ព្រះវិហារៈ រដ្ឋបាលស្រុកគូលែនកំពុងស្រាវជ្រាវបញ្ហាដីធ្លីនៅភូមិក្តាក់ ឃុំត្បែងពីរ ស្រុកគូលែន បន្ទាប់ពីមានការវាយទៅលើព្រះរាជអាជ្ញារងអមសាលាដំបូងខេត្តក្នុងពេលដឹកនាំកម្លាំង ចុះទៅបង្ក្រាបការកាប់ទន្ទ្រានដីព្រៃស្រោងកាលពីថ្ងៃទី ២៤ ខែមីនា ខណៈដែលរដ្ឋបាលព្រៃឈើបានបញ្ជូនសំណុំរឿងនេះទៅតុលាការ។
លោក ប៉ាង យៀក អភិបាលស្រុកគូលែនថ្លែងថា ជុំវិញបញ្ហារឿងរ៉ាវដែលព្រះរាជអាជ្ញារងអមសាលាដំបូងលោក វុធ សារី និងលោក ចក់ សម្បត្តិ ចុះទៅបង្ក្រាបបទល្មើសព្រៃឈើដែលកើតឡើងនៅភូមិក្តាក់ ឃុំ ត្បែងពីរ លោកមិនទាន់អាចផ្តល់បទសម្ភាសថា យ៉ាងណានោះទេព្រោះលោកមិនបានចុះផ្ទាល់នៅពេលកើតហេតុនោះ។ លោកបានបញ្ជាក់ថា ពេលនេះលោកកំពុងឱ្យមន្ត្រីរបស់លោកចុះពិនិត្យស្រាវជ្រាវករណីកាប់រានដីព្រៃនៅទីនោះ។
លោកថ្លែងយ៉ាងដូចច្នេះថា៖ «បញ្ហាដីព្រៃនៅទីនោះមានបញ្ហាស្មុគស្មាញណាស់ ខ្លះឆ្លើយថា អ៊ីចេះ ខ្លះទៀតឆ្លើយថា អ៊ីចុះ វាពាក់ព័ន្ធដីជិតភូមិ។ ខ្ញុំមិនទាន់ហ៊ានបកស្រាយទេ ចាំមើលឱ្យក្រុមការងារខ្ញុំចុះទៅស្រាវជ្រាវមើលប្រវត្តិដីហ្នឹងយ៉ាងម៉េចសិន ហើយចំណែករឿងហិង្សាបង្ករបួសស្នាមយ៉ាងណា លើព្រះរាជអាជ្ញារងនោះទាល់តែសួរទៅម្ចាស់ខ្លួនគេផ្ទាល់ ខ្ញុំមិនដឹងទេ»។
លោក ឡាញ់ លីស៊ីវឡេង អធិការស្រុកគូលែនថ្លែងថា ក្នុងថ្ងៃកើតហេតុលោកក៏មិនបានចុះទៅផ្ទាល់ដែរដោយសារជាប់រវល់ តែបើតាមការឱ្យដឹងពីកម្លាំងមូលដ្ឋានរបស់លោកដែលបានចុះទៅបានឱ្យដឹងថា ក្រោយពេលចុះទៅដល់ខាងអយ្យការបានឱ្យកម្លាំងដកត្រឡប់ទៅវិញ ហេតុនេះមិនដឹងរឿងរ៉ាវពិតប្រាកដកើតឡើងយ៉ាងណាទេ។
លោកបញ្ជាក់ថា៖ «ខាងមន្ត្រីប៉ុស្តិ៍មូលដ្ឋានបានចុះទៅ ប៉ុន្តែទៅមិនទាន់គេដែរ ព្រោះខាងមេព្រៃ និងស្ថាប័នអយ្យការ គេទៅដល់មុន ហើយមានរឿងបានគេហៅយើង។ អ៊ីចឹងយើងទៅក្រោយក្តាប់ព័ត៌មានអត់ច្បាស់ទេ ព្រោះក្រោយពេលមានបញ្ហា យើងទៅដល់គេឡើងឡានត្រឡប់ទៅវិញ កម្លាំងយើងក៏ដកទៅវិញដែរទៅ»។
លោក នួន សុខុម នាយខណ្ឌរដ្ឋបាលព្រៃឈើព្រះវិហារថ្លែងថា ក្រោយពីការចុះត្រួតពិនិត្យ និងកំណត់ផែនទីទិន្នន័យជាក់ស្តែងនៅក្នុងទីតាំងដីព្រៃ ដែលក្រុមឈ្មួញប្រើប្រាស់ គ្រឿងចក្រឈូសបំផ្លិចបំផ្លាញព្រៃនោះមានទំហំប្រមាណជា ៧ ហិកតាដែលជាប្រភេទព្រៃស្រោងគ្រប់គ្រង ដោយរដ្ឋបាលព្រៃឈើខេត្តព្រះវិហារ។
លោកបញ្ជាក់ថា មន្ត្រីជំនាញបានកំណត់មុខសញ្ញាជនសង្ស័យអស់ហើយ ចំពោះក្រុមឧក្រិដ្ឋជនដែលនៅពីក្រោយខ្នងនៃបទល្មើសបំផ្លិចបំផ្លាញព្រៃឈើនៅទីតាំងខាងលើនេះ ហើយសំណុំរឿងលោកបញ្ជូនទៅតុលាការនៅថ្ងៃទី ២៩ ខែមីនា។
លោកបញ្ជាក់ថា៖ «ចំពោះរឿងហេតុជាក់ស្តែង លោកអាចទាក់ទងទៅលោកព្រះរាជអាជ្ញារងដែលចុះផ្ទាល់។ ថ្ងៃនោះខ្ញុំពុំបានចុះផ្ទាល់ទេ ព្រោះជាប់ប្រជុំជាមួយអង្គការ RECOFTC គឺបានចាត់ឱ្យកម្លាំងសង្កាត់ចូលរួម»។
ព្រះរាជអាជ្ញារងនៃអយ្យការអមសាលាដំបូងខេត្តព្រះវិហារលោក វុធ សារី ថ្លែងកាលពីថ្ងៃម្សិលមិញថា លោកកំពុងពិនិត្យសំណុំរឿងមិនទាន់អាចបញ្ជាក់ថា មានការសម្រេចយ៉ាងណានោះទេ។ លោកថា៖ «សូមអធ្យាស្រ័យលោកអាចចាំទាក់ទងសួរទៅខាងអ្នកនាំពាក្យនៅពេលក្រោយ»។
ភ្នំពេញ ប៉ុស្តិ៍ មិនអាចទាក់ទងលោក ចក់ សម្បត្តិ ព្រះរាជអាជ្ញាអមសាលាដំបូងខេត្តព្រះវិហារ ដើម្បីសុំបំភ្លឺជុំវិញបញ្ហានេះបានទេកាលពីម្សិលមិញ៕