.jpg)
ភ្នំពេញៈ មន្ត្រីមកពីអគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានថ្លែងថា ផែនការដកហូតឯកសារផ្លូវការពីបុគ្គល ៧០០០០ នាក់បានបញ្ចប់ ៧០ ភាគរយ ឯកសារផ្លូវការដែលចេញឲ្យមិនសមស្របទៅជនអន្តោប្រវេសន៍ដែលភាគច្រើនបំផុតជាជនជាតិវៀតណាម។
លោក ឃុន សំបូរ អគ្គនាយករងនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានថ្លែងថា ក្រុមការងារនេះបានបញ្ចប់កិច្ចការ ៧០ ភាគរយហើយនៃចំនួនមនុស្ស ៧០ ០០០ នាក់។
លោកបានថ្លែងថា៖ «យើងមិនទាន់បានគណនាចំនួនប៉ុន្មានឲ្យច្បាស់នៅឡើយទេនៅថ្ងៃទី ១៥ ខែសីហាយើងនឹងមានកិច្ចប្រជុំមួយ ដើម្បីរាប់ ហើយយើងនឹងដឹងថា តើខេត្តចំនួនប៉ុន្មានដែលយើងបានបញ្ចប់? យើងបានបញ្ចប់ ៧០ ភាគរយ។ យើងបន្តធ្វើដល់ចុងឆ្នាំ ២០១៨»។
លោក សំបូរ បានថ្លែងថាអ្នកដែលមានឯកសាររបស់ខ្លួនត្រូវបានដកហូត ត្រូវគោរពទៅតាមច្បាប់អន្តោប្រវេសន៍ស្នើសុំជាជនអន្តោប្រវេសន៍ជាមុនសិន ហើយបន្ទាប់មកពួកគេស្នើសុំកាតស្នាក់នៅតម្លៃ ២៥ ម៉ឺនរៀល (៦២,៥០ ដុល្លារ) រយៈពេល ១ ដង ២ ឆ្នាំ។
លោកបានថ្លែងថា៖ «យើងមិនទាន់ដឹងនៅឡើយទេថាតើមានចំនួនប៉ុន្មាន បានស្នើសុំស្នាក់នៅទូទាំងប្រទេស? អ្វីដែលយើងគ្រោងធ្វើគឺដំណាច់ឆ្នាំ ២០១៨ សម្រាប់ការដកហូតឯកសារទាំងនោះ»។
អនុក្រឹត្យមួយដែលត្រូវបានអនុម័តកាលពីខែសីហាអនុញ្ញាតឲ្យអាជ្ញាធរលុបឯកសារដូចជា អត្តសញ្ញាណប័ណ្ណ លិខិតឆ្លងដែន សៀវភៅគ្រួសារ ពីជនអន្តោប្រវេសន៍រាប់ពាន់នាក់។
ជនជាតិវៀតណាមរាប់រយនាក់ក្នុងខេត្តកំពង់ឆ្នាំងកំពុងសម្រុកទៅធ្វើកាតស្នាក់នៅ។
លោក ប៉ុល សូត ស្នងការរងនគរបាលខេត្តកំពង់ឆ្នាំងទទួលបន្ទុកផ្នែកអន្តោប្រវេសន៍បានបដិសេធធ្វើអត្ថាធិប្បាយកាលពីម្សិលមិញ។
ទោះយ៉ាងណាក្តីប្រព័ន្ធផ្សព្វផ្សាយក្នុងស្រុកមួយចំនួនបានរាយការណ៍ថា មានគ្រួសារជនជាតិវៀតណាមចំនួន ២០៣៤ គ្រួសារកំពុងរស់នៅក្នុងខេត្តនេះ ពួកគេភាគច្រើនបំផុតកំពុងរស់នៅលើបឹងទន្លេសាបរួមមាន ៧៥៥ គ្រួសារនៅក្នុងក្រុងកំពង់ឆ្នាំង ៨០៦ គ្រួសារក្នុងស្រុកបរិបូណ៌ និងជនជាតិវៀតណាមដទៃៗទៀតនៅក្នុងស្រុកកំពង់ត្រឡាច៕ PS
