.jpg)
បុរសជាតិឡាវ និងគ្រឿងញៀនដែលរឹបអូសបាន។ រូបថត សហការី
ភ្នំពេញ/ស្ទឹងត្រែងៈ បុរសជនជាតិចិនម្នាក់ត្រូវបានសមត្ថកិច្ចបង្ក្រាប និងចាប់បានជាមួយគ្រឿងញៀនជិត ៤០ គីឡូក្រាម កាលពីថ្ងៃទី ២ ខែតុលា នៅទីតាំងខុនដូមួយកន្លែងក្នុងសង្កាត់ទន្លេបាសាក់ រាជធានីភ្នំពេញ ខណៈបុរសជនជាតិឡាវម្នាក់ទៀតត្រូវបានចាប់ខ្លួននាថ្ងៃជាមួយគ្នានេះដែរនៅខេត្តស្ទឹងត្រែងជាមួយគ្រឿងញៀន ៣ គីឡូក្រាម ដែលសមត្ថកិច្ចកំពុងបន្តសាកសួរបុរសឡាវរូបនេះពីម្សិលមិញ។
លោក មាស វីរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ភ្នំពេញប៉ុស្តិ៍នៅល្ងាចម្សិលមិញថា កម្លាំងសមត្ថកិច្ចនគរបាលមន្ទីរប្រឆាំងគ្រឿងញៀននៃក្រសួងមហាផ្ទៃកាលពីល្ងាចថ្ងៃពុធបានបង្ក្រាបចាប់បុរសជាតិចិនម្នាក់ជាមួយគ្រឿងញៀនជិត ៤០ គីឡូក្រាម នៅទីតាំងខុនដូមួយកន្លែងក្នុងសង្កាត់ទន្លេបាសាក់ខណ្ឌចំការមន រាជធានីភ្នំពេញ។
លោកបញ្ជាក់ថា បុរសជនសង្ស័យឈ្មោះ YUN LIANFU អាយុ ៥១ ឆ្នាំ ជាជនជាតិចិន។ ក្នុងប្រតិបត្តិការនោះសមត្ថកិច្ចបានដកហូតវត្ថុតាងថ្នាំញៀនចំនួន ៣៩ កញ្ចប់ធំ ដែលមានទម្ងន់ ៣៩ គីឡូក្រាម។
លោកបានបញ្ជាក់ថា៖ «ចំពោះសំណុំរឿងនេះកម្លាំងសមត្ថកិច្ចជំនាញកំពុងបន្តនីតិវិធីសាកសួរ និងស្រាវជ្រាវរកជនពាក់ព័ន្ធ ព្រោះជនសង្ស័យម្នាក់ឯងមិនអាចប្រព្រឹត្តបទល្មើសជួញដូរគ្រឿងញៀនដ៏ធំបែបនេះនោះទេ។ ដូច្នេះយើងត្រូវស្រាវជ្រាវរកមេខ្លោង និងក្រុមបក្ខពួកព្រមទាំងខ្សែបណ្ដាញរបស់ពួកគេ ដើម្បីបង្ក្រាបចាប់យកមកផ្ដន្ទាទោសទៅតាមច្បាប់»។
លោកបានបន្តថានៅពេលនេះជនសង្ស័យ និងថ្នាំញៀនជិត ៤០ គីឡូក្រាមនោះ កំពុងស្ថិតក្រោមការសាកសួរ និងត្រួតពិនិត្យដោយសមត្ថកិច្ចជំនាញនៃមន្ទីរប្រឆាំងគ្រឿងញៀនក្រសួងមហាផ្ទៃ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី។
លោក ដុសវណ្ណា វឌ្ឍនៈ នាយការិយាល័យផ្សព្វផ្សាយអប់រំ (ក៩) នៃស្នងការដ្ឋានខេត្តស្ទឹងត្រែងបានប្រាប់ភ្នំពេញប៉ុស្ដិ៍កាលពីម្សិលមិញថា មេខ្លោងជួញដូរគ្រឿងញៀនឆ្លងដែនជនជាតិឡាវខាងលើនេះត្រូវបានកម្លាំងជំនាញ «ក៩» សហការជាមួយមន្ត្រីនៃមន្ទីរប្រឆាំងគ្រឿងញៀនខេត្តដោយបង្ក្រាបបានគ្រឿងញៀន ៣ គីឡូក្រាម។
លោកថ្លែងថា បច្ចុប្បន្ននគរបាលជំនាញកំពុងបន្ដសាកសួរជនសង្ស័យនៅស្នងការដ្ឋាននគរបាលខេត្ដស្ទឹងត្រែងនៅឡើយ ខណៈជនសង្ស័យរូបនេះជាមុខសញ្ញាជួញដូរគ្រឿងញៀនថ្មីដែលសមត្ថកិច្ចទើបស្រាវជ្រាវចាប់បាន។
លោកថា៖ «យើងកំពុងបន្ដសាកសួរជនសង្ស័យ។ ក្រោយពេលឃាត់ខ្លួនយើងរឹបអូសបានសារធាតុញៀនប្រភេទមេតំហ្វេតាមីនចំនួន ៣ កញ្ចប់ធំ មានទម្ងន់ប្រហែល ៣ គីឡូក្រាម និងទូរស័ព្ទ ២ គ្រឿង។ ក្នុងពេលប្រតិបត្ដិនេះក៏មានបក្ខពួកជនសង្ស័យមួយចំនួនទៀតដែរ ប៉ុន្ដែពួកគេបានរត់រួច»។
លោក ដុសវណ្ណា វឌ្ឍនៈ បានឲ្យដឹងថាជនសង្ស័យខាងលើមានឈ្មោះ សា វី អាយុ ៣៥ ឆ្នាំ ជនជាតិឡាវមុខរបរកសិកររស់នៅភូមិឡាក់សៅ ស្រុកខាំកឺប ខេត្តបូលីខាំសៃ ប្រទេសឡាវ។
លោក ចែម ផានិត ប្រធានការិយាល័យបង្ក្រាបគ្រឿងញៀនខេត្តស្ទឹងត្រែងបញ្ជាក់ថា៖ «យើងកំពុងបន្ដសាកសួរជនសង្ស័យនៅស្នងការដ្ឋាននគរបាលខេត្ដស្ទឹងត្រែងមិនទាន់បញ្ចប់ទេ។ ជនសង្ស័យនេះបាននាំថ្នាំញៀនមកក្នុងសកម្មភាពជួញដូរ»។
តាមរបាយការណ៍របស់ក្រសួងមហាផ្ទៃបង្ហាញថា ក្នុងឆមាសទី ១ ឆ្នាំនេះ (ថ្ងៃទី ១ ខែ មករា ដល់ថ្ងៃទី ៣០ ខែ មិថុនា ឆ្នាំ ២០១៩) សមត្ថកិច្ចបង្ក្រាបបទល្មើសគ្រឿងញៀនបាន ៤ ១៧៥ ករណី ដែលកើនលើស ៣៣៧ ករណី បើធៀបនឹងរយៈពេលដូចគ្នាកាលពីឆ្នាំមុនដែលមាន ៣ ៨៣៨ ករណី។ ក្នុងនោះមានករណីជួញដូររក្សាទុក ២ ៥៣១ ករណី ករណីប្រើប្រាស់ ១ ៦២៤ ករណី ការដាំដុះចំនួន ១៩ ករណី និងផលិតកែច្នៃ ១ ករណី។
ដោយឡែកជនសង្ស័យដែលត្រូវបានចាប់ខ្លួនក្នុងឆមាសទី ១ នេះមានចំនួន ៨ ៩១១ នាក់ ក្នុងនោះមានស្រី ៦៦៤ នាក់ កើនលើស ១ ៣៣១ នាក់ បើធៀបរយៈពេលដូចគ្នាកាលពីឆ្នាំមុនដែលមានតែ ៧ ៥៨០ នាក់។ ក្នុងចំណោមនោះមានជនជាតិខ្មែរ ៨ ៧២៤ នាក់ ស្រី ៦២៤ នាក់ និងជនបរទេស ១៨៧ នាក់ ស្រី ៤០ នាក់។ នេះបើតាមរបាយការណ៍ដដែល។
របាយការណ៍ដដែលបានបញ្ជាក់ថា ចំពោះគ្រឿងញៀនដែលបង្ក្រាបបានក្នុងឆមាសទី ១ ឆ្នាំនេះមានចំនួនជាង ៣៤១ គីឡូក្រាម កើនលើសច្រើនជាងទ្វេដងបើធៀបនឹងឆ្នាំមុនដែលមានត្រឹមតែ ១៤៥ គីឡូក្រាម៕
