់។ ពេលនោះជនសង្ស័យដែលត្រូវជាឪពុកចុង បាននាំក្មេងស្រីរងគ្រោះ ទៅដេកនៅផ្ទះសំណាក់យីហោ ដាលីន ក្នុងភូមិសាស្រ្តកើតហេតុខាងលើដែលពេលនោះជនសង្ស័យបានចាប់នាងរំលោភបានសម្រេច ៣ ដង។ ក្រោយពីជនសង្ស័យធ្វើសកម្មភាពរំលោភក្មេងស្រីរងគ្រោះហើយក៏នាំនាងត្រឡប់ទៅកន្លែងស្នាក់នៅក្នុងចេតិយក្នុងវត្តនិរោធវិញ។
កំណត់ហេតុបន្តថា ដោយសារតែម្តាយឃើញក្មេងស្រីរងគ្រោះមានសភាពស្លេកស្លាំង ក៏សួរនាំ ហើយនាងបានរៀបរាប់ប្រាប់ម្តាយពីដំណើររឿង។ ទើបមកដល់ថ្ងៃទី ២ ខែ មេសា ឆ្នាំ ២០១៩ វេលាម៉ោង ១៤ និង ៣០ នាទី ម្តាយក៏នាំក្មេងស្រី រងគ្រោះមកដាក់ពាក្យបណ្តឹងនៅអធិការដ្ឋាននគរបាលខណ្ឌច្បារអំពៅ៕