.jpg)
ដីព្រៃ ត្រូវបានគេកាប់ទន្ទ្រាន។ រូបថត សហការី
កោះកុងៈ បុរសម្នាក់ក្នុងចំណោម ៤ នាក់ដែលត្រូវបានសមត្ថកិច្ចស្រុកបទុមសាគរចាប់ឃាត់ខ្លួន ខណៈកំពុងកាប់រានដីព្រៃលិចទឹកកាលពីថ្ងៃទី ៣ ខែកញ្ញា នៅភូមិអណ្តូងទឹក ឃុំអណ្តូងទឹកត្រូវបានបញ្ជូនទៅតុលាការហើយ បើទោះបីជាបុរសរូបនេះបានអះអាងថាខ្លួនជាអ្នកស៊ីឈ្នួលកាប់រានដីព្រៃឲ្យគេក៏ដោយ។
លោក ម៉ម ផល្លា ប្រធានមន្ទីរបរិស្ថានខេត្ដកោះកុងបានឲ្យដឹងកាលពីម្សិលមិញថា បន្ទាប់ពីជនខិលខូចបានផ្សព្វផ្សាយថា ដីនៅតំបន់នោះមានហាងឆេងខ្ពស់បានធ្វើឲ្យប្រជាពលរដ្ឋមួយចំនួនចូលទៅលួចកាប់ទន្ទ្រានព្រៃលិចទឹកនៅក្នុងតំបន់ការពារនោះយកធ្វើជាកម្មសិទ្ធិផ្ទាល់ខ្លួន។ «តំបន់ដីលិចទឹកដែលជនខិលខូចនាំគ្នាលួចចូលទៅកាប់ទន្ទ្រាននោះគឺជាដីព្រៃលិចទឹកស្ថិតក្នុងតំបន់ប្រើប្រាស់ច្រើនយ៉ាងដងពែងក្នុងស្រុកបទុមសាគរដែលជាដីតំបន់ការពារសម្រាប់សហគមន៍»។
បុរសដែលត្រូវបានឃាត់ខ្លួនពេលកំពុងកាប់ទន្ទ្រានដីព្រៃនោះឈ្មោះ សេន ម៉ៅ វ័យ ៣៦ ឆ្នាំ។
លោក ផល្លា ថ្លែងថា៖ «តាមអ្វីដែលគាត់សារភាពជាមួយយើងគាត់ថា គាត់ស៊ីឈ្នួលកាប់ព្រៃក្នុងដីលិចទឹកនេះឲ្យគេទេ។ ប៉ុន្ដែគាត់ថា គាត់អត់បានជួបអ្នកដែលជួលគាត់ដោយផ្ទាល់ទេ គាត់ទទួលបន្ដពីគេមកដែរ។ ពេលនេះយើងកសាងសំណុំរឿងបញ្ជូនគាត់ទៅតុលាការរួចរាល់អស់ហើយ។ តុលាការបានចេញដីកាឃុំខ្លួនគាត់ហើយ»។
លោក ទូ សាវុធ អភិបាលស្រុកបទុមសាគរបានឲ្យដឹងដែរថា ការកាប់ទន្ទ្រានដីព្រៃនៅតំបន់នោះបានកើតឡើងចាប់តាំងពីប្រជាពលរដ្ឋឮថាដីឡើងថ្លៃ។ «ប៉ុន្ដែពេលនេះសកម្មភាពកាប់ទន្ទ្រានដីព្រៃលិចទឹកនេះបានស្ងប់ស្ងាត់បន្តិចហើយ បន្ទាប់ពីយើងបានចុះទៅអង្កេតតាមដាន និងបង្ក្រាបជាបន្ដបន្ទាប់»។
ប៉ុន្តែបើតាមប្រភពពីប្រជាពលរដ្ឋសុំមិនបញ្ចេញឈ្មោះរស់នៅស្រុកបទុមសាគរបានអះអាងថា ព្រៃលិចទឹកនៅតាមបណ្តោយមាត់ព្រែកកន្ទួត និងព្រែកក្រសាំង ឃុំអណ្តូងទឹកបច្ចុប្បន្នកំពុងត្រូវបានជនខិលខូចមួយចំនួនលួចកាប់ទន្ទ្រានយកធ្វើជាកម្មសិទ្ធិផ្ទាល់ខ្លួន ដើម្បីទុកលក់ឲ្យឈ្មួញ និងត្រៀមលក់បន្តទៅក្រុមហ៊ុនឯកជន។
ពលរដ្ឋរូបនេះបន្ថែមថាសកម្មភាពនៃការចូលលួចកាប់ទន្ទ្រានបំផ្លាញយកដីព្រៃលិចទឹកនេះកើតមានឡើងនៅភូមិប្រៃ ភូមិប្រទាល ឃុំអណ្តូងទឹក និងភូមិចំការលើ ឃុំថ្មស គឺបានកំពុងនិងបន្តកើតឡើងយ៉ាងអនាធិបតេយ្យជាងកន្លះខែមកហើយ ដោយអ្នកកាប់ទន្ទ្រានដីព្រៃទាំងនោះជាពលរដ្ឋខិលខូចមួយចំនួនដែលមានទំនាក់ទំនងជិតស្និទ្ធនឹងអាជ្ញាធរថ្នាក់ក្រោម៕
