ភ្នំពេញ៖ មនុស្សជិត ១ ០០០ នាក់ ត្រូវបានក្រសួងសុខាភិបាលរកឃើញមានឆ្លងវីរុសកូវីដ ១៩ ក្នុងរយៈពេល ១ ថ្ងៃ ស្របពេលដែលមានអ្នកជាសះស្បើយចំនួន ៣៦១ នាក់ និងមានអ្នកទទួលមរណភាពដោយសារជំងឺកូវីដ ១៩ បន្ថែមចំនួន ០១ នាក់ទៀត។
យោងតាមសេចក្តីប្រកាសរបស់ក្រសួងសុខាភិបាល ដែលបានចេញផ្សាយនៅព្រឹកថ្ងៃអង្គារ ទី ០៤ ខែឧសភានេះ បានឱ្យដឹងថា ក្រសួងរកឃើញអ្នកឆ្លងថ្មីបន្ថែមទៀតចំនួន ៩៣៨ នាក់ ក្នុងនោះរាជធានី ភ្នំពេញមានចំនួនឆ្លងច្រើនជាងគេ រហូតដល់ ៦០៨ នាក់។
ខេត្តដែលមានឆ្លងច្រើនបន្ទាប់ មានខេត្តកណ្តាល ដែលមានចំនួន ១៧៥ នាក់ ខេត្តព្រះសីហនុ ចំនួន ៧៧ នាក់ ខេត្តបន្ទាយមានជ័យ ចំនួន ៥១ នាក់ ខេត្តកំពង់ស្ពឺចំនួន ១៤ នាក់ ខេត្តតាកែវ ៤ នាក់ ខេត្តកំពង់ចាម ៣ នាក់ ខេត្តត្បូងឃ្មុំ ២ នាក់ និងខេត្ត ៥ ផ្សេងទៀតមានករណីឆ្លងចំនួន ០១ នាក់ដូចគ្នា គឺខេត្តពោធិ៍សាត់ ស្វាយរៀង បាត់ដំបង ប៉ៃលិន និងខេត្តសៀមរាប។
ជាមួយគ្នានេះដែរ ករណីអ្នកជំងឺជាបុរសជនជាតិខ្មែរម្នាក់ អាយុ ៨១ ឆ្នាំ បានស្លាប់នៅមន្ទីរពេទ្យបង្អែកខេត្តព្រះសីហនុ កាលពីថ្ងៃទី ០៣ ខែឧសភា ដោយមានការរលាកសួតធ្ងន់ធ្ងរ ដោយសារជំងឺកូវីដ ១៩។
គិតត្រឹមព្រឹក ថ្ងៃទី ០៤ ខែ ឧសភា ឆ្នាំ ២០២១ នេះ កម្ពុជាមានអ្នកឆ្លងវីរុសកូវីដ ១៩ សរុបចំនួន ១៦ ២៩៩ នាក់ អ្នកជាសះស្បើយចំនួន ៥ ៧៩១ នាក់ អ្នកកំពុងសម្រាកព្យាបាលចំនួន ១០ ៣៩៤ នាក់ និងអ្នកស្លាប់បានកើនឡើងដល់ចំនួន ១០៧ នាក់៕