.jpg)
កិច្ចប្រជុំពិនិត្យពិភាក្សាសេចក្ដីព្រាងច្បាប់ ស្ដីពីបទល្មើសបច្ចេកវិទ្យា កាលពីថ្ងៃទី ៩ ធ្នូ។ ក្រសួងមហាផ្ទៃ
ភ្នំពេញៈ ក្រុមប្រឹក្សានីតិកម្មនៃក្រសួងមហាផ្ទៃកាលពីថ្ងៃទី ៩ ខែធ្នូ បានបន្តពិនិត្យពិភាក្សាសេចក្តីព្រាងច្បាប់ស្តីពីបទល្មើសបច្ចេកវិទ្យាព័ត៌មានជាមួយមន្ត្រីបច្ចេកទេសដើម្បីធានាបាននូវសុចរិតភាព និងប្រមូលធាតុចូលថ្មីៗបន្ថែមទៀតតាមការវិវឌ្ឍនៃបច្ចេកវិទ្យានាពេលបច្ចុប្បន្ន។
តាមរបាយការណ៍នៃកិច្ចប្រជុំរបស់ក្រសួងមហាផ្ទៃបានឲ្យដឹងថា កិច្ចពិភាក្សានេះធ្វើឡើងក្រោមអធិបតីភាពលោក ប៊ុន ហុន និងលោក ឡាំ ជា រដ្ឋលេខាធិការក្រសួងមហាផ្ទៃ និងតំណាងអគ្គនាយកដ្ឋាននានារបស់ក្រសួងមហាផ្ទៃមន្ត្រីជំនាញផ្នែកច្បាប់ និងអង្គភាពជំនាញពាក់ព័ន្ធមួយចំនួនទៀត។
របាយការណ៍នេះបញ្ជាក់ថា៖ «កិច្ចប្រជុំនេះ ធ្វើឡើងដើម្បីសិក្សាបន្តទៅលើសេចក្ដីព្រាងច្បាប់ស្ដីពីបទល្មើសបច្ចេកវិទ្យាព័ត៌មានក្នុងគោលបំណងធានាសុចរិតភាពនៃការប្រើប្រាស់ ការគ្រប់គ្រងប្រព័ន្ធកុំព្យូទ័រ ទិន្នន័យកុំព្យូទ័រ និងការពារសន្តិសុខ សណ្តាប់ធ្នាប់សាធារណៈ ព្រមទាំងការការពារសិទ្ធិសេរីភាពបុគ្គល ដើម្បីបង្ការ ទប់ស្កាត់ និងបង្ក្រាបការប្រព្រឹត្តបទល្មើសតាមប្រព័ន្ធបច្ចេកវិទ្យាព័ត៌មានវិទ្យា»។
លោក ប៉ាង រ៉ាស៊ី អនុប្រធានក្រុមប្រឹក្សានីតិកម្មនៃក្រសួងមហាផ្ទៃបានថ្លែងពីម្សិលមិញថា នេះគឺជាការប្រជុំក្រុមការងារបច្ចេកទេសមុនពេលបន្ដកិច្ចប្រជុំជាមួយអន្តរក្រសួងបន្ថែមទៀតដើម្បីប្រមូលធាតុចូលលើសេចក្ដីព្រាងច្បាប់នេះ។ កិច្ចប្រជុំនេះទទួលបានលទ្ធផលល្អដោយបានកែលម្អលើចំណុចជាច្រើនតាមការផ្ដល់មតិពីក្រុមអ្នកបច្ចេកទេស ខណៈសេចក្ដីព្រាងច្បាប់នេះគ្រោងបញ្ជូនទៅគណៈរដ្ឋមន្ដ្រីនៅឆ្នាំក្រោយ។
លោកថា៖ «យើងបានដឹងហើយថា ច្បាប់ទាក់ទងនឹងបច្ចេកវិទ្យាព័ត៌មាននេះ គឺវាមានការវិវឌ្ឍលឿន ដូច្នេះសេចក្ដីព្រាងដែលយើងបានធ្វើទុកតាំងពី ២-៣ ឆ្នាំមុនមកនោះ ចំណុចមួយចំនួនយើងត្រូវការបញ្ចូលសេចក្ដីបន្ថែមទៀត»។
លោកបញ្ជាក់ថា៖ «ច្បាប់ពីបទល្មើសបច្ចេកវិទ្យាព័ត៌មាននេះមានគោលបំណងការពារទាំងអ្នកប្រើប្រាស់ និងអ្នកផ្ដល់សេវា ជាពិសេសការពារផលប្រយោជន៍សាធារណជនទូទៅទាំងអស់ពីបទល្មើសបច្ចេកវិទ្យាព័ត៌មាន»។
បើតាមរបាយការណ៍ដដែលច្បាប់នេះមាន ៧ ជំពូក ៤៨ មាត្រា ដែលវិសាលភាពអនុវត្តចំពោះបទល្មើសបច្ចេកវិទ្យាព័ត៌មានដែលប្រព្រឹត្តទាំងក្នុង ឬក្រៅព្រះរាជាណាចក្រកម្ពុជានៅពេលអំពើនោះធ្វើឱ្យប៉ះពាល់ដល់រូបវន្តបុគ្គល នីតិបុគ្គល សន្តិសុខ សណ្តាប់ធ្នាប់ របៀបរៀបរយសាធារណៈ ឬផលប្រយោជន៍របស់ព្រះរាជាណាចក្រកម្ពុជា៕
