.jpg)
លោក ប្រាក់ សុខុន រដ្ឋមន្ត្រីការបរទេសនាពេលកន្លងមក។ ហេង ជីវ័ន
ភ្នំពេញៈ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនឹងធ្វើសេចក្តីថ្លែងការណ៍តំណាងលោកនាយករដ្ឋមន្ត្រី ហ៊ុន សែន នៅឯមហាសន្និបាតអង្គការសហប្រជាតិ(អ.ស.ប) លើកទី ៧៤ នៅទីក្រុងញូវយ៉ក សហរដ្ឋអាមេរិកចាប់ពីថ្ងៃទី ២៤ ដល់ ២៨ ខែកញ្ញាជាអ្វីដែលអ្នកតាមដានចាត់ទុកជាឱកាសបង្ហាញឲ្យអន្តរជាតិយល់ពីការពិតនៅកម្ពុជា។
មហាសន្និបាត(អ.ស.ប) លើកនោះនឹងធ្វើឡើងក្រោមប្រធានបទ «ជំរុញកិច្ចប្រឹងប្រែងពហុភាគីសម្រាប់ការលុបបំបាត់ភាពក្រីក្រ ការអប់រំប្រកបដោយគុណភាព សកម្មភាពអាកាសធាតុ និងបរិយាប័ន្ន»។ នេះបើតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃសៅរ៍។
សេចក្តីប្រកាសបានបញ្ជាក់ថាលោក ប្រាក់ សុខុន នឹងថ្លែងពីការអភិវឌ្ឍឆ្ពោះទៅគោលដៅអភិវឌ្ឍន៍សហស្សវត្សរ៍ និងកិច្ចប្រឹងប្រែងឆ្ពោះទៅគោលដៅអភិវឌ្ឍន៍ប្រកបដោយចីរភាពរបស់កម្ពុជា និងសារៈសំខាន់នៃកិច្ចប្រឹងប្រែងរួមក្នុងការដោះស្រាយបញ្ហាការប្រែប្រួលអាកាសធាតុ ភេរវកម្មអំពើជ្រុលនិយមនិងអចន្តិនិយម និងការគំរាមកំហែងសន្តិសុខមិនប្រពៃណី។
ជាមួយគ្នានេះលោក ប្រាក់សុខុន ក៏នឹងថ្លែងផងដែរពីបញ្ហាសណ្តាប់ធ្នាប់ពិភពលោកថ្មី ពហុភាគីនិយម តួនាទីច្បាប់អន្តរជាតិ ផលប៉ះពាល់ជាអវិជ្ជមាននៃព័ត៌មានក្លែងបន្លំ និងបញ្ហាតំបន់ និងអន្តរជាតិដែលមានផលប្រយោជន៍ និងការព្រួយបារម្ភរួម។
លោក កេត សោផាន់ អ្នកនាំពាក្យក្រសួងការបរទេសបានប្រាប់ភ្នំពេញ-ប៉ុស្តិ៍ពីម្សិលមិញថា ការចូលរួមរបស់កម្ពុជានេះគឺក្នុងនាមជាសមាជិកសកម្មមួយដែលគោរពតាមធម្មនុញ្ញរបស់(អ.ស.ប) ព្រមទាំងអនុវត្តតាម និងការពារប្រព័ន្ធពហុភាគីនិយម។
លោកថា៖ «កម្ពុជាថ្វីដ្បិតជាប្រទេសតូច តែក៏មានតួនាទីចូលរួមជាមួយសមាជិកផ្សេងក្នុងការដោះស្រាយកិច្ចការសំខាន់ៗរបស់ពិភពលោកដែរ» ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា វាជាពេលដែលកម្ពុជាយកឱកាសនេះបង្ហាញសមាជិក (អ.ស.ប) ឲ្យបានយល់អំពីសភាពការណ៍ពិតដែលកំពុងកើតឡើងនៅកម្ពុជា ។
លោកបានបន្តថា វាក៏ជាការបង្ហាញនូវដំណើរនៃនយោបាយការបរទេសមួយដែលរាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រ មធ្យោបាយ និងគោលនយោបាយផ្សេងៗទៀតក្នុងន័យរក្សាអធិបតេយ្យ ឯករាជភាព និងការពង្រីកវិសាលភាពនៃទំនាក់ទំនងការទូត។
លោក គិន ភា បញ្ជាក់ថា៖ «កន្លងមកនេះគឺមជ្ឈដ្ឋាននៃអតីតបក្សប្រឆាំងតែងតែលើកឡើងអំពីការមិនទទួលស្គាល់កម្ពុជាជារដ្ឋាភិបាល អីស្របច្បាប់ ដោយសារតែហេតុផលការបោះឆ្នោតក្លែងក្លាយ ការស្លាប់នៃប្រជាធិបតេយ្យអីជាដើមអ៊ីចឹង។ នេះជាពេលវេលាមួយដែលបង្ហាញបន្ថែមទៀតបន្ទាប់ពីការបង្កើតឡើងរដ្ឋាភិបាលរយៈពេល ១ ឆ្នាំហើយថាតើជំហរ ឬក៏តួនាទីកម្ពុជានៅក្នុងតំបន់វាមានសារៈសំខាន់កម្រិតណាដើម្បីឱ្យសហគមន៍អន្តរជាតិបានដឹងជាពិសេសឱ្យពួកមជ្ឈដ្ឋានបក្សប្រឆាំងបានយល់អំពីដំណើរដ៏ត្រឹមត្រូវក្នុងនយោបាយការបរទេសរបស់កម្ពុជា»។
លោក ឯម សុវណ្ណរ៉ា អ្នកជំនាញខាងវិទ្យាសាស្ត្រនយោបាយបានប្រាប់ភ្នំពេញប៉ុស្តិ៍កាលពីម្សិលមិញថា កម្ពុជាអាចបង្ហាញពីជំហរ និងពីការប្តេជ្ញាចិត្ត និងមោទនភាពរបស់ខ្លួនដើម្បីឱ្យអន្តរជាតិគាំទ្រ។
លោកបានបញ្ជាក់ថា៖ «...អាចពញ្ញាក់ស្មារតីខាងសហគមន៍អឺរ៉ុប និងសហរដ្ឋអាមេរិកឱ្យពិនិត្យមើលទៅលើស្ថានភាពសិទ្ធិមនុស្សដែលកម្ពុជាលើកឡើង»។
តាមសេចក្តីប្រកាសព័ត៌មានក៏បានបញ្ជាក់ដែរថាលោក ប្រាក់ សុខុន នឹងជួបទ្វេភាគីជាមួយរដ្ឋមន្ត្រីការបរទេសប្រទេសឆែក និងរុស្ស៊ីហើយរំពឹងថានឹងជួបដាច់ដោយឡែកជាមួយរដ្ឋមន្ត្រីការបរទេសប្រទេសផ្សេងទៀត និងអគ្គលេខាធិការ អ.ស.ប ផងដែរ៕
