ឧត្តរមានជ័យៈ ពលរដ្ឋបានអះអាងថាមន្ត្រីយោធាផ្នែកសឹករងស្រុកអន្លង់វែងបានទាមទារឲ្យពួកគាត់សងជំងឺចិត្តចំនួន ២ ម៉ឺនដុល្លារអាមេរិករឿងដណ្តើមគ្នាកាន់កាប់ដីព្រៃសហគមន៍ ខណៈដែលដីព្រៃដែលនៅសេសសល់កំពុងតែមានការប៉ុនប៉ងយកកាំភ្លើងធំទៅដាក់ធ្វើជាទីតាំងកងទ័ពផងដែរ ។
ក្រុមពលរដ្ឋនៅភូមិអូរចាប់ត្រី ឃុំលំទង ស្រុកអន្លង់វែងដែលត្រូវមន្ត្រីយោធាឈ្មោះ វ៉ាន់ លីម៉េង ប្តឹងទៅតុលាការរឿងប៉ះពាល់ដីជាទ្រព្យសម្បត្តិឯកជននោះបានឲ្យដឹងថានៅពេលពួកគាត់ ៤ នាក់បានចូលបំភ្លឺកាលពីថ្មីៗនេះមន្ត្រីតុលាការបានប្រាប់លោកថាលោក លីម៉េង បានទាមទារជំងឺចិត្តម្នាក់ ៥ ពាន់ដុល្លារអាមេរិកថ្លៃកាប់បំផ្លាញដំណាំរបស់គេ។
លោក ឡាយ ឈីម អាយុ ៥១ ឆ្នាំជាចុងចោទម្នាក់ក្នុងចំណោម ៤ នាក់បានអះអាងកាលពីម្សិលមិញថា៖ «វ៉ាន់ លីម៉េង សឹករងស្រុកអន្លង់វែងប្តឹង [យើង] ទៅតុលាការហើយកម្រិតឲ្យសងជំងឺចិត្តម្នាក់ ៥ ពាន់ដុល្លារ។ គេថាពួកខ្ញុំនេះបំផ្លាញដើមស្វាយ ដើមខ្នុរ តែខ្ញុំមិនដែលឃើញដើមស្វាយ ឬបានបំផ្លាញទេ»។
ព្រៃសហគមន៍ក្បាលអូរសូភីគិរីព្រៃស្រោងទំហំ ៦.៣៤៤ ហិកតាដែលត្រូវបានចុះបញ្ជីទទួលស្គាល់ដោយក្រសួងកសិកម្មកាលពីឆ្នាំ ២០០៩ ត្រូវបានគេទន្ទ្រានយកស្ទើរតែអស់។
ក្នុងនោះលោក លីម៉េង ត្រូវបានគេរាយការណ៍ថា មានប្លង់កម្មសិទ្ធិចេញដោយក្រុមនិស្សិតលើផ្ទៃដីប្រមាណជា ៧៥ ហិកតា និងចោទពលរដ្ឋថាបានរំលោភយកដីលោក។
ប៉ុន្តែលោក ឡាយ ឈីម បានសារភាពថា ក្រុមពលរដ្ឋគាត់ ១៣ គ្រួសារបានចូលទៅកាប់ឆ្ការព្រៃសហគមន៍ ដើម្បីដាំដំឡូងកាលពីឆ្នាំ ២០១១ ក្នុង ១ គ្រួសារពី ៥ ទៅ ៦ ហិកតាហើយក៏មិនដែលឃើញលោក លី ម៉េង ចុះទៅតំបន់នោះដែរ។
លោកថា៖ «មានពលរដ្ឋផ្សេងទៀតត្រូវលោក លីម៉េង ប្តឹង។ យើងអ្នកក្រគ្មានលុយសងគេទេ។ គេយកដីយើងទទេហើយមកទារ ៥ ពាន់ដុល្លារទៀត។ យើងមិនបានកាប់ដើមស្វាយ ដើមខ្នុរទេ។ យើងកាន់កាប់បានប្រមាណជា ៦ ឆ្នាំហើយទើបគេប្តឹង។ ពួកខ្ញុំមិនសុខចិត្តទេគឺត្រូវតវ៉ាទៀត»។
លោក កូយ កាន់យ៉ា ព្រះរាជអាជ្ញាតុលាការខេត្តបានឲ្យដឹងថាដោយសារតែសំណុំរឿងច្រើនពេកលោកមិនបានចាំពីរឿងសំណងក្នុងបណ្តឹងនេះទេ។ ប៉ុន្តែលោកបានប្រាប់ភ្នំពេញប៉ុស្តិ៍កាលពី ២ សប្តាហ៍មុនថាពលរដ្ឋត្រូវគេប្តឹងពីបទប៉ះពាល់ទ្រព្យសម្បត្តិឯកជន។
ភ្នំពេញប៉ុស្តិ៍បានព្យាយាមទាក់ទងលោក លីម៉េង ជាច្រើនដងតែលោកមិនទទួលទូរស័ព្ទ។
លោកស្រី ណារ៉េន អ្នកសម្របសម្រួលអង្គការអាដហុកខេត្តបានឲ្យដឹងថា ពលរដ្ឋដែលត្រូវប្តឹង និងគ្រួសារជាង ២០ នាក់បានទៅប្រឹក្សាយោបល់ផ្នែកច្បាប់នៅអង្គការលោកកាលពីម្សិលមិញនៅមុនពេលដែលពួកគាត់សម្រេចដាក់ពាក្យបណ្តឹងសុំអន្តរាគមន៍។
លោក ណារ៉េន បញ្ជាក់ថា៖ «ពលរដ្ឋថាដី [ទំនាស់] នោះព្រៃសហគមន៍។ វាជាដីសាធារណៈរបស់រដ្ឋ ហើយមានការចេញប្លង់ឲ្យបុគ្គលឯកជន វាជាអំពើពុករលួយដែលឃុបឃិតគ្នាចេញប្លង់ដីនេះ»។
លោក អឿន ណាក់ប្រធានសហគមន៍ក្បាលអូរសូភីគិរីព្រៃស្រោងក៏បានឲ្យដឹងផងដែរថារហូតមកដល់នឹងពេលនេះដីព្រៃសហគមន៍នៅសល់តែប្រមាណជា ១ ពាន់ហិកតាប៉ុណ្ណោះ ហើយសត្វព្រៃពិសេសសត្វទន្សោងរាប់រយក្បាល និងការប្រមូលអនុផលព្រៃឈើត្រូវបានបាត់បង់ ហើយអាចនឹងបន្តបាត់បង់ទៀត ដោយសារតែមានមន្ត្រីអាជ្ញាធរស្រុក ១ ក្រុមបានចុះទៅពិនិត្យមើលដីព្រៃនោះកាលពីចុងខែវិច្ឆិកាដើម្បីរកទីតាំងដាក់កាំភ្លើងធំ។
លោក ណាក់ បានសម្ដែងមន្ទិលសង្ស័យថាតម្រូវការដីដាក់កាំភ្លើងធំនោះអាចជាលេសមួយ ដើម្បីប៉ុនប៉ងទន្ទ្រានយកដីសហគមន៍ ខណៈដែលតម្រូវការដី និងតម្លៃកាន់តែខ្ពស់។ ដោយសារតែដីសហគមន៍ចេះតែបន្តបាត់បង់នេះ ប្រធានសហគមន៍រូបនេះបានដាក់លិខិតសុំអន្តរាគមន៍ទៅក្រសួងកសិកម្មកាលពីដើមខែនេះ។
លោក ហោ ជិនវិរៈយុទ្ធ អភិបាលស្រុកអន្លង់វែងបានឲ្យដឹងថាខាងកងទ័ពត្រូវការដីមែនហើយខាងអាជ្ញាធរមូលដ្ឋានបានចុះធ្វើការសិក្សារកទីតាំងឲ្យ។ នៅពេលដែលរកទីតាំងបានតាមលក្ខណៈបច្ចេកទេសហើយទើបធ្វើសំណើទៅថ្នាក់ជាតិដើម្បីពិនិត្យ និងសម្រេច។ ព្រោះវាមិនមែនជាដីកម្មសិទ្ធិរបស់ឯកជនទេ៕