.jpg)
បុរសម្នាក់ស្លាប់ ក្នុងករណីដំកាកសំណល់គ្រាប់យុទ្ធភ័ណមិនទាន់ផ្ទុះ នៅខេត្តពោធិ៍សាត់ កាលពីម្សិលមិញ។ រូបថត ហ្វេសប៊ុក
ពោធិ៍សាត់៖ បុរសជាកសិករអាយុ ៣២ ឆ្នាំម្នាក់បានរងរបួសធ្ងន់ ដោយសារផ្ទុះគ្រាប់មិនទាន់ផ្ទុះកាលពីថ្ងៃទី ៨ ខែឧសភា និងបាត់បង់ជីវិតក្រោយពេលដែលបានបញ្ជូនទៅដល់មន្ទីរពេទ្យបង្អែកស្រុកវាលវែង។
លោក ធាង ឡេង អធិការនគរបាលស្រុកវាលវែងប្រាប់នៅរសៀលថ្ងៃទី ៩ ឧសភាថា បុរសរងគ្រោះឈ្មោះ អ៊ុត ប៉េងសេង អាយុ ៣២ ឆ្នាំ ជាកសិកររស់នៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់។
លោកថ្លែងថា៖ «បុរសរងគ្រោះគាត់ស្លាប់ដោយសាររបួសធ្ងន់ពេក។ បើនិយាយពីការជួយសង្គ្រោះនោះ គឺយើងមិនបានទុកគាត់យូរទេ»។
លោក ធាង ឡេង បានថ្លែងដោយយោងតាមសាក្សីដែលនៅមិនឆ្ងាយពីកន្លែងកើតហេតុបានឱ្យដឹងថា ជនរងគ្រោះបានរើសបានគ្រាប់មិនទាន់ផ្ទុះជាប្រភេទគ្រាប់ផ្លោងសេវ៉េនធីណាយ ហើយបានយកមកដំ ដោយគ្មានពីណាម្នាក់ដឹងថា គេមានបំណងចង់កែច្នៃធ្វើអ្វីនោះទេ។
លោកបន្តថា៖ «ពេលដែលជនរងគ្រោះដំក៏ស្រាប់តែគេឮសំឡេងផ្ទុះលាន់ស្នូរដូចរន្ទះបាញ់ បន្ទាប់មកអ្នកភូមិបាននាំគ្នាទៅមើលកន្លែងផ្ទុះនោះ ក៏ឃើញខ្លួនប្រាណជនរងគ្រោះមានឈាមពេញខ្លួន ហើយក៏រាយការណ៍ប្រាប់នគរបាលប៉ុស្តិ៍ឃុំអូរសោម ដើម្បីចុះទៅជួយសង្គ្រោះ»។
លោកបន្តទៀតថា ក្រោយទទួលបានសេចក្តីរាយការណ៍ពីប្រជាពលរដ្ឋមកកម្លាំងនគរបាលប៉ុស្តិ៍ បានយករថយន្តទៅដឹកជនរងគ្រោះទៅមន្ទីរពេទ្យតែដោយរបួសធ្ងន់ពេកជនរងគ្រោះក៏ដាច់ខ្យល់ស្លាប់ បន្ទាប់ពីទៅដល់មន្ទីរពេទ្យបង្អែកស្រុកវាលវែង។ លោកបញ្ជាក់ថា អំបែងគ្រាប់បានខ្ទាតត្រូវមុខជនរងគ្រោះបែកស្ទើរខ្ទេច បែកផ្លោកនោម បាក់ឆ្អឹងជើងទាំងសងខាង និងដាច់ដៃខាងឆ្វេងម្ខាងត្រឹមគល់ដៃ។
លោក ធាង ឡេង ឱ្យដឹងថា នៅក្នុងខេត្តពោធិ៍សាត់ ពិសេស គឺនៅស្រុកវាលវែង ជាសមរភូមិប្រយុទ្ធរវាងកងទ័ពរដ្ឋកម្ពុជា និងកងទ័ពខ្មែរក្រហម ហើយកងទ័ពខ្មែរក្រហមបានកប់ និងបន្សល់ទុកគ្រាប់យុទ្ធភ័ណមិនទាន់ផ្ទុះសល់ពាសពេញដីក្នុងតំបន់មួយចំនួននៅក្នុងស្រុកវាលវែង។
ដោយសារតែមានសំណល់គ្រាប់បែបនេះហើយ អាជ្ញាធរស្រុកក៏ដូចជា អាជ្ញាធរខេត្តរួមសមត្ថកិច្ចពាក់ព័ន្ធបន្តធ្វើការអប់រំដល់ពលរដ្ឋឱ្យយល់ដឹងពីគ្រោះថ្នាក់ដោយសារសំណល់គ្រាប់មិនទាន់ផ្ទុះ។
លោក លី ធុជ ទេសរដ្ឋមន្ត្រី និងជាអនុប្រធានទី១ នៃអាជ្ញាធរមីនធ្លាប់បានបញ្ជាក់ប្រាប់ ភ្នំពេញ ប៉ុស្ដិ៍ថា មីន និងសំណល់ជាតិផ្ទុះពីសង្គ្រាមនៅតែបន្តផលប៉ះពាល់ដល់ជីវភាពរស់នៅរបស់ពលរដ្ឋមួយចំនួនទាំងអ្នករស់នៅជនបទ ដាច់ស្រយាល និងក្នុងទីប្រជុំជន។
លោក លី ធុជ ថ្លែងថា៖ «ដូច្នេះ គ្រប់គ្នាត្រូវប្រុងប្រយ័ត្នពេលដែលប្រទះឃើញវា ចូរកុំព្យាយាមប៉ះពាល់ ឬកាន់លេង ឬ រើសវាយកទៅកែច្នៃធ្វើអ្វីផ្សេងទៀតឲ្យសោះ ព្រោះវាងាយនឹងផ្ទុះបង្កគ្រោះថ្នាក់ដល់អាយុជីវិត»៕
