អ្នកតម្រង់ជួររង់ចាំធ្វើតេស្តរកកូវីដនៅក្រសួងមហាផ្ទៃម្សិលមិញ។ រូប ហ្វេសប៊ុក
ភ្នំពេញៈ ក្រសួងសុខាភិបាលបានរកឃើញអ្នកមានវិជ្ជមានកូវីដ ១៩ ចំនួន ២ នាក់បន្ថែមទៀត ពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា ដែលធ្វើឱ្យចំនួនសរុបនៃអ្នកកើតជំងឺកូវីដក្នុងព្រឹត្តិការណ៍នេះកើនដល់ ៣២ នាក់ ខណៈមនុស្សជាង ១ ម៉ឺននាក់ ក្នុងនោះមានមន្ត្រីទាំងអស់នៅក្រោមឱវាទក្រសួងមហាផ្ទៃបានធ្វើតេស្តពីម្សិលមិញ និងត្រៀមធ្វើតេស្តនៅថ្ងៃនេះទៀត។
ករណីវិជ្ជមាន ២ នាក់ទៀតនេះ មានលោក អ៊ី តារា អាយុ ២១ ឆ្នាំ ស្នាក់នៅជិតវត្តសន្សំកុសល សង្កាត់បឹងទំពុន ខណ្ឌមានជ័យ ដែលធ្លាប់បានស្នាក់នៅជាមួយនឹងអ្នកជំងឺឈ្មោះ ញិល សុខកូឡា ជាបុគ្គលិកនៅ Pedro។
ឯអ្នកជំងឺម្នាក់ទៀតគឺអ្នកនាង ជី ពេជ្រឆារ៉ា អាយុ ២៩ ឆ្នាំ ស្នាក់នៅសង្កាត់ចាក់អង្រែលើ ខណ្ឌមានជ័យជាមន្ត្រីរាជការនៅក្រសួងមហាផ្ទៃដែលបានចូលក្នុងហាង Zendo បឹងកេងកងនៅថ្ងៃទី ២៧ ខែវិច្ឆិកា ដោយមិនបានការពារត្រឹមត្រូវ។
របាយការណ៍ក្រសួងសុខាភិបាលពីម្សិលមិញឱ្យដឹងថា គិតត្រឹមថ្ងៃទី ២៩ ខែវិច្ឆិកាដល់ថ្ងៃទី ៦ ខែ ធ្នូ ឆ្នាំ ២០២០ ក្រសួងបានធ្វើតេស្តអ្នកប៉ះពាល់សរុបចំនួន ១១ ៣០៥ សំណាក ហើយជាមួយគ្នានេះ ក្រសួងក៏បានប្រកាសឱ្យអ្នកដែលបានប៉ះពាល់ទៅនឹង «ព្រឹត្តិការណ៍សហគមន៍ ២៨ វិច្ឆិកា» ទាំងអស់ទៅធ្វើតេស្តលើកទី ២ នៅថ្ងៃទី ៧ ខែធ្នូ ដែលក្រសួងសុខាភិបាលបានរៀបចំទីតាំងនៅបរិវេណក្រសួងមហាផ្ទៃសម្រាប់បុគ្គលិក មន្ត្រីរាជការស៊ីវិល និងនៅថ្ងៃទី ៨ នេះនៅបរិវេណពហុកីឡដ្ឋានជាតិអូឡាំពិក សម្រាប់ប្រជាពលរដ្ឋដែលជាអ្នកប៉ះពាល់ និងនៅតាមមន្ទីរសុខាភិបាលរាជធានី-ខេត្ត។
លោក ស ខេង រដ្ឋមន្ត្រីក្រសួងមហាផ្ទៃបានអំពាវនាវទៅដល់រដ្ឋលេខាធិការ អនុរដ្ឋលេខាធិការ និងអគ្គនាយកទាំងអស់ត្រូវផ្តល់ព័ត៌មានបន្តទៅដល់បុគ្គលិកមន្ត្រីទាំងអស់ដែលបានយកសំណាកកាលពីចុងខែវិច្ឆិកា ត្រូវទៅធ្វើតេស្តជាលើកទី ២ ហើយលោកក៏បានស្នើឱ្យអ្នកដែលមិនទាន់បានយកសំណាកធ្វើតេស្តកាលពីលើកទី ១ ក៏ត្រូវតែមកធ្វើតេស្តជាមួយគ្នានេះដែរ។
លោកថ្លែងពីម្សិលមិញថា៖ «ដើម្បីឱ្យអស់ការសង្ស័យ ក្រសួងសុខាភិបាលត្រូវយកសំណាកទាំងអស់របស់អ្នកដែលធ្វើការនៅក្នុងក្រសួងមហាផ្ទៃ»។
នៅថ្ងៃម្សិលមិញនេះដែរលោក ស ខេង ក៏បានចេញបទបញ្ជាដោយផ្អាកការចេញ-ចូលមកបំពេញការងារជាបណ្តោះអាសន្នក្នុងបរិវេណទីស្តីការក្រសួងមហាផ្ទៃចំពោះមន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារនៅតាមអគ្គនាយកដ្ឋាន និងអង្គភាពនានាក្នុងក្រសួងនេះចាប់ពីថ្ងៃទី ៧ ខែធ្នូរហូតដល់មានការជូនដំណឹងជាថ្មី។
លោកបញ្ជាក់ថា ក្នុងអំឡុងពេលនៃការផ្អាកនេះថ្នាក់ដឹកនាំ និងមន្ត្រីបុគ្គលិកទាំងអស់ត្រូវធ្វើចត្តាឡីស័ករយៈពេល ១៤ ថ្ងៃ ឱ្យបានត្រឹមត្រូវ និងហ្មត់ចត់តាមគោលការណ៍របស់ក្រសួងសុខាភិបាល ហើយដើម្បីធានានូវនិរន្តរភាពការងាររបស់ក្រសួង មន្ត្រីរបស់ក្រសួងទាំងអស់ត្រូវបំពេញការងារពីចម្ងាយតាមរយៈអនឡាញ។
ដោយឡែកយោងតាមចំណារឯកភាពរបស់លោកនាយករដ្ឋមន្ត្រី ហ៊ុន សែន នៅថ្ងៃម្សិលមិញលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានបន្តធ្វើការបិទអគារកាណាឌីយ៉ាទាំងមូលរហូតដល់ថ្ងៃទី ១៧ ខែ ធ្នូ ឆ្នាំ ២០២០។
លោក ម៉ម ប៊ុនហេង បានជម្រាបទៅលោក ពុង ឃាវសែ ប្រធានក្រុមប្រឹក្សាភិបាលធនាគារកាណាឌីយ៉ាថា ដោយសារបុគ្គលិកនៅធនាគារចិនម្នាក់ មានវិជ្ជមានវីរុសកូវីដ ១៩ ហើយបានប្រើប្រាស់ជណ្តើរយន្តរួមគ្នានៅអគារកាណាឌីយ៉ា ដូច្នេះត្រូវបិទអគារកាណាឌីយ៉ាទាំងមូលបន្តទៀតរយៈពេល ១៤ ថ្ងៃគិតចាប់ពីថ្ងៃទី ៣ ខែធ្នូ រហូតដល់ថ្ងៃទី ១៧ ខែធ្នូ។ លោកបញ្ជាក់ថា បុគ្គលិកដែលធ្វើការនៅទីនោះទាំងអស់ត្រូវធ្វើតេស្តជាលើកទី ២ នៅថ្ងៃទី ១៣ ខែធ្នូ និងលើកទី ៣ នៅថ្ងៃទី ១៧ ខែធ្នូ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលក៏បានឱ្យដឹងផងដែរថា ការចម្លងវីរុសកូរ៉ូណាតាមការកាន់ក្រដាសប្រាក់ដែលមានប្រឡាក់ទឹករំអិលផ្លូវដង្ហើមអ្នកមានវីរុសកូវីដ១៩ ដូចជាសំបោរ ឬស្លេស្ម៍ទឹកមាត់ ឬយកដៃខ្ទប់មាត់ពេលក្អកកណ្តាស់ ហើយមិនបានលាងដៃនឹងសាប៊ូ ឬអាល់កុល ឬទឹកជែលសម្រាប់លាងដៃភ្លាមៗទេនោះ រួចយកដៃនោះមកកាន់ក្រដាសប្រាក់ គឺវីរុសនេះនឹងតោងលើក្រដាសប្រាក់នោះ។
លោកស្រីបញ្ជាក់ថា៖ «វីរុសកូវីដ ១៩ អាចរស់នៅលើក្រដាសប្រាក់ កញ្ចក់ និងផ្ទៃផ្សេងៗរហូត ២៨ ថ្ងៃ បើប្រៀបទៅនឹងវីរុសផ្តាសាយធម្មតាមានប្រហែលជា ១៧ ថ្ងៃ។ នេះបើតាមការបញ្ជាក់របស់អ្នកសិក្សាវិទ្យាសាស្ត្រប្រទេសអូស្ត្រាលី ដែលបានចុះផ្សាយនៅថ្ងៃទី ១២ ខែ តុលា ឆ្នាំ ២០២០»។
ជាមួយគ្នានេះកាលពីយប់ថ្ងៃទី ៦ ខែធ្នូ លោកនាយករដ្ឋមន្ត្រី ហ៊ុន សែន បានធ្វើការបញ្ជាក់ជាថ្មីលើបណ្តាញសង្គមរបស់លោកថា មានការបំផ្លើសនានាបានកើតឡើងថា នឹងមានការបិទប្រទេស ឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះហើយបំផុសឱ្យមនុស្សទិញទំនិញត្រៀមទុក។
លោកលើកឡើងថា៖ «ចំពោះមុខពាក្យភូតកុហកបែបនេះក្នុងឋានៈខ្ញុំជាប្រមុខនៃរាជរដ្ឋាភិបាល ខ្ញុំសូមបញ្ជាក់ជូនថា នឹងមិនមានការស្នើសុំដាក់ប្រទេសក្នុងគ្រាមានអាសន្នទាំងមូល ឬមួយផ្នែកណានោះឡើយ ហើយក៏នឹងមិនមានការចេញបទបញ្ជាឱ្យបិទរាជធានីភ្នំពេញដូចការឃោសនាភូតកុហករបស់ជនអាក្រក់នោះដែរ»។ លោក ហ៊ុន សែន បានអំពាវនាវដល់ប្រជាពលរដ្ឋឱ្យស្ងប់ស្ងាត់កុំភ័យស្លន់ស្លោ និងសូមចូលរួមជាមួយរាជរដ្ឋាភិបាលក្នុងការប្រយុទ្ធប្រឆាំងជាមួយកូវីដ ១៩ តាមការណែនាំរបស់ក្រសួងសុខាភិបាល។
បើតាមក្រសួងសុខាភិបាលគិតត្រឹមថ្ងៃម្សិលមិញ កម្ពុជាមានអ្នកវិជ្ជមានវីរុសកូរ៉ូណាចំនួន ៣៤៨ នាក់ (ស្ត្រី ៨១ នាក់) ក្នុងនោះអ្នកព្យាបាលជាសះស្បើយមានចំនួនសរុប ៣០៦ នាក់ និងអ្នកកំពុងព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែមានចំនួន ៤២ នាក់៕
.jpg)
