សៀមរាប: រដ្ឋបាលខេត្តសៀមរាបបញ្ជាឲ្យអាជ្ញាធរពាក់ព័ន្ធចាត់វិធានការចំពោះជនខិលខូច ដែលកាប់រាន ដុត ឈូសឆាយ និងហ៊ុមព័ទ្ធដីព្រៃឈើ ដីព្រៃលិចទឹក និងដីតំបន់ការពារធម្មជាតិយកធ្វើជាកម្មសិទ្ធិ និងបានជំរុញឲ្យអង្គភាពជំនាញត្រូវបញ្ឈប់ជាបន្ទាន់នូវរាល់ការបញ្ជាក់លើលិខិតទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់ដែលមានទីតាំងនៅលើដីការពាររបស់រដ្ឋ ឬដីសហគមន៍។
តាមសេចក្ដីជូនដំណឹងរបស់រដ្ឋបាលខេត្តសៀមរាបចុះថ្ងៃទី ១៩ ខែកញ្ញា ដែលភ្នំពេញប៉ុស្ដិ៍ទើបទទួលបានកាលពីម្សិលមិញឲ្យដឹងថា ដោយពិនិត្យឃើញតំបន់សហគមន៍ព្រៃឈើ តំបន់ព្រៃលិចទឹក និងតំបន់ការពារធម្មជាតិមួយចំនួនស្ថិតនៅក្នុងភូមិសាស្ត្រខេត្តសៀមរាបត្រូវបានបុគ្គលមួយចំនួនបានបំផុសបំផុលឲ្យធ្វើការកាប់រាន ដុត ឈូសឆាយរុករានទន្ទ្រាន ហ៊ុមព័ទ្ធ បែងចែកកាន់កាប់ដីព្រៃឈើ ដីព្រៃលិចទឹក ដីតំបន់ការពារធម្មជាតិ ការទិញ-លក់ដីរដ្ឋ ក្រោមលេសខ្វះដីអាស្រ័យផល ឬបង្កបង្កើនផល និងលេសថា មានការកាត់ដីសម្រាប់សហគមន៍ប្រើប្រាស់អាស្រ័យផល។
រដ្ឋបាលខេត្តសៀមរាបបន្តថា ដើម្បីពង្រឹងប្រសិទ្ធភាពនៃការគ្រប់គ្រងតំបន់សហគមន៍ព្រៃឈើ តំបន់ព្រៃលិចទឹក និងតំបន់ការពារធម្មជាតិទាំងនេះ អាជ្ញាធរពាក់ព័ន្ធត្រូវបញ្ឈប់ជាបន្ទាន់នូវរាល់ការបំផុសបំផុល ទោះនីតិបុគ្គល ឬរូបវន្តបុគ្គលណាក៏ដោយ ក៏ពុំមានសិទ្ធិកាប់រានដីព្រៃ កាន់កាប់ និងបែងចែកដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើ សហគមន៍តំបន់ការពារធម្មជាតិ និងនៅក្នុងតំបន់ការពារធម្មជាតិនោះទេ។
រដ្ឋបាលខេត្តបន្តថាក្នុងនោះត្រូវបញ្ឈប់ជាបន្ទាន់នូវរាល់សកម្មភាពល្មើសច្បាប់ដូចជាការឈូសឆាយ កាប់ឆ្ការ ដុត រុករានទន្ទ្រានហ៊ុមព័ទ្ធបែងចែកដីព្រៃឈើ ដីព្រៃលិចទឹក និងការដាំដុះដំណាំលើដីសហគមន៍ព្រៃឈើ ដីព្រៃលិចទឹក។
សេចក្ដីជូនដំណឹងបញ្ជាក់ថា៖ «អាជ្ញាធរមូលដ្ឋានជាពិសេសមេភូមិ មេឃុំ-ចៅសង្កាត់ និងរដ្ឋបាលក្រុង-ស្រុក និងមន្ទីរអង្គភាពជំនាញត្រូវបញ្ឈប់ជាបន្ទាន់នូវរាល់ការបញ្ជាក់លើលិខិតទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់បង្ហាញទីតាំងដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើ និងតំបន់ការពារធម្មជាតិ និងត្រូវនិរាករណ៍រាល់លិខិតបញ្ជាក់ទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់បង្ហាញទីតាំងដី បើមិនដូច្នេះនឹងចាត់វិធានការតាមច្បាប់ជាធរមាន»។
លោក ទៀ គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបបានថ្លែងពីម្សិលមិញថា នៅខេត្តសៀមរាបមានករណីកាប់រុករានដីព្រៃមួយចំនួនដែរ ប៉ុន្ដែមិនមានសកម្មភាពជាលក្ខណៈទ្រង់ទ្រាយធំទេ។ ជាក់ស្ដែងនៅតំបន់ស្រុកស្វាយលើមានប្រជាពលរដ្ឋមួយក្រុមយកត្រាក់ទ័រទៅភ្ជួរដីព្រៃលិចទឹកហើយអាជ្ញាធរបានចុះហាមឃាត់ទាន់ពេលវេលា។
លោកបន្តថាកន្លងមកនេះអាជ្ញាធរធ្លាប់បានធ្វើការឃាត់ខ្លួនជនខិលខូចដែលដើរបំផុសបំផុលពលរដ្ឋឲ្យទៅកាប់រានដីព្រៃលិចទឹក និងដីព្រៃសហគមន៍ដោយក្នុងរយៈពេល ៩ ខែក្នុងឆ្នាំ ២០១៩ នេះសមត្ថកិច្ចបានបង្ក្រាបសកម្មភាពបទល្មើសឈូសឆាយដីព្រៃនេះបានប្រមាណ ៨ ករណីដោយអាជ្ញាធរបានធ្វើការអប់រំមួយចំនួន និងខ្លះទៀតបានពិន័យជាអន្តរការណ៍។
លោកបញ្ជាក់ថា៖ «យើងនៅតែបន្តជំរុញពង្រឹងការអនុវត្តច្បាប់បន្ថែមទៀតជាពិសេសយើងនឹងផ្សព្វផ្សាយឲ្យបានទូលំទូលាយថា ដីណា ដីរដ្ឋ ដីណាយើងការពារ ដីត្រូវបែងចែកជូនពលរដ្ឋក្រីក្រ ហើយដីណា ជាដីរបស់ក្រុមហ៊ុន ព្រោះមិនចង់ឲ្យមានបញ្ហាទំនាស់នេះច្រើនទេ។ ម្យ៉ាងទៀតសេចក្ដីជូនដំណឹងនេះ គឺចង់ក្រើនរំឭកពលរដ្ឋកុំឲ្យគាត់ទៅប៉ះពាល់ដីដែលគេហាមឃាត់ហ្នឹង»។
លោក ចាន់ ចំរើន មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុក ប្រចាំខេត្តសៀមរាបបានថ្លែងថា ដីព្រៃលិចទឹក និងព្រៃឈើសហគមន៍មួយចំនួននៅខេត្តសៀមរាបបាននិងកំពុងរងការកាប់បំផ្លាញដោយជនមានអំណាច និង អ្នកមានលុយមួយចំនួន ប៉ុន្ដែសកម្មភាពបង្ក្រាបរបស់សមត្ថកិច្ចមានភាពយឺតយ៉ាវ។
លោកបន្តថាការចេញសេចក្ដីជូនដំណឹងរបស់សាលាខេត្តសៀមរាបនេះ លោកគាំទ្រឲ្យមានវិធានការទប់ស្កាត់ និងបង្ក្រាបឲ្យទាន់ពេលវេលា។ លោករំពឹងថាអាជ្ញាធរពាក់ព័ន្ធអាចនឹងមានវិធានការតឹងរ៉ឹង និងអនុវត្តច្បាប់ស្មើៗគ្នា ទោះបីជាអ្នកមានអំណាច ឬពលរដ្ឋក្រីក្រក៏ដោយ។
លោកបានបញ្ជាក់ថា៖ «ប្រសិនមន្ត្រីពាក់ព័ន្ធគាត់អនុវត្តតាមសេចក្ដីប្រកាសនេះ ខ្ញុំសង្ឃឹមថាការទប់ស្កាត់ និងការបង្ក្រាបបទល្មើសកាប់ទន្ទ្រានដីព្រៃនេះនឹងទទួលបានជោគជ័យ ប៉ុន្ដែបើពួកគាត់នៅខ្លាចអំណាចអ្នកមាន ខ្លាចអំណាចទឹកលុយ គឺវាមិនអាចអនុវត្តសេចក្ដីប្រកាសនេះមានប្រសិទ្ធភាពទេ»។
លោក ស៊ុន គង់ ប្រធានមន្ទីរបរិស្ថានខេត្តសៀមរាបមិនទាន់អាចស្វែងរកប្រភពទាក់ទង ដើម្បីសុំបញ្ជាក់ជុំវិញបញ្ហានេះបានទេកាលពីម្សិលមិញ៕