ភ្នំពេញៈ កម្ពុជានៅតែបន្តរកឃើញអ្នកតេស្តចេញលទ្ធផលវិជ្ជមានជំងឺកូវីដ ១៩ ខណៈការសិក្សាថ្មីរបស់អង្គការសុខភាពពិភពលោក រកឃើញថាការរាតត្បាតជំងឺនេះធ្វើឱ្យប៉ះពាល់ការផ្តល់សេវាសុខភាពផ្លូវចិត្តដល់ទៅ ៩៣ ភាគរយក្នុងប្រទេសចំនួន ១៣០ ទូទាំងពិភពលោក និងធ្វើឱ្យមានការភ័យខ្លាចដែលបង្កឱ្យប៉ះពាល់សុខភាពផ្លូវចិត្តធ្ងន់ធ្ងរ។
ក្រសួងសុខាភិបាលឱ្យដឹងពីថ្ងៃទី ៥ តុលា ថាកម្ពុជាបានរកឃើញអ្នកធ្វើតេស្តវិជ្ជមានជំងឺកូវីដ ១៩ ថ្មីចំនួន ២ នាក់ទៀត។ ម្នាក់ជាបុរសជនជាតិបារាំង អាយុ ២៧ ឆ្នាំ ស្នាក់នៅក្រុងសៀមរាប និងម្នាក់ទៀតជាស្ត្រីជនជាតិឥណ្ឌា អាយុ ៣៤ ឆ្នាំស្នាក់នៅក្នុងសណ្ឋាគារមួយនៅរាជធានីភ្នំពេញ។
យោងតាមក្រសួងសុខាភិបាលគិតត្រឹមថ្ងៃទី ៥ ខែតុលា មានអ្នកឆ្លងជំងឺកូវីដ ១៩ ទូទាំងប្រទេសសរុបចំនួន ២៨០ នាក់ ក្នុងនោះមាន ២៧៥ នាក់ ត្រូវបានព្យាបាលជាសះស្បើយ និង ៥ នាក់ កំពុងសម្រាកព្យាបាលនៅមន្ទីរពេទ្យ។
តាមការរកឃើញរបស់អង្គការសុខភាពពិភពលោក (WHO) ឱ្យដឹងពីម្សិលមិញថា ការរាតត្បាតជំងឺកូវីដ១៩បានរំខាន ឬបញ្ឈប់សេវាកម្មសុខភាពផ្លូវចិត្តសំខាន់ៗចំនួន ៩៣% នៅបណ្តាប្រទេសទូទាំងពិភពលោក ខណៈតម្រូវការសុខភាពផ្លូវចិត្តកំពុងកើនឡើង។
ការស្ទង់មតិថ្មីរបស់ WHO ដែលបានទទួលទិន្នន័យពីបណ្តាប្រទេសចំនួន ១៣០ ក្នុងរយៈពេល ៣ ខែគឺវាជាទិន្នន័យពិភពលោកដំបូងបង្អស់។ នេះបង្ហាញពីផលប៉ះពាល់ដ៏អាក្រក់ដែលបណ្តាលមកពីជំងឺកូវីដ ១៩ លើលទ្ធភាពទទួលបានសេវាសុខភាពផ្លូវចិត្ត ដែលទាមទារឱ្យមានតម្រូវការបន្ទាន់សម្រាប់ការបង្កើនមូលនិធិនេះ។
កន្លងមកអង្គការសុខភាពពិភពលោកលើកឡើងថា បញ្ហាសុខភាព ផ្លូវចិត្តរ៉ាំរ៉ៃ ក្នុងអំឡុងពេលមានរោគរាតត្បាតគឺប្រទេសជាច្រើនត្រូវចំណាយយ៉ាងតិចជាង ២ ភាគរយនៃថវិកាសុខភាពជាតិរបស់ពួកគេទៅលើបញ្ហាសុខភាពផ្លូវចិត្ត និងការជម្នះរបស់ខ្លួន ដើម្បីបំពេញតម្រូវការរបស់ប្រជាជន។
WHO ថា៖ «រោគរាតត្បាត គឺមានការកើនឡើងនូវតម្រូវការសម្រាប់សេវាសុខភាពផ្លូវចិត្ត។ ការទុកចោល ភាពឯកោ ការបាត់បង់ប្រាក់ចំណូល និងការភ័យខ្លាចបានបង្កឱ្យមានស្ថានភាពសុខភាពផ្លូវចិត្ត ឬវិវត្តន៍កាន់តែធ្ងន់ធ្ងរទៅ។ មានមនុស្សជាច្រើនអាចប្រឈមនឹងការកើនឡើងនៃការប្រើប្រាស់គ្រឿងស្រវឹង និងគ្រឿងញៀន ការគេងមិនលក់ស្រមើស្រមៃច្រើន និងការថប់អារម្មណ៍»។
បើតាមអង្គការសុខភាពពិភពលោកបានឱ្យដឹងថា ការស្ទង់មតិនេះត្រូវបានចេញផ្សាយមុនព្រឹត្តិការណ៍សុខភាពផ្លូវចិត្តដែលជាព្រឹត្តិការណ៍ដ៏ធំមួយរបស់ខ្លួននៅថ្ងៃទី ១០ ខែតុលា។ វាជាព្រឹត្តិការណ៍តស៊ូមតិតាមអ៊ីនធឺណិតទូទាំងពិភពលោកដែលនឹងប្រមូលផ្តុំដោយមេដឹកនាំពិភពលោកល្បីៗ និងអ្នកតស៊ូមតិដើម្បីអំពាវនាវឱ្យមានការបង្កើនការវិនិយោគលើសុខភាពផ្លូវចិត្ត ក្នុងអំឡុងពេលកូវីដ១៩។
លោកនាយករដ្ឋមន្ត្រី ហ៊ុន សែន ថ្លែងកាលពីថ្ងៃទី ៤ តុលា ថានៅពេលជំងឺកូវីដ ១៩ កំពុងវាយលុកនៅទូទាំងពិភពលោកធ្វើឱ្យមានការផ្លាស់ប្តូរនូវទម្លាប់រស់នៅទម្លាប់ធ្វើការងារ និងទម្លាប់ប្រាស្រ័យទាក់ទងគ្នាដែលមិនធ្លាប់មានពីមុន ដូចជាការពាក់ម៉ាស់ និងនៅឆ្ងាយគម្លាតដាច់ពីគ្នាជាដើម។
លោកមានប្រសាសន៍ថា៖ «ដោយសារជំងឺកូវីដ ១៩ ពុំទាន់មានថ្នាំព្យាបាល ហើយឆ្លងរីករាលដាលលឿន សូម្បីតែប្រធានាធិបតីអាមេរិកក៏មានឆ្លងជំងឺនេះដែរ ដូច្នេះសូមបងប្អូនប្រជាពលរដ្ឋប្រុងប្រយ័ត្នខ្ពស់ជាប់ជានិច្ច ដោយឧស្សាហ៍ដុសលាងសម្អាតដៃជាមួយសាប៊ូ ជែល ទឹកអាល់កុល និងពាក់ម៉ាស់ទៅតាមស្ថានភាព និងតម្រូវការចាំបាច់ជាក់ស្តែង។ សូមកុំមើលស្រាលនឹងធ្វេសប្រហែសចំពោះជំងឺកូវីដ ១៩ ឱ្យសោះ»។
លោក ស៊ាន សុខផៃ នាយកប្រតិបត្តិនៃបណ្តាញទូរស័ព្ទជំនួយកុមារកម្ពុជា ដែលជាអង្គការផ្តល់ប្រឹក្សាផ្នែកបញ្ហាផ្លូវចិត្តប្រាប់ភ្នំពេញប៉ុស្តិ៍ពីម្សិលមិញថា ស្ថានភាពបញ្ហាផ្លូវចិត្តនៅប្រទេសកម្ពុជាកាលពីមិនទាន់មានជំងឺកូវីដ ១៩ គឺមានចំនួនច្រើនស្រាប់មកហើយ ព្រោះក្នុង ១ ឆ្នាំៗមានអ្នកហៅទូរស័ព្ទមកប្រឹក្សាយោបល់ពីបញ្ហាផ្លូវចិត្តចន្លោះពី ៦ ០០០-៧ ០០០ នាក់។ លោកថា ដល់ដំណាក់កាលស្ថិតក្នុងអំឡុងពេលនៃការរីករាលដាលនៃជំងឺនេះទៀត អ្នកមានបញ្ហាផ្លូវចិត្តក៏កាន់តែមានចំនួនច្រើនឡើងទ្វេដងផងដែរ ខណៈកន្លែងផ្តល់ប្រឹក្សាផ្នែកផ្លូវចិត្តមានការខ្វះខាត។
លោកបន្ថែមថា៖ «យើងមានកង្វះ ធនធានថវិកាគឺមាន ២ ផ្លូវ ដោយ ១ គឺមកពីស្ថាប័នដែលមិនមានថវិកាគ្រប់គ្រាន់ក្នុងដំណើរការកម្មវិធី និង ១ ទៀតគឺប្រជាជនខ្មែរមិនមានថវិកាដើម្បីទទួលបានសេវាប្រឹក្សាយោបល់ផ្នែកបញ្ហាផ្លូវចិត្ត។ រាល់ឆ្នាំតាមដែលខ្ញុំដឹងថវិកាសម្រាប់គាំទ្រកម្មវិធីសុខភាពផ្លូវចិត្ត គឺតិចតួចបំផុត»៕
វីដេអូ៖