ភ្នំពេញៈ សហភាពសហព័ន្ធអ្នកសារព័ត៌មានកម្ពុជាស្នើឲ្យមានការផ្សះផ្សាជម្លោះរវាងមន្ត្រីគយព្រែកចាកខេត្តកំពតនិងក្រុមអ្នកសារព័ត៌មានជិត ១០ នាក់ តាមច្បាប់ស្តីពីរបបសារព័ត៌មានវិញចៀសវាងប្រើប្រាស់តាមផ្លូវតុលាការដោយអះអាងថា កន្លងទៅភាគីជម្លោះបានយល់ព្រមបញ្ចប់រឿងរួចទៅហើយ។
ការចេញសេចក្តីថ្លែងការណ៍នេះបានធ្វើឡើងបន្ទាប់មានពាក្យបណ្តឹងជាផ្លូវការមួយរបស់ លោក យី ថុល ប្រធានការិយាល័យគយ និងរដ្ឋាករព្រែកចាកខេត្តកំពត បានប្តឹងទៅតុលាការ កាលពីថ្ងៃចន្ទ ពីបទជេរប្រមាថ និងជ្រៀតជ្រែកដោយខុសច្បាប់ ទៅក្នុងការបំពេញមុខងាររបស់ខ្លួន បន្ទាប់ពីវីដេអូមួយដែលបង្ហាញពីសកម្មភាពទំនាស់ពាក្យសម្តីរវាងមន្ត្រីគយរូបនេះ និងក្រុមអ្នកកាសែត។
សេចក្តីថ្លែងការណ៍របស់សហភាពសហព័ន្ធអ្នកសារព័ត៌មានកម្ពុជាចេញពីម្សិលមិញបានលើកឡើងថា បន្ទាប់ពីឃើញហេតុនៃជម្លោះនេះ ខ្លួនសូមស្នើដល់ភាគីពាក់ព័ន្ធព្រមទាំងស្ថាប័នអនុវត្តច្បាប់ពិចារណាប្រើ
ច្បាប់ស្តីពីរបបសារព័ត៌មាន ដើម្បីអនុវត្តលើបណ្តឹងដែលពាក់ព័ន្ធអ្នកសារព័ត៌មាន និងបានស្វាគមន៍ការផ្សះផ្សាផងដែរ។
សហភាពសហព័ន្ធអ្នកសារព័ត៌មានកម្ពុជាបញ្ជាក់ថា៖ «សូមយកឱកាសនេះ ធ្វើការអំពាវនាវដល់អ្នកសារព័ត៌មាន មេត្តាប្រកាន់ឲ្យបានខ្ជាប់ខ្ជួននូវ ក្រមសីលធម៌វិជ្ជាជីវៈសារព័ត៌មាន ជាពិសេសនៅពេលចុះយកព័ត៌មាន ដោយគប្បីចៀសវាងនូវ ការគំរាមកំហែង ការបំពាន ការរារាំងតួនាទីសមត្ថកិច្ច មន្ត្រីរាជការសាធារណៈ ព្រមទាំងមិនរំលោភបំពានលើរូបរាងកាយ សិទ្ធិ តម្លៃ និងអត្តសញ្ញាណបុគ្គលឯកជន»។
ទន្ទឹមនឹងនេះ ក៏បានស្នើសុំឲ្យដល់ «អ្នកពាក់ព័ន្ធ រួមទាំងមន្ត្រីអង្គភាពរដ្ឋ សូមមេត្តាចៀសវាងការប្រើពាក្យសម្តីប្រមាថ ការប៉ះពាល់រាងកាយ ការឆក់យក និងបំផ្លាញសម្ភារឧបករណ៍យកព័ត៌មាននានារបស់អ្នកសារព័ត៌មាន ដោយសហការពេញលេញផ្តល់ព័ត៌មានដល់អ្នកសារព័ត៌មាន ដើម្បីរួមគ្នាលើកកម្ពស់ «សិទ្ធិទទួលបានព័ត៌មាន» និងលើកកម្ពស់ការផ្សព្វផ្សាយព័ត៌មានដែលមានគុណប្រយោជន៍ដល់សាធារណជន»។
លោក ម៉ាន់ បូរេត ប្រធានលេខាធិការដ្ឋានរដ្ឋបាលតុលាការខេត្តកំពត បានឲ្យដឹងថា ផ្នែករដ្ឋបាលបានទទួលពាក្យបណ្តឹងនេះតាំងពីថ្ងៃចន្ទ និងបានបញ្ចូនទៅតំណាងអយ្យការដើម្បីសម្រេច។ តែលោកបញ្ជាក់ថា ការសម្រេចយ៉ាងណានោះ លោក មិនអាចបញ្ជាក់បានទេគឺអាស្រ័យទៅលើស្ថាប័នអយ្យការ។
ចំណែកលោក ខាន់ សុផល ព្រះរាជអាជ្ញារង និងជាអ្នកនាំពាក្យសាលាដំបូងខេត្តកំពតបានប្រាប់ភ្នំពេញប៉ុស្តិ៍ពីម្សិលមិញថា សុំណុំរឿងនេះ បានមកដល់ដៃស្ថាប័នអយ្យការហើយ តែមិនទាន់បានពិនិត្យ និងសម្រេច យ៉ាងណានោះទេ។
លោកថា៖ «យើងទើបតែបានទទួលមិនទាន់បានចាត់ចែងយ៉ាងណាទេ ហើយចំពោះសំណើ (ទម្លាក់ចោល) នេះ»។
លោក សៅ បូផាន់ មេធាវីការពារក្តីលោក យី ថុល បានប្រាប់ភ្នំពេញប៉ុស្តិ៍ពីម្សិលមិញថាករណីនេះលោកមានភ័ស្តុតាងគ្រប់គ្រាន់ដើម្បីចោទប្រកាន់ក្រុមអ្នកសារព័ត៌មានទាំងជិត ១០ នាក់នោះតាមផ្លូវតុលាការ។
ជាមួយគ្នានោះ លោកក៏បាន បដិសេធតំណាងឲ្យកូនក្តីចំពោះការផ្សះផ្សា និងសម្របសម្រួលក្រៅផ្លូវតុលាការណាមួយ ដែលចង់បញ្ចប់រឿងនេះផងដែរ។
លោកថា៖ «ចំពោះខាងក្រុមមេធាវីខ្ញុំ ពួកខ្ញុំបានប្រមូលភ័ស្តុតាងដាក់ហ្នឹងគឺបានធ្វើការចោទហើយ។ រឿងធ្វើការចរចាបញ្ចប់រឿងអីខ្ញុំមិនអាចទទួលថា ត្រូវតែបញ្ចប់យ៉ាងម៉េចទេ ព្រោះអីខាងស្ថាប័នគយ គេតម្រូវឲ្យខ្ញុំធ្វើការរឿងហ្នឹងត្រូវតែធ្វើការបើកការចោទប្រកាន់។ចំពោះរឿងសម្របសម្រួលខាងស្ថាប័នគយមិនបានប្រាប់ខ្ញុំថាត្រូវសម្របសម្រួលទេដោយឲ្យធ្វើតាមច្បាប់។ ច្បាប់គេធ្វើម៉េចធ្វើតាមអ៊ីចឹងទៅ»។
វីដេអូរយៈពេលជាង ២ នាទី ដែលត្រូវបានបង្ហោះបានបង្ហាញពីសកម្មភាពប៉ះទង្គិចរវាងមន្ត្រីគយជាមួយអ្នកកាសែតមួយក្រុមដោយមានទាំងការដកយកទូរស័ព្ទពីអ្នកកាសែតផង។
ប៉ុន្តែក្រោយមកភាគីទាំង ២ យល់ព្រមទទួលកំហុសរៀងៗខ្លួន និងធ្វើការសុំទោសគ្នាទៅវិញទៅមកដើម្បីបញ្ចប់ជម្លោះនេះផងដែរ។ តែក្រោយមានការបង្ហោះនិងការរិះគន់ជាហូរហែទើបបណ្តាលលោក យី ថុល អាយុ ៤១ ឆ្នាំ តំណាងឲ្យការិយាល័យគយ និងរដ្ឋាករ ព្រែកចាកនៃសាខាគយ និងរដ្ឋាករខេត្តកំពតបានដាក់ពាក្យប្តឹង ដើម្បីទាមទារសំណងពីក្រុមអ្នកយកព័ត៌មានទាំងនោះចំនួន ១០ ម៉ឺនដុល្លារ៕