.jpg)
ភរិយារបស់លោក រា៉ាត់ រ័ត្នមុនី ប្រធានសហព័ន្ធសហជីពកម្មករសំណង់កម្ពុជា និងមនុស្សប្រមាណ១០នាក់ទៀត ពេលប្រមូលផ្ដុំគ្នាតវ៉ានៅមុខស្ថានទូតរុស្ស៊ី កាលពីថ្ងៃម្សិលមិញ ដើម្បីតវ៉ានិងតាមដានពីលទ្ធផលនៃការសុំអន្តរាគមន៍ដោះលែងលោក រ៉ាត់ រ័ត្នមុនី ក្រោយពីដាក់ញត្តិឲ្យស្ថានទូតរុស្ស៊ី និងប្រធានាធិបតីរុស្ស៊ី។ ហេង ជីវ័ន
ភ្នំពេញៈ ភរិយារបស់លោក រ៉ាត់ រ័ត្នមុនី ប្រធានសហព័ន្ធសហជីពកម្មករសំណង់កម្ពុជា អ្នកស្រី ឡុង គឹមហ៊ាង និងមនុស្សប្រមាណ ១០ នាក់ទៀតបានប្រមូលផ្តុំគ្នាតវ៉ានៅមុខស្ថានទូតរុស្ស៊ីជាលើកទី ២ កាលពីម្សិលមិញដើម្បីតវ៉ា និងតាមដានពីលទ្ធផលនៃដំណើរសុំអន្តរាគមន៍ឲ្យដោះលែងលោក រ៉ាត់ រ័ត្នមុនី ក្រោយពីដាក់ញត្តិឲ្យស្ថានទូតរុស្ស៊ី និងប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីពាក់កណ្ដាលខែធ្នូឆ្នាំមុន។
ការដាក់ញត្តិកន្លងមកបានធ្វើឡើងបន្ទាប់ពីចៅក្រមស៊ើបសួរសាលាដំបូងរាជធានីសម្រេចឃុំខ្លួនលោក រ៉ាត់ រ័ត្នមុនី ជាបណ្តោះអាសន្នកាលពីថ្ងៃ ១៣ ធ្នូដោយចោទពីបទញុះញង់ឲ្យមានការរើសអើងពាក់ព័ន្ធករណីផលិតវីដេអូឯកសារនិយាយពីស្ត្រីខ្មែរលក់ព្រហ្មចារីកូនស្រី។
អ្នកស្រី ឡុង គឹមហ៊ាង បានថ្លែងថាការប្រមូលផ្តុំគ្នាមកតវ៉ាលើកនេះគឺដើម្បីតាមដានថាតើស្ថានទូតមានវិធានការហើយ ឬនៅទាក់ទងនឹងការអន្តរាគមន៍ជួយឲ្យប្តីអ្នកស្រីឲ្យមានសេរីភាពឡើងវិញ។
អ្នកស្រីបញ្ជាក់ថា៖ «ខ្ញុំមកតាមដានញត្តិរបស់ខ្ញុំដែលបានផ្ញើតាមមធ្យោបាយអេឡិចត្រូនិក ពីព្រោះលើកមុនគាត់ក៏អត់បានចេញមកទទួលញត្តិពីពួកយើងដែរ ហើយយើងបានដឹងថាខាងស្ថានីយទូរទស្សន៍រុស្ស៊ីក៏បានផ្ញើលិខិតសុំឲ្យអន្តរាគមន៍ពីស្ថានទូតផងដែរអ៊ីចឹងយើងចង់ដឹងថាគាត់បានធ្វើអ្វីខ្លះហើយដើម្បីជួយប្តីរបស់ខ្ញុំ?»។
អ្នកស្រី ឡុង គឹមហ៊ាង ក៏បានថ្លែងដែរថា ស្ថានភាពសុខភាពប្តីរបស់អ្នកស្រីដែលកំពុងឃុំខ្លួននៅពន្ធនាគារគឺកំពុងមានបញ្ហា ដោយមានសភាពស្គមស្គាំង។
លោកស្រីបញ្ជាក់ថា៖ «កាលពីថ្ងៃចន្ទខ្ញុំបានទៅសួរសុខទុក្ខប្តីក្នុងកន្លែងឃុំឃាំងបានរយៈពេលប្រហែល ៥ នាទី។ គាត់ប្រាប់ខ្ញុំគាត់ដេកអត់សូវលក់ដោយសារកន្លែងចង្អៀតពេកប្តីខ្ញុំគាត់ស្គមខ្លាំងគាត់ដកដង្ហើមថប់ៗ។
គាត់ចង់មានសេរីភាពឡើងវិញ»។
ក្រុមពលរដ្ឋក្នុងពេលមកសុំឲ្យរុស្ស៊ីជួយកាលពីម្សិលមិញ។ផា លីណា
អ្នកស្រី ឡុង គឹមហ៊ាង បានបន្ថែមថាកាលពីថ្ងៃ ២៤ ខែធ្នូ មេធាវីរបស់ប្ដីអ្នកស្រីបានស្នើសុំតុលាការដើម្បីនៅក្រៅឃុំ ប៉ុន្តែត្រូវបានតុលាការបដិសេធជាអ្វីដែលធ្វើឲ្យអ្នកស្រីមានការខកចិត្តយ៉ាងខ្លាំង។
អ្នកស្រីថា៖ «មេធាវីការពារប្តីរបស់ខ្ញុំបានប្រាប់ខ្ញុំថា គេអត់អនុញ្ញាតឲ្យប្តីរបស់ខ្ញុំបាននៅក្រៅឃុំទេ ប៉ុន្តែខ្ញុំមិនទាន់បានទទួលលិខិតជាផ្លូវការនៅឡើយទេ...ខ្ញុំពិតជាខកចិត្តដែលតុលាការនៅតែបន្តឃុំខ្លួនប្តីរបស់ខ្ញុំ គាត់បានបដិសេធការស្នើសុំរបស់យើង។ ខ្ញុំពិតជាអស់ជំនឿទៅលើតុលាការស្រុកយើងណាស់។ ប្តីខ្ញុំគ្រាន់តែជួយបកប្រែ និងសម្របសម្រួលការផលិតភាពយន្តឯកសារទាក់ទងនឹងការជួញដូរមនុស្សក្នុងស្រុកយើង។ អ៊ីចឹងអាជ្ញាធរគួរតែទប់ស្កាត់បទល្មើស ហេតុអ្វីបានជាមកឃុំខ្លួនប្តីខ្ញុំទៅវិញ...ខ្ញុំគ្មានមធ្យោបាយអ្វីផ្សេងទៀតក្រៅពីបន្តការតស៊ូមតិដើម្បីឲ្យប្តីរបស់ខ្ញុំត្រូវបានដោះលែងហើយសុំឲ្យតុលាការដោះលែងគាត់ឲ្យនៅក្រៅឃុំនោះទេ»។
យ៉ាងណាក៏ដោយលោក សំទិត្យសីហា មេធាវីការពារក្តីលោក រ៉ាត់ រ័ត្នមុនី បានប្រាប់ភ្នំពេញប៉ុសិ៍្តកាលពីម្សិលមិញថាលោកនឹងប្តឹងទៅសាលាដំបូងសុំឲ្យកូនក្ដីនៅក្រៅឃុំជាលើកទី ២ ទៀតក្រោយពេលបានដីកាបដិសេធលើកទី ១ ជាផ្លូវការ។
លោកបានបញ្ជាក់ថា៖ «យើងនឹងស្នើសុំជាលើកទី ២ ឲ្យគាត់បាននៅក្រៅឃុំ។ ប្រសិនបើលើកទី ២ តុលាការនៅតែបន្តការបដិសេធ យើងនឹងប្ដឹងទៅសាលាឧទ្ធរណ៍ទៀត។ យើងបាននិយាយតាំងពីដំបូងជាមួយគ្រួសាររបស់កូនក្តីខ្ញុំថាបើតុលាការបដិសេធយើងនឹងបន្តប្តឹងសុំឲ្យគាត់បាននៅក្រៅឃុំ និងប្រមូលភ័ស្តុតាងផ្សេងទៀត»។
គួររំឭកថាលោក រ៉ាត់ រ័ត្នមុនី ប្រធានសហព័ន្ធសហជីពកម្មករសំណង់កម្ពុជាហៅកាត់ថា CCTUF ត្រូវបានអាជ្ញាធរថៃចាប់ខ្លួនកាលពីថ្ងៃទី ៧ ធ្នូឆ្នាំមុនតាមការស្នើសុំពីអាជ្ញាធរកម្ពុជាហើយក្រោយមកបានបញ្ជូនមកកម្ពុជាពាក់ព័ន្ធករណីផលិតភាពយន្តឯកសារដែលនិយាយអំពីការលក់ព្រហ្មចារីមានចំណងជើងថា «ម្តាយខ្ញុំ លក់ខ្ញុំ»។ ភាពយន្តឯកសារនេះត្រូវបានផលិតដោយទូរទស្សន៍រុស្ស៊ី RT ហើយបានចេញផ្សព្វផ្សាយកាលពីថ្ងៃ ១៤ ខែតុលា ឆ្នាំ ២០១៨។
យ៉ាងណាក្ដីនៅមុនបញ្ជូនខ្លួនពីថៃ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិថ្លែងថា វីដេអូឯកសារនោះជាការប្រឌិតធ្វើឲ្យប៉ះពាល់ប្រពៃណីកម្ពុជា និងថាបើតាមម្តាយ និងកូនស្រីឈ្មោះ កែវ ម៉ាឡៃ និងឈ្មោះ ឃៀង ស្រីម៉ិច បានប្រាប់សមត្ថកិច្ចថាឈ្មោះ រ៉ាត់ រ័ត្នមុនី បានប្រាប់ពួកគេទាំង ២ ថា ការថតនោះគឺក្នុងរឿង «ប្រទេសខ្មែរក្រោយរបបប៉ុលពត» ហើយការល្បួងឲ្យពួកគេថតរឿងនោះក៏មានជនបរទេស ៤ រូបជួយថត និងរៀបចំឈុតឆាកផងដែរ។ ប៉ុន្តែពេលដែលឃើញឃ្លីបវីដេអូបែរទៅជារឿង «ម្តាយខ្ញុំ លក់ខ្ញុំ» ធ្វើឲ្យពួកគាត់ខកចិត្ត ហើយបានប្តឹងមកសមត្ថកិច្ច៕
