.jpg)
លោកនាយករដ្ឋមន្ត្រី ហ៊ុន សែន និងថ្នាក់ដឹកនាំជាច្រើនរូបទៀត ក្នុងពិធីបើកកិច្ចប្រជុំសន្និបាតគណៈកម្មាធិការកណ្ដាលរបស់គណបក្សប្រជាជនកម្ពុជា កាលពីថ្ងៃម្សិលមិញ។ ហេង ជីវ័ន ហេង ជីវ័ន
ភ្នំពេញៈ រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លោក ង៉ាន់ ចំរើន បានអះអាងថាលោកនាយករដ្ឋមន្ត្រីបានព្រមានថា ចាប់ពីឆ្នាំ ២០២០ ទៅបើរដ្ឋមន្ត្រីក្រសួងណាមួយមិនព្រមផ្ទេរមុខងារទៅឲ្យថ្នាក់ក្រោមជាតិទេអាចនឹងត្រូវដកតំណែង។
ការថ្លែងរបស់លោក ង៉ាន់ ចំរើន បែបនេះបានធ្វើឡើងនៅក្នុងពិធីជួបជាមួយអ្នកសារព័ត៌មានប្រមាណជា ៤០ ស្ថាប័នកាលពីថ្ងៃទី ២១ ធ្នូ ដោយលោកអះអាងថាជាការព្រមានពីលោកនាយករដ្ឋមន្ត្រីនៅក្នុងសន្និបាតគណៈកម្មាធិការកណ្តាលគណបក្សប្រជាជនកម្ពុជាកាលពីសប្តាហ៍មុន។
លោកថា៖ «សម្តេចតេជោលោកលើកឡើងនៅក្នុងសន្និបាតគណៈកម្មាធិការកណ្តាលគណបក្សប្រជាជនកម្ពុជាលើកទី ៤១ ដោយសម្តេចតេជោបានប្តេជ្ញាដាច់ខាតកំណត់ថា ២០២០ គឺជាឆ្នាំដែលវាស់វែងអំពីវឌ្ឍនភាពនៃការផ្ទេរមុខងារទៅឲ្យរដ្ឋបាលថ្នាក់ក្រោមជាតិ។...សម្តេចបានមានប្រសាសន៍ច្បាស់តែម្តង។ នេះគឺជាការតាំងចិត្តរបស់ប្រមុខរាជរដ្ឋាភិបាល»។
លោកបានបន្ថែមថាការផ្ទេរមុខងារ ភារកិច្ច និងការទទួលខុសត្រូវពីថ្នាក់ជាតិ ឬថ្នាក់ក្រសួងទៅកាន់រដ្ឋបាលថ្នាក់មូលដ្ឋាន ឬរដ្ឋបាលថ្នាក់ក្រោមជាតិគឺទាក់ទងស្ទើរតែគ្រប់ស្ថាប័ន លើកលែងតែក្រសួងការពារជាតិ ក្រសួងការបរទេស ធនាគារជាតិកម្ពុជា។
យ៉ាងណាក្ដីលោក ង៉ាន់ ចំរើន ថ្លែងថាការផ្ទេរនេះមិនអាចធ្វើទាំងតក់ក្រហល់បានទេគឺធ្វើដោយប្រុងប្រយ័ត្ន និងជំហានៗហើយក្រសួង និងស្ថាប័នសំខាន់បំផុតនោះគឺក្រសួងអប់រំ និងសុខាភិបាលដែលជាតម្រូវការចាំបាច់របស់ពលរដ្ឋនៅមូលដ្ឋាន។
ប៉ុន្តែលោកបានទទួលស្គាល់ថាភាពយឺតយ៉ាវ និងស្ទាក់ស្ទើរនេះក៏ដោយសារមានការភ័យខ្លាចបាត់បង់សិទ្ធិអំណាច និងផលប្រយោជន៍ផងដែរ តែលោកថា រដ្ឋាភិបាលបាននិងកំពុងខិតខំដោះស្រាយបញ្ហានេះ។
លោកបានបញ្ជាក់ថា៖ «ដើម្បីធានាបាននូវការផ្ទេរបុគ្គលិកពីក្រសួងស្ថាប័នឲ្យទៅស្ថិតនៅក្រោមការគ្រប់គ្រងរបស់រដ្ឋបាលថ្នាក់ក្រោមជាតិ យើងចាំបាច់ត្រូវមានការប្រុងប្រយ័ត្នបន្តិច។ ...អ្វីដែលជាការស្ទាក់ស្ទើរ ឬក៏ភាពអូសបន្លាយ...របស់ក្រសួង និងស្ថាប័នមួយចំនួនវាសំខាន់ទាក់ទងនឹងការព្រួយបារម្ភរបស់គាត់ពាក់ព័ន្ធនឹងសមត្ថភាពរបស់រដ្ឋបាលថ្នាក់ក្រោមជាតិនេះជាបញ្ហាភាគច្រើនដែលគាត់បានលើកឡើង...សម្តេចក៏បានសង្កត់ធ្ងន់លើបញ្ហាហ្នឹងដែរអំពីភាពយឺតយ៉ាវរបស់ក្រសួង និងស្ថាប័នមួយចំនួននៅតែយកលេសអំពីបញ្ហាសមត្ថភាពរបស់រដ្ឋបាលថ្នាក់ក្រោមជាតិ។ សម្តេចបានមានប្រសាសន៍ថា បើមិនទាន់ផ្ទេរភារកិច្ច និងការទទួលខុសត្រូវឲ្យគេផង ហេតុអ្វីបានជាប្រញាប់វាយតម្លៃគេម្ល៉េះ?»។
លោក ទូច ចាន់នី អ្នកនាំពាក្យ និងអគ្គនាយកបច្ចេកទេសនៃក្រសួងសង្គមកិច្ចអតីតយុទ្ធជន និងយុវនីតិសម្បទាបានថ្លែងកាលពីម្សិលមិញថា ក្រសួងលោកបានធ្វើអនុក្រឹត្យទាក់ទងនឹងបញ្ហានេះរួចហើយ ប៉ុន្តែលោកថាមានវាការលំបាកដោយសារមន្ត្រីមួយចំនួនមិនចង់ទៅធ្វើការនៅក្រោមរដ្ឋបាលថ្នាក់ក្រោមជាតិ។
លោកបញ្ជាក់ថា៖ «យើងមានរហូតដល់អនុក្រឹត្យហើយនិងមាន ៣ ផ្នែក ទី ១ គឺការគ្រប់គ្រងកុមារកំព្រារបស់រដ្ឋទៅឲ្យថ្នាក់ រដ្ឋបាលខេត្ត,ទី ២ គឺការត្រួតពិនិត្យសម្រាប់ធ្វើអធិការកិច្ចអង្គការដៃគូ អង្គការក្រៅរដ្ឋាភិបាលថ្នាក់ស្រុក ខណ្ឌ និងទី ៣ មុខងារផ្តល់សេវាដល់កុមារងាយរងគ្រោះដល់ក្នុងសហគមន៍»។
អភិបាលខេត្តកំពង់ស្ពឺលោក វ៉ី សំណាង បានថ្លែងកាលពីម្សិលមិញថា គ្រប់ក្រសួងបានចាប់ផ្ដើមផ្ទេរមុខងារ ភារកិច្ច និងការទទួលខុសត្រូវពីថ្នាក់ជាតិទៅរដ្ឋបាលថ្នាក់ក្រោមជាតិក្នុងខេត្តរបស់លោកដោយប្រុងប្រយ័ត្ន។
លោកបានបញ្ជាក់ថា៖ «នៅពេលដែលគាត់បានផ្ទេរទៅហ្នឹងគឺខេត្តជាអ្នកសម្រេចដូចជាទាក់ទងនឹងការតែងតាំង និងការប្រើប្រាស់គឺយើងបានធ្វើការសម្រេច និងគ្រប់គ្រងដោយខ្លួនយើង។
វាអត់មានអ្វីជាបញ្ហាទេ»។
លោក សាល ដែលជាអ្នករត់ម៉ូតូឌុបនៅខេត្តសៀមរាបម្នាក់កាលពីម្សិលមិញបានស្វាគមន៍ចំពោះការផ្ទេរមុខងារភារកិច្ច និងការទទួលខុសត្រូវពីថ្នាក់ជាតិមកថ្នាក់ក្រោមជាតិនេះ ដោយសារវាជួយផ្តល់សេវាកម្មដល់ពលរដ្ឋបានឆាប់រហ័ស។
លោកបានបញ្ជាក់ថា៖ «វាជាការល្អសម្រាប់ពលរដ្ឋនៅថ្នាក់មូលដ្ឋាន ដោយសារពួកគាត់អាចទទួលសេវាកម្មដោយផ្ទាល់ពីមន្ត្រីថ្នាក់មូលដ្ឋានហើយជួយកាត់បន្ថយអំពើពុករលួយ»។
បើតាមរបាយការណ៍របស់ (គ.ជ.អ.ប) បានឲ្យដឹងថាមកទល់ឆ្នាំ ២០១៨ នេះរាជរដ្ឋាភិបាលកម្ពុជាបានទម្លាក់ថវិការដ្ឋសរុបជាង ២ ៤១២ លានដុល្លារទៅឱ្យរដ្ឋបាលថ្នាក់ក្រោមជាតិសម្រាប់ការគ្រប់គ្រងចាត់ចែង និងប្រើប្រាស់ក្រោមឆន្ទានុសិទ្ធិរបស់ខ្លួនដើម្បីបម្រើប្រជាពលរដ្ឋ។
របាយការណ៍ក៏បានបង្ហាញដែរថា ក្រសួង និងស្ថាប័នចំនួន ១២ បានធ្វើប្រតិភូកម្មមុខងារផ្តល់សេវារដ្ឋបាលចំនួនប្រមាណជាង ៦០០ ប្រភេទទៅឱ្យរដ្ឋបាលថ្នាក់ក្រោមជាតិតាមរយៈការិយាល័យ/អង្គភាពច្រកចេញចូលតែមួយ។ ក្នុងនោះរួមមាន មូលនិធិឃុំសង្កាត់ប្រមាណជាង ៧១៦ លានដុល្លារ (គិតពីឆ្នាំ ២០០២ ដល់ឆ្នាំ ២០១៨) មូលនិធិក្រុង-ស្រុកចំនួនប្រមាណ ១៥២ លាន ដុល្លារ (គិតពីឆ្នាំ ២០១៣ ដល់ឆ្នាំ ២០១៨) និងថវិការាជធានី-ខេត្តចំនួនប្រមាណ ១៥៤៤ លានដុល្លារ (គិតពីឆ្នាំ ២០០៩ ដល់ឆ្នាំ ២០១៨) ។
កាលពីពេលកន្លងមកលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃក៏ធ្លាប់បានលើកដែរថា ការយឺតយ៉ាវក្នុងការផ្ទេរមុខងារ និងធនធានទៅថ្នាក់ក្រោមជាតិបានធ្វើឲ្យមានការរាំងស្ទះដល់គោលនយោបាយរបស់រដ្ឋាភិបាលដោយលោកថា ក្រសួងមួយចំនួនមានភាពស្ទាក់ស្ទើរ ដោយសារខ្លាចបាត់បង់សិទ្ធិអំណាច និងផលប្រយោជន៍៕
