.jpg)
សមត្ថកិច្ចកំពុងបាញ់ទឹកពន្លត់ភ្លើងដែលឆាបឆេះអគារលក់គ្រឿងសង្ហារិមនៅតាមបណ្ដោយមហាវិថីព្រះមុនីវង្ស ក្នុងសង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ កាលពីម្សិលមិញ។ ហេង ជីវ័ន
ភ្នំពេញៈ យ៉ាងហោចណាស់មានបុរស ស្ត្រីជនជាតិចិន ២ នាក់ប្ដីប្រពន្ធ បានរងរបួសក្នុងគ្រោះអគ្គិភ័យឆាបឆេះហាងលក់គ្រឿងសង្ហារិមមួយកន្លែងដែលមានទីតាំងស្ថិតនៅតាមបណ្ដោយមហាវិថីព្រះមុនីវង្សកាលពីព្រឹកថ្ងៃពុធម្សិលមិញ។
លោក ព្រំ យ៉ន នាយការិយាល័យនគរបាល បង្ការ និងពន្លត់អគ្គិភ័យ រាជធានីភ្នំពេញ បានប្រាប់ភ្នំពេញប៉ុស្តិ៍ក្រោយហេតុការណ៍គ្រោះអគ្គិភ័យនេះថា ជនរងគ្រោះឈ្មោះ CHEN TING អាយុ ៣២ ឆ្នាំ និងប្រពន្ធឈ្មោះ LIN JUAN អាយុ ៣១ ឆ្នាំដែលអ្នកទាំង ២ ជាជនជាតិចិន និងជាម្ចាស់ហាងលក់គ្រឿងសង្ហារិម យីហោ រ៉ូយាល់កាសាដែលមានទីតាំងស្ថិតក្នុងសង្កាត់បឹងកេងកងទី ១ ខណ្ឌបឹងកេងកង រាជធានីភ្នំពេញ។
លោក យ៉ន បញ្ជាក់ថា៖ «ជនរងគ្រោះទាំង ២ ត្រូវបានកម្លាំងនគរបាលផ្នែកសង្គ្រោះបឋមរបស់យើងជួយអន្តរាគមន៍នាំយកទៅកាន់មន្ទីរពេទ្យភ្លាមៗ ដើម្បីពិនិត្យព្យាបាលដែលរហូតមកទល់ពេលនេះពួកគាត់ទាំង ២ បានធូរស្រាលហើយ»។
លោក យ៉ន បន្តថា៖ «មកទល់ពេលនេះក្រុមការងារយើងនៅមិនទាន់រកឃើញពីមូលហេតុនៃការឆេះហាងលក់គ្រឿងសង្ហារិមនេះនៅឡើយទេ»។
សមត្ថកិច្ចបាញ់ទឹកពន្លត់ភ្លើងដែលកំពុងឆាបឆេះ។ហេង ជីវ័ន
បើតាមលោក យ៉ន គ្រោះអគ្គិភ័យនេះបានបង្កការខូចខាត ទាំងស្រុងនូវសំណង់អគារ (ហាង) ធ្វើពីថ្មទំហំ ១៥ ម៉ែត្រ គុណ ១៦ ម៉ែត្រ កម្ពស់ ២ ជាន់ព្រមទាំងសម្ភារគ្រឿងសង្ហារិមដែលដាក់តាំងលក់ក្នុងអគារនោះ។ ក្នុងប្រតិបត្តិការសង្គ្រោះ និងពន្លត់អគ្គិភ័យនេះសមត្ថកិច្ចបានប្រើប្រាស់រថយន្តពន្លត់អគ្គិភ័យសរុបចំនួន ២៩ គ្រឿង មកពី ៥ អង្គភាពរួមមានរថយន្តការិយាល័យអគ្គិភ័យរាជធានីភ្នំពេញចំនួន ១៣ គ្រឿង រថយន្តក្រសួងមហាផ្ទៃ ៤ គ្រឿង រថយន្តទីក្រុងជ្រោយចង្វារ ៦ គ្រឿងរថយន្តស្រាបៀរកម្ពុជា ១ គ្រឿង និងរថយន្តរបស់ទីក្រុងកោះពេជ្រ ៥ គ្រឿង ដោយចំណាយពេលអស់ ២ ម៉ោង ទើបអាចពន្លត់ចប់ជាស្ថាពរ។
ជាមួយគ្នានេះនៅវេលាម៉ោង ៣ រសៀលថ្ងៃពុធម្សិលមិញនេះដែរមានគ្រោះអគ្គិភ័យឆាបឆេះ បន្ទប់ដាក់សម្ភារគ្រឿងសម្អាងការយីហោ Gory ដែលមានទីតាំងស្ថិតនៅទល់មុខហាងលក់គ្រឿងសង្ហារិមរ៉ូយាល់កាសានោះបណ្ដាលឲ្យខូចខាត សម្ភារគ្រឿងសម្អាងការមួយចំនួនផងដែរ ប៉ុន្តែគ្មានបុគ្គលិក ឬម្ចាស់ហាងណាម្នាក់នៃហាងសម្អាងការនេះរងរបួសឡើយ។ នេះបើតាមលោក នេត វត្ថា ប្រធាននាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃ។
គួរបញ្ជាក់ថា ក្នុងឆមាសទី ១ ឆ្នាំ ២០២០ នេះនៅទូទាំងប្រទេសគ្រោះអគ្គិភ័យ បានបណ្ដាលឲ្យមានជនរងគ្រោះ ១១ នាក់ស្លាប់ និង ២៨ នាក់ទៀតរងរបួសធ្ងន់ និងស្រាលព្រមទាំងបានបង្កការឆេះខូចខាតផ្ទះអស់ចំនួន ៥១៩ ខ្នងតូប ២២៥ ខ្នង និងឧបករណ៍ប្រើប្រាស់មួយចំនួនធំ។ នេះបើយោងរបាយការណ៍របស់នាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃ។
របាយការណ៍បានបញ្ជាក់ថា មានកត្តា ៣ យ៉ាងដែលបង្ក និងជំរុញឲ្យកើតមានគ្រោះអគ្គិភ័យក្នុងនោះមានការផ្ទុះឆ្លងចរន្តអគ្គិសនី ៤១% កត្តាប្រើប្រាស់ភ្លើងដោយខ្វះការប្រុងប្រយ័ត្ន ៣៩% និង ២០% កំពុងស្ថិតក្នុងការស៊ើបអង្កេតស្រាវជ្រាវនៅឡើយ៕
