.jpg)
លោក វ៉ី សំណាង អភិបាលខេត្តកំពង់ស្ពឺ។ ហេង ជីវ័ន
កំពង់ស្ពឺៈ ក្រៅពីបានចេញដីកាសម្រេចដកហូតអតីតដីព្រៃឈើចំនួន ៩ ទីតាំង មានផ្ទៃដីសរុបចំនួន ២៦៦,៣១ ហិកតា ទុកជាសម្បត្តិរដ្ឋវិញនៅក្នុងភូមិសាស្ត្រឃុំតាសាល និងឃុំត្រពាំងជោរ ស្រុកឱរ៉ាល់ រដ្ឋបាលខេត្តកំពង់ស្ពឺ កាលពីថ្ងៃទី ១៦ ខែមីនា រដ្ឋបាលខេត្តក៏កំពុងស្វែងរកជនល្មើសដែលបានចូលទៅកាប់ទន្ទ្រានរានយកដីព្រៃរដ្ឋទាំងនេះ យកមកផ្តន្ទាទោសផងដែរ។
លោក វ៉ី សំណាង អភិបាលខេត្តកំពង់ស្ពឺប្រាប់ ភ្នំពេញ ប៉ុស្តិ៍ ពីម្សិលមិញថា មូលហេតុដែលរដ្ឋបាលខេត្តដកហូតអតីតដីព្រៃឈើយកមកធ្វើជាសម្បត្តិរដ្ឋវិញនេះដោយសារមានជនមិនស្គាល់អត្តសញ្ញាណបានចូលទៅកាប់ទន្ទ្រានកាន់កាប់យកធ្វើជាកម្មសិទ្ធិដោយខុសទៅនឹងច្បាប់។
បើទោះបីពេលនេះ រដ្ឋបាលខេត្តបានដកហូតដីព្រៃយកមកធ្វើជាសម្បត្តិរដ្ឋវិញក្តី ប៉ុន្តែសម្រាប់ជនល្មើស រដ្ឋបាលខេត្តមិនលើកលែងនោះទេ គឺត្រូវតែស្វែងរកជនល្មើសនោះ និងបុគ្គលទាំងឡាយណាដែលជាប់ពាក់ព័ន្ធនឹងករណីនេះដើម្បីឃាត់ខ្លួន និងបញ្ជូនទៅតុលាការ អនុវត្តតាមនិតិវិធីច្បាប់ជាធរមាន។
ទោះជាយ៉ាងណាលោក វ៉ី សំណាង បានបញ្ជាក់ថា រហូតមកទល់ពេលនេះ រដ្ឋបាលខេត្តមិនទាន់បានកំណត់អត្តសញ្ញាណ បុគ្គលណាម្នាក់ ឬក្រុមណាមួយដែលជាប់ពាក់ព័ន្ធករណីកាប់ទន្ទ្រានដីព្រៃនេះនៅឡើយទេ។
លោកបានបញ្ជាក់ថា៖ «យើងកំពុងស្រាវជ្រាវស្វែងរកជនពាក់ព័ន្ធទន្ទ្រានដីនេះទាំងអស់ចាប់ពីថ្ងៃដែលជូនដំណឹងតទៅ។ ការស្រាវជ្រាវនេះ គឺមិនចប់ឥឡូវទេគឺនឹងនៅតែបន្តស្វែងរករហូតដល់ ១០ ឆ្នាំក្រោយទៀត ដើម្បីស្វែងរកមុខជនល្មើសឱ្យឃើញ ដើម្បីបញ្ជូនទៅតុលាការអនុវត្តវិធីច្បាប់។ យើងអត់លែងទេ» ។
លោក រ័ត្ន ថាវី មន្ត្រីសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តកំពង់ស្ពឺបានស្វាគមន៍ និងគាំទ្រចំពោះចំណាត់ការរបស់រដ្ឋបាលខេត្តដែលបានដកហូតដីព្រៃឈើពីជនមានអំណាចយកមកធ្វើជាសម្បត្តិរដ្ឋវិញនេះ។ ប៉ុន្តែលោកថ្លែងថា ឱ្យតែការដកហូតនេះស្របទៅតាមច្បាប់ និងដកយកមកទុកជាសម្បត្តិរដ្ឋពិតប្រាកដកុំឱ្យដកពីអ្នកនេះ រួចឱ្យទៅអ្នកនោះវិញ លោកមិនគាំទ្រនោះទេ និងមិនអាចទទួលយកបានទេ។
យ៉ាងណាក៏ដោយលោក រ័ត្ន ថាវី ថ្លែងថា លោកពិបាកកំណត់ចំណាំដីនៅក្នុងខេត្តកំពង់ស្ពឺនេះ ព្រោះអាជ្ញាធរមិនបានបង្ហាញជាសាធារណៈថា តើដីណាជាដីសាធារណៈរបស់រដ្ឋ ដីណាជាដីឯកជនរបស់រដ្ឋ ឬជាដីឯកជននោះទេ។ ប៉ុន្តែលោកបានទទួលស្គាល់ថា នៅក្នុងខេត្តកំពង់ស្ពឺនេះ ពិតជាមានការចូលទៅកាប់ទន្ទ្រានដីរដ្ឋ ដែលភាគច្រើនអាចជាអ្នកមានលុយ ឬអ្នកមានអំណាច ។
លោក រ័ត្ន ថាវី បញ្ជាក់ថា៖ «បើអាជ្ញាធរយកដីរបស់ប្រជាពលរដ្ឋ ប្រាកដណាស់នឹងមានការតវ៉ាហើយ។ ប៉ុន្តែបើដីនោះជាដីរបស់ឈ្មួញ ឬអ្នកមានអំណាចចូលទៅទន្ទ្រានយកកាន់កាប់ដោយខុសច្បាប់ អ្នកនោះមិនហ៊ានចូលខ្លួនប្តឹងតវ៉ាទេ ។ យ៉ាងណា ការដកហូតដីពីនរណាម្នាក់ គេទុកពេលឱ្យមានការប្តឹងជំទាស់ដែរ»។
ជាមួយគ្នានេះលោក រ័ត្ន ថាវី បានអំពាវនាវឱ្យអាជ្ញាធរស្វែងរកចាប់ជនល្មើសឱ្យបានឆាប់ ដើម្បីផ្តន្ទាទោសទៅតាមច្បាប់ព្រោះករណីនេះ មិនពិបាករកនោះទេ។ លោកថ្លែងថា៖ «បើអាជ្ញាធរបង្ហាញឆន្ទៈក្នុងការស្វែងរកគឺមិនយូរនោះទេនឹងចាប់ជនល្មើសយកមកអនុវត្តតាមនិតិវិធីច្បាប់។ ប៉ុន្តែ បើអាជ្ញាធរមានចេតនាក្នុងការលាក់បាំងជនល្មើស ឬពន្យារពេលក្នុងការស្វែងនឹងធ្វើឱ្យជនល្មើសបានចិត្ត និងបន្តឱ្យមានបទល្មើសកើតឡើងថែមទៀត បើមិនបានចាប់យកមកផ្តន្ទាទោសតាមច្បាប់»៕
