បាត់ដំបងៈ អាជ្ញាធរស្រុកកំរៀង នៃខេត្តបាត់ដំបង បានឃាត់ខ្លួនមនុស្ស ៣ នាក់កាលពីថ្ងៃទី ២៩ ខែឧសភា ពេលដែលពួកគេកំពុងព្យាយាមនាំមនុស្ស ២៦ នាក់ ឆ្លងដែនចេញទៅ ប្រទេសថៃ។
លោក ណុប ដារ៉ា អភិបាលរងខេត្តបាត់ដំបងបានឱ្យដឹងថា មនុស្សទាំង ៣ នាក់ដែលបានឃាត់ខ្លួនមាន មេខ្យល់មា្នក់ និងតៃកុងរថយន្ត ២ នាក់នេះ ហើយសមត្ថកិច្ចកំពុងកសាងសំណុំរឿងបញ្ជូនទៅតុលាការខេត្ត ដើម្បីអនុវត្តច្បាប់ពាក់ព័ន្ធនឹងការជួញដូរមនុស្សដោយខុសច្បាប់។
លោក ណុប ដារ៉ា បានបញ្ជាក់ថា ជនសង្ស័យជាមេខ្យល់ម្នាក់ឈ្មោះ វង្ស ភឿត ភេទប្រុស អាយុ ២៩ ឆ្នាំ និងអ្នកបើកបរដោយឈ្មោះ គង់ ថង ភេទប្រុស អាយុ ៤០ ឆ្នាំ និងអ្នកបើកបរម្នាក់ទៀតឈ្មោះ កាន់ ឌីណា អាយុ ២៥ ឆ្នាំមុខរបររត់តាក់ស៊ី៕
លោក ណុប ដារ៉ា ថ្លែងថា សមត្ថកិច្ចបានបញ្ជូនពលរដ្ឋទាំង២៦នាក់ ដែលមកតាមមនុស្សទាំង ៣ នាក់នោះ ទៅតាមលំនៅឋានរៀងខ្លួន ក្រោយពីអប់រំពីវិធានសុខាភិបាលរឿងជំងឺឆ្លងកូវីដ ១៩ ដោយមិនបាននាំខ្លួនទៅធ្វើចត្តឡីស័កនោះទេ។
លោក ណុប ដារ៉ា ថ្លែងថា៖ «យើងឃើញពួកគាត់គួរឱ្យអាណិត ព្រោះពួកគាត់ក្រ បានគាត់ធ្វើដើម្បីចិញ្ចឹមប្រពន្ធកូន»។
ទោះយ៉ាងណាក៏ដោយ លោក ដារ៉ា ថ្លែងថា សម្រាប់ពលរដ្ឋដែលជាពលករមកពីប្រទេសថៃ បើឃាត់ខ្លួនបានត្រូវនាំទៅធ្វើចត្តាតាមវិធានរបស់ក្រសួងសុខាភិបាល ដូចជា កាលពីថ្ងៃទី ២៩ ខែឧសភាព សមត្ថកិច្ច បានឃាត់ខ្លួន ប្រជាពលរដ្ឋ ៣ នាក់ ដែលត្រឡប់មកប្រទេសថៃចូលមកកម្ពុជា តាមចំណុចនៃភូមិសាស្ត្រភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់បង ហើយបានបញ្ជូនទៅធ្វើចត្តាឡីស័កនៅអនុវិទ្យាល័យកូនភ្នំ ៣២ តាមការណែនាំរបស់ក្រសួងសុខាភិបាល។
លោក ណុប ដារ៉ា បានឱ្យដឹងថា សមត្ថកិច្ចនៅតែមិនអាចគ្រប់គ្រងបាននូវសត្ថិប្រជាពលរដ្ឋ ដែលលួចចេញពីថៃចូលមកកម្ពុជាវិញនោះទេ ព្រោះថាមានច្រករៀងច្រើន។
លោក ថ្លែងថា៖ «មានពលរដ្ឋមកពីថៃចូលមកកម្ពុជាជាញឹកញាប់ ប៉ុន្តែពេលខ្លះមិនដឹងថា ពួកគាត់មកតាមផ្លូវណាបានមកដល់កម្ពុជាដែរ ហើយពួកគេព្យាយាមគេចចេញពីការធ្វើចត្តាឡីស័ក»៕