ភ្នំពេញៈ មន្ត្រីអង្គភាពប្រឆាំងអំពើពុករលួយ (ACU) លោក ឃឹម ខុម ដែលរងគ្រោះដោយសារមន្ត្រីនគរបាលខណ្ឌដង្កោប្រើអំពើហិង្សា រំពឹងទទួលបានយុត្តិធម៌ឆាប់ៗ ខណៈលោកស្នងការនគរបាលរាជធានីភ្នំពេញអះអាងថា គ្រោងនឹងកោះហៅភាគីទាំង ២ មកចរចាគ្នាដើម្បីបញ្ចប់រឿង។
គម្រោងចរចាគ្នានេះ បន្ទាប់ពីអធិការរងនគរបាលខណ្ឌដង្កោ ២ នាក់ និងមន្ត្រីនគរបាលចរាចរណ៍ម្នាក់ ត្រូវបានកោះហៅទៅសាកសួរនៅការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ ក្រោយមានអំពើហិង្សាលើមន្ត្រីជាប់កិច្ចសន្យានៃអង្គភាព (ACU) ម្នាក់ ដោយសារយល់ច្រឡំករណីគ្រោះថ្នាក់ចរាចរណ៍មួយនៅភូមិព្រែកថ្លឹង សង្កាត់ព្រែកកំពឹស ខណ្ឌដង្កោ កាលពីយប់ថ្ងៃទី ៩ ខែ មេសា ឆ្នាំនេះ។
លោក ឃឹម ខុម ដែលជាជនរងគ្រោះបានប្រាប់ភ្នំពេញប៉ុស្ដិ៍កាលពីម្សិលមិញថា រហូតមកទល់ពេលនេះ លោកមិនទាន់ត្រូវបានកោះហៅពីករណីមន្ត្រីនគរបាលខណ្ឌដង្កោព្រួតគ្នាប្រើអំពើហិង្សាលើរូបលោកនៅឡើយទេ។
លោកបន្តថា ខណៈលោកមិនទាន់បានទទួលដំណឹងពីលោក ស ថេត ស្នងការនគរបាលរាជធានីភ្នំពេញ ក៏មានមន្ត្រីនគរបាលខណ្ឌដង្កោតែងសុំឲ្យលោកដកពាក្យបណ្ដឹងវិញ ដើម្បីសម្រួលគ្នាក្រៅផ្លូវច្បាប់ ប៉ុន្ដែលោកមិនទាន់បានឆ្លើយតបទេ ដោយរង់ចាំជជែកគ្នានៅចំពោះមុខមន្ត្រីយុត្តិធម៌សិន។
លោក ឃឹម ខុម បញ្ជាក់ថា៖ «តាំងពីកើតមានបញ្ហានេះ ខ្ញុំបានដាក់ពាក្យបណ្ដឹងទៅលោកស្នងការនគរបាលក្រុងរួចហើយ ប៉ុន្ដែមិនទាន់មានដំណឹងទេ។ ទោះយ៉ាងណា ខ្ញុំនៅតែរំពឹងថា ឯកឧត្តមស្នងការ ស ថេត នឹងផ្ដល់យុត្តិធម៌ជូនខ្ញុំ ព្រោះឯកឧត្តម ស ថេត បានជួយពលរដ្ឋរងគ្រោះជាច្រើនមកហើយ ហើយការចរចាឬឲ្យខ្ញុំធ្វើអ្វីផ្សេងទៀតខ្ញុំអត់អាចនិយាយបានទេ ទុកឲ្យច្បាប់ជាអ្នកចាត់ចែង ហើយបើរកឃើញថាខ្ញុំខុសខ្ញុំនឹងទទួលកំហុសតាមច្បាប់»។
លោក ជឹម ស៊ីថា អធិការនគរបាលខណ្ឌដង្កោបានថ្លែងកាលពីម្សិលមិញថា សំណុំរឿងនេះ លោកបានបញ្ជូនទៅដល់ស្នងការដ្ឋាននគរបាលរាជធានីហើយ «ខ្ញុំអត់ផ្ដល់ព័ត៌មានអ្វីបានទេ»។
លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានប្រាប់ភ្នំពេញប៉ុស្ដិ៍ពីម្សិលមិញថា សំណុំរឿងនេះ ត្រូវបានមន្ត្រីជំនាញកោះហៅភាគីជនបង្កមកសួរបន្ថែមរួចហើយ។
លោកថា៖ «យើងសួរនាំខ្លះៗហើយពីហេតុការណ៍ហ្នឹងគាត់បានធ្វើអ្វីខ្លះ? យើងអត់បានឃាត់ខ្លួនគាត់ទេ គ្រាន់តែហៅគាត់មកសួរទេ។រឿងហ្នឹងខ្ញុំបានដឹងអស់ហើយអត់អីទេយើងកំពុងធ្វើការងារហ្នឹងហើយចាំមើលទៅបន្ដិចទៀត ខ្ញុំហៅមកសម្របសម្រួលគ្នាហើយ»។
លោក នាក់ ណារ៉ូ អធិការរងទទួលការងារចរាចរណ៍ខណ្ឌដង្កោ និងលោក ជុំ រដ្ឋា អធិការរងទទួលការងារសណ្ដាប់ធ្នាប់ មិនអាចស្វែងរកការបញ្ជាក់ពីករណីនេះបានទេកាលពីម្សិលមិញ។
តាមពាក្យបណ្ដឹងរបស់លោក ឃឹម ខុម អាយុ ៦៤ ឆ្នាំ រស់នៅភូមិព្រែករទាំង សង្កាត់ព្រែកកំពឹស ខណ្ឌដង្កោ ជាមន្ត្រីអង្គភាពប្រឆាំងអំពើពុករលួយ ដែលបានដាក់ទៅលោក ស ថេត គឺបានប្ដឹងអធិការរងខណ្ឌដង្កោ និងមន្ដ្រីនគរបាលចរាចរណ៍ខណ្ឌដង្កោ ៤ នាក់ ពីបទប្រើអំពើហិង្សាកាលពីយប់ថ្ងៃទី ៩ ខែ មេសា។
លោក ឃឹម ខុម បានរៀបរាប់ថា នៅយប់ថ្ងៃកើតហេតុ ខណៈលោកកំពុងបើករថយន្តម៉ាក Prius តាមផ្លូវ ៥០ ម៉ែត្រ ក៏ស្រាប់តែមានរថយន្ត ១ គ្រឿងទៀតម៉ាក Prius ដែរ បានបើកមកកៀររថយន្តលោកនាំឲ្យខូចខាត ប៉ុន្តែលោកមិនបានដេញតាមរថយន្តនោះទេដោយសារបើកលឿនពេក។ ភ្លាមៗនោះស្រាប់តែមាននគរបាល ១ ក្រុមមានទាំងរថយន្ត និងម៉ូតូប្រហែល ៦ គ្រឿងផង បានបើកដេញពីក្រោយរហូតតាមរថយន្តលោកទាន់ នៅក្នុងវត្តព្រែកថ្លឹង រហូតប្រើហិង្សាយ៉ាងដំណំមិនសួររកហេតុផល បើទោះលោកបានសុំអង្វរ និងសុំឲ្យសួរ នាំរកខុសត្រូវសិនក៏ដោយ។
ពាក្យបណ្ដឹងបញ្ជាក់ថា៖ «ក្នុងនាមខ្ញុំជាជនរងគ្រោះ ខ្ញុំសូមឯកឧត្តមស្នងការយកជនល្មើសដែលប្រព្រឹត្ដការវាយដំមកលើរូបខ្ញុំជាពលរដ្ឋស្លូតត្រង់ រូបរាងស្គមស្គាំងគ្មានអ្វីការពារខ្លួន ហើយជនល្មើសទាំងនេះ ក្រៅពីមានគ្នាច្រើន នៅមានឯកសណ្ឋានជានគរបាលទៀត មកផ្តន្ទាទោសឲ្យបានធ្ងន់ធ្ងរបំផុត និងសុំសងការខូច ខាតថ្នាំព្យាបាល និងជំងឺចិត្ត ៥ ម៉ឺនដុល្លារ»។
តាមបណ្ដាញសារព័ត៌មានក្នុងស្រុកខ្លះបានបង្ហាញអត្តសញ្ញាណជនបង្ករួមមាន៖ លោកវរសេនីយ៍ទោ នាក់ ណារ៉ូ អធិការរងទទួលការងារចរាចរណ៍ខណ្ឌដង្កោ លោកវរសេនីយ៍ត្រី ជុំ រដ្ឋា អធិការរងទទួលការងារសណ្ដាប់ធ្នាប់ និងលោកអនុសេនីយ៍ទោ ម៉េត រតនា មន្ដ្រីនគរបាលចរាចរណ៍ខណ្ឌដង្កោ និងមន្ត្រីនគរបាលខណ្ឌដង្កោមួយចំនួនទៀត ដោយបានចោទថា បានប្រើអំពើហិង្សាលើមន្ត្រី ACU នោះ៕