.jpg)
លោក វេង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ រូបថត សហការី
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានស្នើឲ្យក្រុមប្រឹក្សាធុរកិច្ចអាស៊ាន-អាមេរិក (US-ABC) ពិនិត្យលទ្ធភាពក្នុងការជួយកម្ពុជាប្រឆាំងនឹងជំងឺប៉េស្តជ្រូកអាហ្វ្រិក ដើម្បីគាំទ្រដល់ឧស្សាហកម្មចិញ្ចឹមជ្រូកនៅកម្ពុជា។ នេះបើយោងតាមការចុះផ្សាយរបស់ក្រសួងកសិកម្មពីម្សិលមិញ។
សំណើនេះបានធ្វើឡើងកាលពីល្ងាចថ្ងៃអង្គារក្នុងជំនួបពិភាក្សាផ្លាស់ប្ដូរយោបល់ស្ដីពីការពិនិត្យមើលកាលានុវត្តភាពក្នុងការពង្រីកការវិនិយោគរបស់វិស័យឯកជនក្នុងផលិតកម្មកសិកម្ម និងការផ្តួចផ្តើមនានាដែលពាក់ព័ន្ធដល់ការពង្រីកការអភិវឌ្ឍសេដ្ឋកិច្ចប្រកបដោយបរិយាប័ន្ន និងចីរភាពនៅកម្ពុជា។
ក្រសួងកសិកម្មបានគូសបញ្ជាក់ថាដោយមានចំណាប់អារម្មណ៍ខ្លាំងចំពោះគោលនយោបាយគាំពារជាអាទិភាពលើវិស័យកសិពាណិជ្ជកម្ម និងកសិឧស្សាហកម្មនៅកម្ពុជា ក្រុមប្រឹក្សាធុរកិច្ចអាស៊ាន-អាមេរិកបានជួបពិភាក្សាជាមួយថ្នាក់ដឹកនាំគណៈប្រតិភូកម្ពុជាភ្លាមៗ បន្ទាប់ពីកិច្ចប្រជុំថ្នាក់រដ្ឋមន្ត្រីកសិកម្ម និងព្រៃឈើលើកទី ៤១ ដែលធ្វើឡើងនៅប្រទេសប្រ៊ុយណេត្រូវបានបញ្ចប់។
ឆ្លៀតក្នុងឱកាសនោះ លោក សាខុន បានស្នើដល់ក្រុមប្រឹក្សាធុរកិច្ចអាស៊ាន-អាមេរិក ពិនិត្យលទ្ធភាពក្នុងការជួយដល់កម្ពុជាក្នុងការការពារជំងឺប៉េស្តជ្រូកអាហ្វ្រិកដើម្បីជួយគាំទ្រដល់ឧស្សាហកម្មចិញ្ចឹមជ្រូកនៅកម្ពុជា។
ឆ្លើយតបទៅនឹងសំណើនេះ ក្រុមប្រឹក្សាធុរកិច្ចអាស៊ាន-អាមេរិកបានសន្យាថា នឹងនាំយកនូវបច្ចេកវិទ្យាកសិកម្មថ្មីៗដែលជួយកាត់បន្ថយថ្លៃដើមកសិកម្ម ជាពិសេសជួយសម្រួលដល់បញ្ហាពលកម្មកសិកម្ម និងកាត់បន្ថយហានិភ័យ ដែលបំផ្លាញដោយសមាសភាពចង្រៃ និងកាត់បន្ថយការប្រើប្រាស់ធាតុចូលកសិកម្ម (ជី និងថ្នាំគីមី) សម្រាប់ការគាំទ្រខ្សែចង្វាក់ផលិតកម្មកសិកម្មនៅកម្ពុជា។
ជាមួយគ្នានេះក្រុមប្រឹក្សាធុរកិច្ចនោះក៏បានសម្ដែងការចាប់អារម្មណ៍ចំពោះការនាំចូលផលិតផលមួយចំនួនដែលជួយដល់ការកាត់បន្ថយផលប៉ះពាល់បរិស្ថានពីសារធាតុអាម៉ូញាក់ដែលមាននៅក្នុងលាមកសត្វ និងបានណែនាំនូវផលិតផលដែលជួយដល់ផ្នែកជីវសុវត្ថិភាពក្នុងបរិវេណទីតាំងកសិដ្ឋានចិញ្ចឹមដើម្បីការពារជំងឺឆ្លងសត្វនានាដូចជាជំងឺប៉េស្តជ្រូកអាហ្វ្រិក និងប្រភេទផលិតផលលាយជាមួយចំណីសត្វដែលអាចជួយផ្សុំាទៅនឹងជំងឺ និងកាត់បន្ថយការប្រើប្រាស់វ៉ាក់សាំងការពារដល់កសិករកម្ពុជាផងដែរ។
ជុំវិញការលើកឡើងរបស់ក្រុមប្រឹក្សាធុរកិច្ចអាស៊ាន-អាមេរិកនេះ លោកសាខុន មានសុទិដ្ឋិនិយមថា៖ «តាមរយៈកិច្ចសហការជាមួយក្រុមប្រឹក្សាធុរកិច្ចអាស៊ាន-អាមេរិកកម្ពុជានឹងអាចទទួលបាននូវបច្ចេកទេស និងបច្ចេកវិទ្យាថ្មីៗក្នុងផលិតកម្មកសិកម្ម ហើយអាចនឹងឈានទៅជួយដល់ការបង្កើនជីវភាពកសិករនៅតាមទីជនបទ»។
លោកក៏សង្ឃឹមថា ការបញ្ជូលបច្ចេកវិទ្យានៅក្នុងកសិកម្មក៏នឹងអាចជួយលើកកម្ពស់គុណភាព និងសុវត្ថិភាពចំណីអាហារផងដែរ ហើយបច្ចុប្បន្នប្រជាជនកម្ពុជាកំពុងយកចិត្តទុកដាក់ក្នុងការទទួលទានម្ហូបអាហារដែលមានគុណភាព និងមានការបញ្ជាក់គុណភាពច្បាស់លាស់ ដើម្បីធានាដល់សុខុមាលភាព។
បើតាមលោក នូ យុត្តិកា អគ្គនាយករងនៃអគ្គនាយកដ្ឋានសុខភាពសត្វ និងផលិតកម្មសត្វបានប្រាប់ភ្នំពេញប៉ុស្តិ៍នៅថ្ងៃម្សិលមិញថា ការដែលថ្នាក់ដឹកនាំគណៈប្រតិភូកម្ពុជាបានស្នើដល់ក្រុមប្រឹក្សាធុរកិច្ចអាស៊ាន-អាមេរិកនូវបញ្ហាខាងលើនេះ ដោយសារតែជំងឺប៉េស្តជ្រូកអាហ្វ្រិកបានបង្កផលប៉ះពាល់ធ្ងន់ធ្ងរ ដល់ការលូតលាស់ផ្នែកសេដ្ឋកិច្ច និងការអភិវឌ្ឍវិស័យឧស្សាហកម្ម និងផលិតកម្ម ចិញ្ចឹមជ្រូក ហើយផលប៉ះពាល់នេះមិនចំពោះតែកម្ពុជានោះទេ តែវាបានប៉ះពាល់ជាលក្ខណៈសកល។
លោកថា៖ «ថ្វីបើបច្ចុប្បន្ន ជំងឺប៉េស្តជ្រូកអាហ្វ្រិកបានស្ងប់ស្ងាត់ ប៉ុន្តែយើងចាំបាច់ត្រូវការជំនួយគាំទ្រផ្នែកបច្ចេកទេស វិទ្យាសាស្ត្រថ្មីៗរួមទាំងគ្រឿងសម្ភារបរិក្ខារ និងថ្នាំព្យាបាល ព្រមទាំងវ៉ាក់សាំង បន្ថែមទៀត ដើម្បីការពារការចម្លងរីករាលដាលនៃជំងឺនេះ និងដើម្បីគាំទ្រដល់ឧស្សាហកម្មចិញ្ចឹមជ្រូកនៅកម្ពុជា»។
យោងតាមតុល្យការចុងក្រោយរបស់នាយកដ្ឋានសុខភាពសត្វ និងសុខភាពសាធារណៈបសុព្យាបាលគិតត្រឹមថ្ងៃទី ១២ ខែ កក្កដា ឆ្នាំ ២០១៩ ជំងឺប៉េស្តជ្រូកអាហ្វ្រិកបានសម្លាប់សត្វជ្រូកនៅកម្ពុជាសរុបចំនួន ២ ៥៥៧ ក្បាល ក្នុងនោះសត្វជ្រូកប្រមាណជាជិត ៨០០ ក្បាល ត្រូវបានមន្ត្រីជំនាញរឹបអូសយកទៅសម្លាប់ចោល។ ជំងឺប៉េស្តជ្រូកអាហ្វ្រិកបានផ្ទុះឡើងដំបូងនៅកម្ពុជាក្នុងអំឡុងខែមីនាដោយចាប់ផ្ដើមពីខេត្តរតនគិរី ហើយបានរាលដាលទៅខេត្តត្បូងឃ្មុំ ស្វាយរៀង តាកែវ និងចុងក្រោយបានផ្ទុះឡើងនៅឃុំក្រាំងយ៉ូវ ស្រុកស្អាង ខេត្តកណ្តាល៕
