.jpg)
កិច្ចប្រជុំរបស់មន្ត្រីក្រសួងមហាផ្ទៃកាលពីថ្ងៃ ៨ ខែកក្កដាថ្មីៗនេះ។ ក្រសួងមហាផ្ទៃ
ភ្នំពេញៈ រដ្ឋលេខាធិការក្រសួងមហាផ្ទៃលោក សក់ សេដ្ឋា អះអាងថា ការបង្កើតសេចក្តីព្រាងអនុក្រឹត្យស្តីពីការគ្រប់គ្រងសន្តិសុខនៅតាមបុរី សណ្ឋាគារ និងផ្ទះសំណាក់ មានសារៈសំខាន់ដើម្បីពង្រឹងសន្តិសុខ និងដោះស្រាយបញ្ហាប្រឈមផ្សេងៗ ខណៈមន្ត្រីសង្គមស៊ីវិលខ្លះ យល់ឃើញស្រដៀងគ្នាដោយរំពឹងថា នឹងជួយដល់សមត្ថកិច្ចក្នុងការទប់ស្កាត់បទល្មើសនានា។
លោក សក់ សេដ្ឋា បានលើកឡើងបែបនេះកាលពីថ្ងៃពុធ គឺ ២ ថ្ងៃ បន្ទាប់ពីមានកិច្ចប្រជុំពិនិត្យសេចក្តីសម្រេចស្តីពីការបង្កើតសេចក្តីព្រាងអនុក្រឹត្យស្តីពីការគ្រប់គ្រងសន្តិសុខនៅតាមបុរី សណ្ឋាគារ និងផ្ទះសំណាក់ កាលពីថ្ងៃទី ៨ ខែកក្កដា ឆ្នាំ ២០១៩ នៅទីស្តីការក្រសួងមហាផ្ទៃ។
លោក សក់ សេដ្ឋា បានប្រាប់ភ្នំពេញប៉ុស្តិ៍ថា អនុក្រឹត្យស្តីពីការគ្រប់គ្រង សន្តិសុខនៅតាមបុរី សណ្ឋាគារ និងផ្ទះសំណាក់នឹងជួយពង្រឹងសន្តិសុខ និងដោះស្រាយបញ្ហាប្រឈមផ្សេងៗដែលអាចកើតមាននៅតាមខុនដូអាផាតមិន សណ្ឋាគារ និងផ្ទះសំណាក់។
លោកបានបញ្ជាក់ថា៖ «ដោយសារមានភាពរីកចម្រើនលឿនទៅ នៅតាមបុរី ខុនដូនិងអគារទំនើបៗ សមត្ថកិច្ចមានការលំបាកក្នុងការទាក់ទង។យើងធ្វើការជជែកគ្នាជាគោលការណ៍ ហើយយើងនឹងតាក់តែងទៅជាអនុក្រឹត្យ ហើយនេះគឺជាការចាប់ផ្តើមប្រជុំលើកដំបូងតែមិនទាន់បានចេញជាលទ្ធផលអ្វីទេ»។
បើតាមលោក សក់ សេដ្ឋា ការប្រជុំនេះគឺជាការពិគ្រោះគ្នាដើម្បីរកវិធីដោះស្រាយបញ្ហាមុនពេលវាអាចកើតឡើងក្នុងពេលណាមួយនៅតាមគោលដៅទាំងនោះ។
លោកបានបន្ថែមថា៖ «នៅពេលមានរឿងអ្វីមួយកើតឡើង តើមន្ត្រីអាជ្ញាធរនឹងធ្វើបែបម៉េចទៅ?យើងជជែកផ្នែកច្បាប់ទេថាយើងត្រូវធ្វើដូចម្តេចនៅពេលដែលវាកើតមាន?»។
លោកបានបន្តទៀតថា ក្រុមការងារនឹងសិក្សាលើបទពិសោធ និងច្បាប់ពីបណ្ដាប្រទេសក្នុងតំបន់អាស៊ាន និងប្រទេសផ្សេងៗថា តើប្រទេសទាំងនោះ គេគ្រប់គ្រង និងដោះស្រាយបញ្ហាដែលអាចកើតមានរបៀបណាហើយថា ក្រុមការងារនឹងពិនិត្យ និងកត់ត្រាបញ្ហាប្រឈមផ្សេងៗ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានស្វាគមន៍និងបានចាត់ទុកអនុក្រឹត្យនេះថា នឹងជួយដល់សមត្ថកិច្ចក្នុងដោះស្រាយបញ្ហាប្រឈមផ្សេងៗដូចជា បញ្ហាគ្រឿងញៀននិងឧក្រិដ្ឋកម្មផ្សេងៗជាដើម។
លោកបញ្ជាក់ថា៖ «កន្លងមកយើងឃើញមានវិធានការច្រើនដូចជា ភូមិឃុំ មានសុវត្ថិភាព ក៏ប៉ុន្តែយើងនៅឃើញមានបញ្ហានៅតែមានទាក់ទងរឿងគ្រឿងញៀន អសន្តិសុខសង្គម បទល្មើសផ្សេងៗ ចោរកម្ម និងលួចប្លន់ផ្សេងៗ យើងសង្ឃឹមថា វិធានការថ្មីនេះនឹងជួយឲ្យសន្តិសុខប្រទេសជាតិមានលក្ខណៈល្អប្រសើរ»។
កន្លងទៅថ្មីៗនេះ បើតាមរបាយការណ៍ក្រសួងមហាផ្ទៃនិងស្នងការដ្ឋានរាជធានីភ្នំពេញឲ្យដឹងថា នៅតាមសណ្ឋាគារនិងផ្ទះសំណាក់គឺជាគោលដៅមួយដែលទាមទារការយកចិត្តទុកដាក់ពីសមត្ថកិច្ចក្នុងការទប់ស្កាត់បទល្មើសដោយសារទីតាំងទាំងនោះត្រូវបានគេយកទៅប្រើប្រាស់ក្នុងការជួញដូរមនុស្ស ជួញដូរផ្លូវភេទ ឬរំលោភបូក រួមនឹងបទល្មើសគ្រឿងញៀនផងដែរ៕
