.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីមួយកាលពីពេលថ្មីៗនេះ។ រូបថត SPM
ភ្នំពេញៈ រដ្ឋាភិបាលបានចេញបញ្ជាហាមឃាត់ការធ្វើដំណើររបស់ប្រជាពលរដ្ឋដោយចាប់ផ្ដើមអនុវត្តពីម៉ោង ១២ យប់ថ្ងៃទី ៩ ខែមេសា រហូតដល់ម៉ោង ១២ យប់ថ្ងៃទី ១៦ ខែមេសា ដោយបទបញ្ជានេះគឺបានដាក់កំហិតមិនឱ្យមានការធ្វើដំណើរឆ្លងកាត់ពីស្រុកមួយទៅស្រុកមួយ និងពីខេត្តមួយទៅខេត្តមួយទៀត។
នៅក្នុងសេចក្ដីប្រកាសដែលចេញពីល្ងាចម្សិលមិញបានបញ្ជាក់ថា ការចេញបទបញ្ជានេះគឺដើម្បីទប់ស្កាត់ជំងឺកូវីដ ១៩ កុំឱ្យរាលដាលចេញពីដំណាក់កាលនាំចូលជំងឺពីប្រភពខាងក្រៅចូលទៅដល់ដំណាក់កាលនៃការឆ្លងរាលដាលរវាងប្រជាជននៅក្នុងសហគមន៍។
ប៉ុន្តែបទបញ្ជានេះគឺបានលើកលែងចំពោះការដឹកជញ្ជូនទំនិញគ្រប់ប្រភេទនៅតាមផ្លូវគោក ផ្លូវទឹក និងផ្លូវដែករួមទាំងរថយន្ត និងមធ្យោបាយធ្វើដំណើររបស់មន្ត្រីរាជការស៊ីវិលគ្រប់ស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិក្នុងគោលដៅបំពេញការងារប្រចាំថ្ងៃដែលម្ចាស់យានយន្តត្រូវបង្ហាញដល់កងកម្លាំងមានសមត្ថកិច្ចត្រួតពិនិត្យនូវអត្តសញ្ញាណប័ណ្ណការងាររបស់ខ្លួន។
ក្រៅពីនេះក៏មានការលើកលែងរថយន្ត និងមធ្យោបាយធ្វើដំណើររបស់កងកម្លាំងប្រដាប់អាវុធគ្រប់ប្រភេទក្នុងគោលដៅបំពេញភារកិច្ចរបស់ខ្លួន រថយន្តពន្លត់អគ្គិភ័យ រថយន្តសង្គ្រោះបន្ទាន់របស់មន្ទីរពេទ្យរដ្ឋ និងឯកជន រថយន្តដឹកសំរាម និងកាកសំណល់។
ជាមួយគ្នានេះការលើកលែងរថយន្តដឹកជញ្ជូនកម្មករទៅកាន់ទីកន្លែងការងារនៅតាមរោងចក្រ សហគ្រាស ត្រូវតែមានបណ្ណអនុញ្ញាតចេញដោយក្រសួងការងារ និងបណ្ដុះបណ្ដាលវិជ្ជាជីវៈ ឬមន្ទីរការងារ និងបណ្ដុះបណ្ដាលវិជ្ជាជីវៈ។
ការលើកលែងផ្សេងទៀតគឺការធ្វើដំណើររបស់ប្រជាពលរដ្ឋទៅកាន់មន្ទីរពេទ្យ ឬមណ្ឌលសុខភាពដែលនៅជិតបំផុត ដើម្បីទទួលបាននូវសេវាសុខភាពចាំបាច់ និងបន្ទាន់ដោយកំណត់ចំនួនមនុស្សមិនឱ្យលើសពី ៤ នាក់សម្រាប់ករណីនីមួយៗ។
ទោះយ៉ាងណាសេចក្ដីប្រកាសរបស់រដ្ឋាភិបាលនេះបានបញ្ជាក់ថា ចំពោះការធ្វើដំណើរនៅក្នុងរាជធានីភ្នំពេញនឹងមិនត្រូវហាមឃាត់ការឆ្លងកាត់ពីខណ្ឌមួយទៅខណ្ឌមួយនោះឡើយ។
លោកនាយករដ្ឋមន្ត្រី ហ៊ុន សែន បានបញ្ជាក់នៅក្នុងហ្វេសប៊ុករបស់លោកកាលពីម្សិលមិញថា ការចេញបទបញ្ជានេះគឺធ្វើឡើងដើម្បីសុវត្ថិភាពរបស់ជាតិ និងជីវិតរបស់ប្រជាជន។ លោកសរសេរថា៖ «ខ្ញុំពុំមានជម្រើសអ្វីឱ្យល្អជាងការចេញបទបញ្ជាបែបនេះទេ។ ប្រសិនមានច្បាប់គ្រប់គ្រងប្រទេសក្នុងគ្រាអាសន្នប្រហែលជាច្បាប់នោះត្រូវយកមកអនុវត្តនាពេលនេះដែរ។ សូមការយោគយល់ពីសំណាក់បងប្អូន ជនរួមជាតិក្នុងគ្រាដ៏លំបាកនេះ»។
ដោយឡែកនៅក្នុងខ្សែអាត់បែកធ្លាយមួយលោក ហ៊ុន សែន បានបញ្ជាក់ថា ការចេញបញ្ជានេះគឺដើម្បីទប់ស្កាត់កុំឱ្យកម្មករនាំគ្នាទៅលេងស្រុកកំណើតនៅថ្ងៃបុណ្យចូលឆ្នាំថ្មី និងដើម្បីការពារប្រទេសកុំឱ្យជួបគ្រោះថ្នាក់អន្តរាយ។
លោកបានលើកឡើងថា កម្មករហាក់មិនយល់ស្រប និងស្ដាប់តាមការអំពាវនាវរបស់រដ្ឋាភិបាល ដើម្បីកុំឱ្យមានការឈប់សម្រាកនៅថ្ងៃបុណ្យចូលឆ្នាំខាងមុខនេះ និងដើម្បីមិនឱ្យធ្វើដំណើរទៅស្រុកកំណើតឡើយ។
លោក ហ៊ុន សែន បញ្ជាក់ថា៖ «បើបងប្អូនមិនស្ដាប់អ៊ីចឹង ហើយក៏មិនអាចធ្វើច្បាប់បន្ទាន់ដែរ អ៊ីចឹង! សុំឱ្យយកចិត្តទុកដាក់ ផ្ដល់យោបល់ឱ្យខ្ញុំ ហើយបើផ្ដល់យោបល់បានហើយ សុំសម្ដេចក្រឡាហោម (ស ខេង) និងឯកឧត្តម ប៊ិន ឈិន (ឧបនាយករដ្ឋមន្ត្រីប្រចាំការ) ធ្វើសេចក្ដីព្រាងឱ្យខ្ញុំ ដើម្បីចុះហត្ថលេខាចេញបទបញ្ជាហាមឃាត់ការធ្វើដំណើរចេញពីស្រុកមួយទៅកាន់ស្រុកមួយពីខេត្តមួយទៅកាន់ខេត្តមួយ ហើយរថយន្តឈ្នួលទាំងអស់ មិនឱ្យធ្វើដំណើរក្នុងរយៈពេលហ្នឹង។ យើងត្រូវមានវិធានការជាក់លាក់ មិនអ៊ីចឹងទេនឹងអន្តរាយស្រុកទេស»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានថ្លែងថា នៅក្នុងពេលដែលរដ្ឋាភិបាលកំពុងខិតខំប្រឹងប្រែង ដើម្បីទប់ស្កាត់ស្ថានការណ៍ក្នុងការការពារកុំឱ្យមានការឆ្លងរាលដាលជំងឺកូវីដ១៩នៅក្នុងប្រទេស ឬនៅតាមបណ្ដារោងចក្រ គឺកម្មករមានជម្រើសតែ ១ គត់គឺការអត់ធ្មត់អនុវត្តតាមសេចក្ដីណែនាំរបស់រដ្ឋាភិបាល។
លោកថា៖ «យើងអត់មានជម្រើសអីក្រៅពីការអនុវត្តតាមអ្វីដែលជាវិធានការរបស់រដ្ឋាភិបាលទេ ពីព្រោះថាក្នុងកាលៈទេសៈនេះគឺជាស្ថានភាពមួយធ្ងន់ធ្ងរបំផុតដែលពិភពលោកកំពុងតែបារម្ភ ជាពិសេសខ្មែរយើងក៏ជាប្រទេសមួយដែលកំពុងទទួលរងផលប៉ះពាល់ធ្ងន់ធ្ងរដែរពីការរាលដាលនៃជំងឺនេះ»៕
