ភ្នំពេញ៖ អនុប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន លោក អ៊ុយ សុវណ្ណារិទ្ធ បានទទួលមរណភាពនៅម៉ោង ១១:៣០ នាទីថ្ងៃទី ១៨ មេសានេះ ដោយសារជំងឺកូវីដ ១៩។ រីឯអ្នកចាក់វ៉ាកសាំងនៅក្រសួងវប្បធម៌ម្នាក់ទើបបានរកឃើញមានឆ្លងជំងឺកូវីដ។ នេះបើតាមសេចក្តីជូនដំណឹងរបស់ក្រសួងទាំង ២ នៅថ្ងៃនេះ។
កាលពីល្ងាចថ្ងៃទី ១៤ ខែមេសា ក្រសួងសាធារណការ និងដឹកជញ្ជូនបានប្រកាសពីការរកឃើញមន្ដ្រីចំនួន ៣ រូប ឆ្លងជំងឺកូវីដ ១៩ ក្នុងនោះមានលោក អ៊ុយ សុវណ្ណារិទ្ធ លោកស្រី គង់ ចន្ធូ អនុប្រធានការិយាល័យនៃនាយកដ្ឋានរដ្ឋបាល និងលោក អ៊ុយ សុវណ្ណារ៉ុង ជំនួយការរបស់អនុរដ្ឋលេខាធិការមួយរូបនៃក្រសួងនេះ។
គួរបញ្ជាក់ថា លោកស្រី គង់ ចន្ធូ និងលោក អ៊ុយ សុវណ្ណារ៉ុង គឺជាភរិយា និងជាកូនប្រុសរបស់អ្នកជំងឺកូវីដ ១៩ ដែលបានទទួលមរណភាពនេះ។ ពួកគាត់ទាំង ២ នេះ កំពុងសម្រាកព្យាបាលជំងឺកូវីដ ១៩ នៅមន្ទីរពេទ្យ។
ដោយឡែក ក្រសួងវប្បធម៌ និងវិចិត្រសិល្បៈ បានប្រកាសពីការរកឃើញករណីអ្នកវិជ្ជមានកូវីដ ១៩ ចំនួន ១ ករណី ក្នុងចំណោមអ្នកដែលបានមកចាក់វ៉ាក់សាំងបង្ការជំងឺកូវីដ ១៩ នៅទីស្តីការក្រសួងវប្បធម៌ និងវិចិត្រសិល្បៈ។
យោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈនៅថ្ងៃអាទិត្យ ទី ១៨ ខែមេសានេះ បានឱ្យដឹងថា ក្រសួងសុខាភិបាលបានរកឃើញអ្នកវិជ្ជមានកូវីដ ១៩ ឈ្មោះ ជី ទេពី ភេទស្រី អាយុ ១៩ ឆ្នាំ រស់នៅសង្កាត់ផ្សារចាស់ ខណ្ឌដូនពេញ។
បើតាមក្រសួងនេះ អ្នកជំងឺរូបនេះ មានការពាក់ព័ន្ធជាមួយនឹងអាជីវករលក់ដូរនៅផ្សារចាស់ និងត្រូវជាសាច់ញាតិមន្ត្រីរាជការក្រសួងវប្បធម៌ និងវិចិត្រសិល្បៈ ហើយអ្នកជំងឺនេះ បានមកចាក់វ៉ាក់សាំងបង្ការជំងឺកូវីដ ១៩ នៅទីស្តីការក្រសួងវប្បធម៌ និងវិចិត្រសិល្បៈ នារសៀលថ្ងៃទី ៥ ខែមេសា និងរកឃើញវិជ្ជមានកូវីដ ១៩ កាលពីថ្ងៃ ទី១៣ ខែ មេសា ឆ្នាំ ២០២១។
ក្រសួងវប្បធម៌ និងវិចិត្រសិល្បៈបានប្រកាសដល់មន្រ្តី និងបុគ្គលិករបស់ក្រសួង ក្នុងករណីដែលមានអាការគ្រុនក្តៅ, ក្អក, កណ្តាស់, ឈឺបំពង់ក ឬដកដង្ហើមខ្លីៗ ឬសង្ស័យ សូមមេត្តាប្រញាប់ទៅធ្វើតេស្តរកមេរោគកូវីដ ១៩។
កន្លែងធ្វើតេស្តនេះ មានទីតាំងនៅវិទ្យាល័យបាក់ទូក, វិទ្យាល័យបឹងត្របែក, មណ្ឌលសុខភាពចាក់អង្រែក្រោម, មន្ទីរពេទ្យមិត្តភាពខ្មែរ-សូវៀត, សាលាបឋមសិក្សាសុភមង្គល (ក្រោយផ្សារស៊ិនជូរី បណ្តោះអាសន្ន), វិហារព្រះយ៉េស៊ូច្រមុះជ្រូកស្ទឹងមានជ័យ, ផ្លូវឌួងងៀបជិតរោងចក្រ ឌីន ហាន, ដីឡូត៍ខាងក្រោយផ្សារឯករាជ្យ ៣, មណ្ឌលថែទាំជីវិត (ទីតាំងចាក់សំរាមចាស់ស្ទឹងមានជ័យ)។
ក្រសួងវប្បធម៌ និងវិចិត្រសិល្បៈ បានអំពាវដល់អ្នកពាក់ព័ន្ធផ្ទាល់ឱ្យប្រញាប់ទៅយកសំណាកធ្វើតេស្តនៅកន្លែងទាំងនេះ ហើយចំពោះអ្នកពាក់ព័ន្ធដោយប្រយោលត្រូវធ្វើចត្តាឡីស័ករយៈពេល ១៤ ថ្ងៃនៅផ្ទះ ដោយគោរពតាមវិធានសុវត្ថិភាពរបស់ក្រសួងសុខាភិបាល៕