កណ្តាលៈ ប្រជាពលរដ្ឋប្រមាណ ៦០ នាក់មកពីឃុំចំនួន ៣ តំណាងឲ្យពលរដ្ឋ ២០០ គ្រួសារស្ថិតក្នុងស្រុកកៀនស្វាយពីម្សិលមិញ បានប្រមូលផ្តុំគ្នានៅសាលាខេត្តកណ្តាល ដើម្បីស្នើឲ្យអាជ្ញាធរខេត្តនេះដោះស្រាយដីធ្លីជូនពួកគាត់ បន្ទាប់ពីអាជ្ញាធរប្រកាសថាដីដែលពួកគាត់កាន់កាប់អស់រយៈពេលជាង ៣០ ឆ្នាំមកហើយនោះ ជាដីរដ្ឋ។
អ្នកស្រី ឆាយ បូណា ដែលអះអាងថាបានរស់នៅលើដីនោះតាំងពីឆ្នាំ ១៩៨០ ប្រាប់ភ្នំពេញ-ប៉ុស្តិ៍ពីម្សិលមិញថា ប្រជាពលរដ្ឋទាំងអស់បានកាន់កាប់លើដីទាំងនោះតាំងពីជំនាន់ ដែលរដ្ឋបានចែកឲ្យពួកគាត់រស់នៅតាំងពីឆ្នាំ ១៩៨០ និងឆ្នាំ ១៩៨១ ហើយមានការដឹងឮពីអាជ្ញាធរមុនៗដោយបានកាន់កាប់អាស្រ័យផលរហូតមកដល់បច្ចុប្បន្ន។
អ្នកស្រីបន្តថា ស្រាប់តែអំឡុងឆ្នាំ ២០១៩ អាជ្ញាធរអគ្គិសនីបានសាងសង់បណ្តាញខ្សែភ្លើង និងបង្គោលភ្លើងកាត់ដីរបស់ពួកគាត់។ ក្នុងការប៉ះពាល់នោះ អាជ្ញាធរអគ្គិសនីអះអាងផ្តល់សំណង បើមានការបញ្ជាក់ពីអាជ្ញាធរដែនដី។ ប៉ុន្តែអ្នកស្រីថាបែរជាអាជ្ញាធរដែនដីមិនបានបញ្ជាក់ជូនលើលិខិតស្នាមនោះទេ ថែមទាំងចោទថា ប្រជាពលរដ្ឋបានរស់នៅលើដីរដ្ឋទៅវិញ ខណៈសំណងនៃផលប៉ះពាល់ក៏មិនទាន់ទទួលបាន ហើយដីក៏ត្រូវបានអះអាងថា ជាដីរដ្ឋទៅវិញ។
ស្ត្រីវ័យជាង ៦០ ឆ្នាំរូបនេះបន្ថែមថា៖ «យើងសុំឲ្យអគ្គិសនីកម្ពុជាសងសំណងដែលសាងសង់លើដីរបស់ពួកយើង។ មួយទៀតដីដែលជាកម្មសិទ្ធិចែកឲ្យពលរដ្ឋមកតាំងពីរដ្ឋកម្ពុជាមកឲ្យបញ្ជាក់ដីនេះជាដីស្របច្បាប់របស់ពលរដ្ឋ មានសិទ្ធិកាន់កាប់មានលិខិតស្របច្បាប់ និងចុះហត្ថលេខាទទួលស្គាល់ឲ្យបានត្រឹមត្រូវ។ ពេលយើងត្រូវការដោះដូរ ឬលក់អី អាជ្ញាធរ មិនចុះហត្ថលេខាឲ្យយើងដែលធ្វើឲ្យយើងពិបាកមែនទែន»។
លោក គយ វ៉ាត ពលរដ្ឋតវ៉ាម្នាក់ទៀតប្រាប់ភ្នំពេញប៉ុស្តិ៍ដែរថា ការតវ៉ាពីម្សិលមិញ គឺមានប្រជាពលរដ្ឋប្រមាណ ៦០ នាក់តំណាងឲ្យពលរដ្ឋដែលបាន-ចូលរួមផ្តិតមេដៃជាង ២០០ នាក់ ស្ថិតក្នុងឃុំចំនួន ៣ មានឃុំគគីរ ឃុំឈើទាល និងឃុំដីឥដ្ឋក្នុងស្រុកកៀនស្វាយ។ លោកបន្តថា ក្រោយការប្រមូលផ្តុំនេះអាជ្ញាធរបានទទួលញត្តិរបស់ពលរដ្ឋហើយដោយបានសន្យាថានឹងចុះដោះស្រាយក្នុងពេលឆាប់ៗ។
លោកបន្ថែមថា៖ «យើងឆ្ងល់ថា បើដីនេះជាដីរបស់រដ្ឋចុះហេតុអ្វីបានពីមុន ឃុំ ភូមិ គាត់ចុះហត្ថលេខា? ទាល់មកដល់ឥឡូវម៉េចបានមកចោទយើងថា បានរស់នៅលើដីរដ្ឋវិញ។ រឿងនេះបើមិនមានការដោះស្រាយឲ្យពួកយើងទេ ពួកយើងទាំងអស់គ្នានឹងនាំគ្នាទៅតវ៉ាបន្តទៀត។ ម្តងនេះតវ៉ានៅក្រសួងរៀបចំដែនដី និងតវ៉ារហូតដល់សម្តេចនាយករដ្ឋមន្ត្រី ហ៊ុន សែន តែម្តង»។
លោក គង់ ឆេង មេឃុំគគីរប្រាប់ ភ្នំពេញប៉ុស្តិ៍ថា រដ្ឋាភិបាលពិតជាធ្លាប់ចែកដីជូនពលរដ្ឋក្នុងឃុំទាំង ៣ នេះពិតមែន។ ប៉ុន្តែលោកថា ដីដែលចែកជូនប្រជាពលរដ្ឋគឺនៅឆ្ងាយពីចំណីបឹងដែលមិនមែនស្ថិតក្នុងតំបន់អាងស្តុកទឹក ដូចអ្វីដែលពលរដ្ឋទាំងនោះបានកាន់កាប់បច្ចុប្បន្ននោះទេ។
មេឃុំគគីររូបនេះបន្តថាអាជ្ញាធរមិនទទួលស្គាល់ការរស់នៅរបស់ពលរដ្ឋ ព្រោះរដ្ឋាភិបាលបានចេញ សជណ សម្រេចដាក់ជាតំបន់ជុំវិញអាង ឬបឹង ដែលមានផ្ទៃជាង ១ គីឡូដីហើយផ្ទៃដីព័ទ្ធជុំវិញអាងមានជាង ១០០០ ហិកតាដែលឃុំទាំង ៣ នេះនៅព័ទ្ធជុំវិញ។
លោកបញ្ជាក់ថា៖ «កាលពីមុនរដ្ឋាភិបាលមិនទាន់បានកំណត់ពីផ្ទៃអាងថា មានទំហំ និងនៅកន្លែងណាទេ។ ប៉ុន្តែថ្មីៗនេះ រដ្ឋាភិបាលបានចេញ សជណ ខ្ញុំមិនចាំថ្ងៃទេដោយបានកំណត់ទំហំត្រឹមត្រូវ ហើយភាគច្រើនដែលពលរដ្ឋកាន់កាប់នោះគឺជាដីដែលចូលទៅក្នុងបឹង ឬអាងស្តុកទឹក។ នៅពេលដែលរដ្ឋបានរៀបចំហើយអាជ្ញាធរអគ្គិសនីបានសាងសង់បណ្តាញអគ្គិសនីជុំវិញផ្ទៃអាងនេះ»។
លោក គង់ សោភ័ណ្ឌ អភិបាលខេត្តកណ្តាលប្រាប់ភ្នំពេញប៉ុស្តិ៍ពីម្សិលមិញថា៖ «ក្រុមការងារយើង ជួបគាត់ហើយ។ យើងនឹងសិក្សាសិនពិនិត្យមើលចាំលទ្ធផលយ៉ាងណានោះ យើងនឹងជូនដំណឹងនៅពេលក្រោយ។ ពេលនេះមិនទាន់មានអ្វីអាចប្រាប់បានទេ»៕